台灣肉燥 + 孜然醬汁焗茄子 ( 9-APR-2014 )

我自己見到都無哂胃口   何況里奧大人呢   同埋茄子變黑仲更加樣衰囉

( 9-APR-2014  WED )

雖然尋晚好早瞓   但仍然唔想起身   哈哈 ~

早餐食奄列餐   食完又見到渠王   咁等埋佢食完先番工呢 ~

菇場唔太忙   不過成日有人喺隔離房 Interview   唔太方便上網囉 ~

Lunch 食麥片 + 朱古力奶   所以食完甜又想食鹹   但我發覺我無鹹嘅零食   得糖同埋朱古力   唉 ~

今日又飲紅糖水   之後食話梅薑   食咗粒好辣嘅   再飲啖紅糖水   即刻諗起勁薑蕃薯糖水 ~

      
超勁想食雞腳   所以放工去百佳   買下買下又用咗成二百   依家啲錢真係好唔見駛呀 ~

番到屋企預備好哂就食雞腳喇   食咗 3 隻之後就呆咗 ~

煮完哂所有嘢都差唔多 7 點半   我只係食番尋晚嘅蓮藕   已經加水焗咗成 20 分鐘   都好似仲係生咁   所以唔食喇   把鬼火   哈哈 ~

是日晚餐 - 台灣肉燥 + 孜然醬汁焗茄子  

台灣肉燥 - 尋朝食早餐   聽見個男人同佢啲女同事講   話整咗台灣肉燥好好味   秘訣係五香粉同冰糖喎   咁之後佢成個煮嘢過程都講埋出嚟   咁我覺得好簡單   同埋好多年前已經煮過   不過就唔記得點煮啦   所以又想煮肉燥喇   今次我無加冬菇   因為屋企無貨   但都好食呀   因為我 "北" 比里奧大人都幾多飯   佢都食得哂呢  哈哈 ~               

孜然醬汁焗茄子 - 以後唔焗茄子喇   焗咗 30 分鐘都未熟嘅   但食譜又話焗 20 分鐘已經熟   其實我想掉㗎喇   不過又覺得好浪費   所以求鬼其加埋啲韓式醃肉醬一齊焗   甜甜哋   同埋個色靚啲咁囉 ~

里奧大人 8 點半打黎話放工   咁我就出去徑步喇   之後就 join 埋佢一齊番屋企   咁都徑咗 20 分鐘   算唔錯啦   以一個懶人黎講 ~

番到屋企陪埋里奧大人食飯   我又食少少   之後抖陣就沖涼喇 ~

今晚仍然睇 "心計"   好似好耐無睇   不過都睇唔耐   睇完一集都瞓喇 ~