蕃茄煙肉扁意粉 + 粟米蛋花湯 ( 7-APR-2014 )

( 7-APR-2014  MON )

今朝起身   隻右眼好痛呀   次次唔夠瞓   隻眼就會好痛   不過隔多幾個鐘就唔會再痛囉 ~

早餐食腿蛋治烘底   飲咗咖啡都好眼瞓添   大鑊了 ~

老闆同大粒都唔喺度   所以佢哋啲房係熄哂燈   個天又灰灰暗暗   加上菇場又靜   我又眼瞓   好在要做勁麻煩 Report   唔係瞓着都似 ~

12 點搞掂哂   要比對眼抖抖 lu ~

今晚有人嚟送電視機   所以 Lunch Time 出去買定蕃茄   咁就唔駛特登放工去街市買喇   之後無啦啦又想食酸辣米線啦   呵呵 ~

真係好眼瞓   但就一定唔會飲咖啡   就咁沖杯熱茶算喇   所以一放工即走 ~    

今晚真係攰到黐咗線   居然無熄火呀   不過好感恩嘅就係我平時用右邊爐頭   就只會抹用過嘅爐頭   咁今晚兩邊爐頭都有用   但唔知點解我今晚用完右邊   無啦啦又抹埋左邊   不過真係好在抹下咋   因為白鑊開火呀   頭先我煮意粉係用細火   又心急上碟   所以無熄到定啦   好在無燒燶咋   真係超勁驚   太大意喇   唔通真係太攰唔可以煮嘢 ?!   同里奧大人講番   佢話我已經唔係第一次 ~

里奧大人 7 點放工   我就咁飲粟米湯   等埋佢番嚟再陪佢食   係食番尋日嘅 KFC 炸雞   勁好味 ~

是日晚餐 - 蕃茄煙肉扁意粉 + 粟米蛋花湯  

蕃茄煙肉扁意粉 - 懶呀   所以唔買車厘茄   轉買大肉茄   其實我都唔知肉茄同蕃茄有咩分別   哈    里奧大人仲搞笑   話我買完本意粉食譜就即刻煮意粉   不過我話唔係喎   因為啲煙肉喺冰格好耐   要清埋佢咋 ~ 

粟米蛋花湯 - 我真係超勁鍾意飲粟米湯   不過煩里奧大人就唔太鍾意   話頂胃喎   所以依家只可以 4 罐 4 罐咁買   所以有時飲哂都唔知   咁就唔好嘛   因為我多數等特價先買家嘛   即係又唔可以想飲就飲囉 ~  

約咗 8 點送電視機   不過 9 點先送到嚟   里奧大人話自己裝   個師傅聽到好愕然   咁拎咗部電視機出嚟   原來真係好難裝   因為螺絲上唔實   成部跌落黎都似   最後要搵番師傅黎裝   最快要星期三呀   又無得睇電視 lu ~

之後 Sales 打嚟話聽晚佢過嚟幫我哋裝電視同追台   咁我哋就唔駛等到星期三   好感恩呀   遇到個好 Sales   因為售後服務都好緊要家嘛   哈哈 ~

今晚勁喇   10 點 15 分瞓喇   不過其實次次星期一都係早瞓啲嘅 ~