茄汁豬扒 + 蒜蓉豆豉炒娃娃菜 + 蕃茄薯仔瘦肉湯 ( 31-JAN-2016 )

( 31-JAN-2016  SUN )

今朝 8 點半要起身   不過我懶咗 10 分鐘床先捨得起身呀   因為真係好攰   但唔想成日比藉口唔番主日學同崇拜   所以我點都會起身呢 ~

食埋早餐就番屋企   抖陣就番教會喇 ~

勁鬼眼瞓   崇拜完畢去 Taste 買餸   之後即番屋企喇 ~

婆婆 1 點幾打嚟問媽咪點 ?!   我依家有接聽電話恐懼症囉   佢問我做咩唔探媽咪 ?!   我語氣極重話我晏晝唔會探佢囉   我自己大把嘢要做呀   媽咪無嘢㗎喇   係咁啦   拜拜 ~

其實真係好煩   唔探咪唔探囉   一日探三次咩   真係覺得媽咪一入院   我同家姐好似要 Stand By 喺醫院咁   妳估我唔駛番工嘅 ?!   我唔駛休息嘅 ?!   大佬   已經唔煮飯㗎喇   家務都只係熨衫   每晚最想係快啲休息   一早講咗話我車程來回兩個鐘   唔會日日探   仲成日打嚟做乜   同埋佢又唔知媽咪又只係瞓   我去都無意思   但我都費事同佢講   唔係一陣又問點解點解點解點解點解點解點解點解    麻鬼煩 ~

唉   我雖然眼瞓   但瞓唔到呀   里奧大人就入房瞓囉   我就抹廚房   順便滾湯   佢瞓到 2 點半就起身   我叫佢快啲洗臉   因為我勁餓呀   哈哈 ~

食完嘢就精神番啲   咁里奧大人就做公司嘢   我繼續抹嘢   抹哂所有門   之後再抹埋廁所   我都要比自己抖下 lu ~

今晚要徑步   所以 7 點食飯   但其實未餓   不過唔食唔得   咁唯有食啲菜同少少豬扒當晚餐啦 ~
        
是日懶餐 - 茄汁豬扒 + 蒜蓉豆豉炒娃娃菜 + 蕃茄薯仔瘦肉湯  

茄汁豬扒 - 我發覺好多時一懶就煮茄汁豬扒咁   里奧大人話點樣先可以啲肉無咁 "鞋"   我話換咗個老婆啦   咁樣就唔會有 Overcook 嘅豬扒   我多數問佢好唔好味   佢話講咗話 "鞋" 就話佢   又要問人好唔好味   我咪話囉  問你好唔好味   你只需答好味定唔好味   其他嘢唔駛講   之後佢話咁都好   起碼可以話唔好味   勁驚我只係比好味同好好味佢揀呀   哈哈哈哈 ~

蒜蓉豆豉炒娃娃菜 - 貪佢平嘛   $8.9 一包   同埋最緊要唔駛拻芯   慳番好多時間架   今晚又係加埋蒜蓉豆豉辣椒瘦肉一齊炒   真係唔想嘥咗啲瘦肉囉 ~     

蕃茄薯仔瘦肉湯 - 上星期買㗎   到依家先有時間煲   呢度有 4 個蕃茄 + 1 個大薯仔   但薯仔都唔粉嘅   下次真係買開邊檔就去邊檔買好呢 ~

里奧大人知我好攰又爆手指   佢話佢洗碗   我即刻話最驚話你洗碗   好記得有次佢洗碗   真係洗得好快   但原來食完飯嘅碗碗碟碟都無拎入廚房   唔怪之得咁快啦   所以我覺得佢係越幫越忙囉 ~

8 點 40 分出發去徑步   勁鬼凍囉   朝早都無咁凍   不過唔理喇   照徑步   因為好想郁下呢 ~

沖埋涼   睇陣電視   11 點唔夠就瞓喇 ~

意龍餐廳 @ 官塘 ( 30-JAN-2016 )

前菜 - 鵝肝蝦膠春卷 燒雞凱撤沙律 

印度咖哩龍脷柳蛋包飯 ($68)

炒飯底   仲要有好多菜絲 + 菇   好味呀  

鵝肝醬火焰芝士燒牛肩扒 ($128) - 唔好食囉   個黑椒汁係鹹嘅   同埋鵝肝醬加芝士好鬼漏  最後都只係齋食塊牛肩扒算喇  

( 30-JAN-2016  SAT ) 

呢排勁攰   真係勁唔想起身番工囉 ~

早餐食熱狗餐   連食兩日都幾悶咁   諗住走啦   點知 8 卦又嚟咗   咁等埋佢啦 ~

菇場唔忙   忙都唔做住呀   Holiday Mood 嘛   無心機做呀 ~

家姐見完醫生   腎功能指數 200 就唔駛洗腎   去到 900 先要洗   咁我咪話囉   依家 200 都高啦   我覺得佢同媽咪想法一樣   未去到洗腎呢步都唔算危險   救命 ~

咁我之前上網睇   咁好多嘢都唔食得   家姐話醫生話最緊要食得均勻   咁我都知   但有啲嘢樣樣食啲就死得啦   楊桃係腎臟第一殺手   唔通食啲啲無事 ?!   我咪話佢囉   佢只係主診醫生   即係唔係專科   妳自己上網睇下腎病病人有咩唔好食啦   唔係人講妳就聽    自己分析下啦   真係好怕佢哋   唔用腦諗嘢   人話乜就乜   個個人身體狀況唔同家嘛   頂佢哋唔順 ~

放工即走   今日都幾好天   起碼無落雨又唔太凍   不過我呢個月都好攰下   如果唔係實會去行山囉 ~

之前里奧大人成日話去興記食嘢   但我唔想行咁遠   咁今日都係同佢食啦   因為真係講咗好多次都無同佢去   所以叫佢早餐千奇唔好食蛋同麵    因為興記又係食呢啲呢 ~

食完去商場行陣   估唔到 Baleno 嘅褸好平   減到 $99 同 $139   所以里奧大人買咗件喺屋企着   我又再買多件比媽咪同家姐   之後自己買咗 2 件有帽 One Piece   因為 $99 一件好抵   質地好舒服呢 ~

買完就番屋企喇   抖到 3 點半就出發去探媽咪喇 ~

4 點半去到醫院   離遠見媽咪反白眼   嚇鬼死   原來佢瞓着咗 ~

媽咪問我食唔食蟠桃 ?!   我心諗唔係佢以為自己喺屋企呀嘛   所以問佢點解有蟠桃 ?!   佢話叫咗工人一陣帶嚟   哈哈   咁都好啲 ~

之後見到珍珠雞同滷水雞翼   真係覺得家姐係咪白痴 ?!   咁鹹嘅嘢仲比媽咪食   媽咪無腦都算   妳都唔好咁無腦啦   唔該 ~

差唔多 5 點派飯   不過媽咪唔食   因為一陣家姐會帶魚比佢食呢 ~

媽咪又攰無胃口   我反而唔驚喎   因為覺得係正常囉   妳唔郁成日瞓   一個人越瞓就越攰   有胃口先奇   反而我覺得媽咪勁添啦   可以懶到咁   我唔舒服連瞓兩日   我條腰都痛㗎   之後郁番下先好啲咋 ~

家姐 6 點到   我比埋啲利是錢佢   再比佢試埋件褸   好在佢同媽咪都啱 Size   咁我唔駛拎去換嘛   之後傾多兩句   我同里奧大人都走喇 ~

等咗半個鐘頭小巴   又凍喎   里奧大人話打的落官塘㗎   我唔制呀   又唔係趕時間喎 ~

落到官塘都差唔多 8 點   食埋嘢再搭 35 小巴番九龍灣   諗住徑步   但里奧大人話凍呀   唔徑喎 ~

沖埋涼就休息   10 點坐喺梳化度 Hea   之後瞓鬼着咗呀   仲瞓得好林添   瞓到 10 點半醒咗   居然有啲精神   勁驚 ~

差唔多 11 點就入房瞓喇   凍凍哋真係幾好瞓呢 ~

Pizza Hut @ 九龍灣 ( 29-JAN-2016 )

周打蜆肉湯 - 正呀   得一粒蜆肉   好珍貴呀

香蒜海鮮炒意粉 - 都幾好味   我中意食蒜味嘢   里奧大人懶勁   話指天椒唔辣   我話細細粒係指天椒一定辣   大粒嗰啲係紅椒就唔懶囉  

超級至尊 (薄批) - 佢嚟錯咗厚批呀   所以又要等   餓鬼到我呢   我地第一次食得哂一個套餐   覺得好勁呀 

我鍾意凍檸茶個杯   之前成日想買   但當搵到嘅時候又唔想買   咁都好   可以慳番   呵呵  

( 29-JAN-2016  FRI )

又差唔多過咗 1 個月   以前講 2046 好似講到下世紀咁遠   依家覺得佢越嚟越近咁   哈哈 ~

早餐食熱狗餐   真係食到唔知想食咩 ~

菇場忙下停下   咁都好   無咁眼瞓   哈 ~

行咗陣先買車仔麵番菇場食   之後家姐打嚟本來媽咪要照肺   但因為要落顯影劑   可能會令病人急性腎衰竭   因為正常腎功能指數係 40-90   媽咪依家係 200 呀   所以會好危險   同埋個肺嘅黑影 size 喺呢 3 年都無咩大到同細到   所以我同家姐都話唔照肺喇   好感恩醫生約咗家姐聽朝見佢   講解下照肺風險   真係好感恩㗎   好難得見到醫生   同埋家姐又唔駛番工   唔駛特登請假嘛   我就一定請唔到啦   西瓜又唔喺度   唉 ~

聽完都無哂心機   腎指數喺大半年增加咗 100   真係好離譜啦   可想而知喺呢大半年食咗幾多對腎唔好嘅嘢   本來今晚唔探媽咪   我都探下佢   順便嚇下佢 ~

放工即走   去到官塘又要等 20 分鐘小巴   去到都 6 點 40 分   媽咪咁啱量血壓   都係高咗   但心跳同條氣都 OK ~

媽咪又瞓啦   之後我問媽咪做咩成日瞓   佢話隔離床阿婆成日好大聲嘈   成日話好痛   所以夜晚瞓唔到   咁事實媽咪隔離阿婆又真係好嘈嘅   我坐喺度都有時比佢嚇一嚇   不過我話媽咪妳自己本身都係懶㗎喇 ~

7 點幾媽咪就話要坐   話想睇電視   之後我話依家妳腎功能指數去到 200 係好危險   腎壞咗就救唔番   不過唔駛驚   出咗院唔好再出街食   要做運動飲多啲水   要好好保護個腎   妳自己再亂食嘢   真係咩都幫唔到妳㗎喇 ~

之後又傾下偈   見佢都笑   算佢啦   我話記得要聽話   如果聽話   我就會醒啲嘢妳食   如果佢亂食嘢   喺家用扣   每一樣扣一百蚊 ~

7 點 40 分見到姑娘喇   話媽咪只係血壓高   其他都 OK   咁我都安心哂 ~

祈禱完就同工人一齊走   我都同工人講   媽咪嘅腎指數非常非常之危險   如果再亂食嘢會無命㗎   佢係咁話知道 Mum 知道 Mum   希望佢真係知道啦 ~

打比家姐   佢把聲好開心咁話 : 妳做咩今晚探媽咪嘅 ?!   我話嚟嚇一嚇媽咪   等佢唔好亂食嘢   之後話媽咪都有傾偈   我仲比岳綺羅個樣佢睇添呀   不過媽咪話佢唔恐怖   反而我覺得恐怖   哈哈 ~

去到九龍灣都 8 點 45 分   我想食去 Pizza Hut   咁里奧去人話去另一間   因為 Pizza 份量唔多   但去到要等 40 張飛   我咁啱去到 Pizza Hut 附近   我就去攞位   感恩下一張到我   呵呵   最後點都係要去 Pizza Hut   哈哈 ~

9 點先開餐   勁餓呀   同埋可能我見到媽咪都肯起身傾下偈   我個人放鬆哂   所以零舍餓   哈哈哈哈   真係喎   雖然我把死人口成日鬧媽咪   但我真係好擔心佢家嘛   真係自己身體都無咁擔心呀 ~

番到屋企都 10 點   晾埋衫就沖涼   睇多陣報紙   11 點幾都瞓喇   潮潮濕濕嘅天氣   個人真係特別攰 ~

稻香 @ 九龍灣 ( 28-JAN-2016 )

田園菜籃 ($48)

鮮蝦丸/墨魚丸 ($52)

黑豚梅肉 ($48)

手唧蟹籽麵 ($36) 

( 28-JAN-2016  THU )

今朝無咁凍喇   但又潮潮濕濕咁囉   走廊同牆都濕哂   所以叫里奧大人即刻換另一對無咁跣嘅鞋呢 ~

早餐食米粉餐   超級勁飽 ~

我番到菇場   多數會着另一件厚身外套   咁我慣咗揚下見外套先着嘛   點知大力得滯   咁啱阿齋經過我位   我隻手袖一嘢打落阿齋塊臉度   佢摸住塊臉好慘咁話唔鍾意我都唔好一巴星我嘛   笑鬼死我呀   之後阿爽仲衰   話我 Fing 手袖嗰下好似打乒乓波咁   大大力一嘢抽埋去咁呀  問我練咗幾耐?!   之後隔咗一陣   阿齋又話比阿花唔小心一嘢中落佢心口度   笑鬼死   佢話應該會有第 3 次   佢好驚呀   哈哈 ~

呵   好在唔太忙   可以抖下 ~

今朝勁飽   所以 1 點先食啲啲麥皮   再食埋個菠蘿包   咁就啱啱好 ~

無啦啦又勁忙   搞到我情緒有啲唔穩定   哈哈 ~

里奧大人 1 點要上大陸見客   估唔到 5 點已經番到喺屋企   本來今晚煮飯架   但因為有一袋新銀紙拎番屋企   所以我唔去街市買餸喇   拎番屋企先囉 ~

又勁想打邊爐   所以去稻香呢 ~   

食呀食   婆婆 7 點 15 分打嚟比我   又係問媽咪點啦   佢應該聽到我講嘢地方好嘈   所以我話出咗去傾電話   講十句都係問嗰兩樣嘢   重覆又重覆   係咪我把聲太好聽   想聽多幾次呀 ?!

    
我同家姐講話婆婆打咗比我   家姐話婆婆都打咗比佢   仲連打兩次   因為家姐問緊姑娘嘢   所以唔聽電話住   妳話係咪煩   姑娘一陣行開就問唔到嘢㗎喇   真係好 Q 煩 ~

之後婆婆 8 點又打嚟   第一句問家姐做咩唔聽電話   其實我最憎人咁講   咩叫做咩唔聽電話呀 ?!   24 小時拎住部手機 ?!?!   所以我真係好重語氣問妳搵家姐乜事 ?!   佢話無嘢呀    問下媽咪點 ?!  我真係頂唔順話佢   我話我同家姐唔係 24 小時拎住部電話   聽唔到電話有幾出奇呀 ?!   妳唔好成日咁 Chur 住人啦   家姐可以揸緊車㗎   之後佢話好掛住媽咪   我話得啦   妳唔駛擔心   佢無嘢   係咁啦   拜拜   不過家姐話之後佢都有打比佢   救命 ~

大佬呀   成日又問我又問家姐又問工人   個個都係咁答案㗎啦   真係好 Q 煩   真係搵日我開 Speaker   3 個一齊講話媽咪無嘢   睇佢仲打唔打嚟 ~

晴晴電話可以用得番啦   感恩感恩   之後我話姑奶一陣又懶叻   話駛咩去大埔整   之後里奧大人反應勁快話: 咁妳又唔第一日拎去嗰度整   哈哈 ~

今晚飽到想嘔   所以食完行陣商場先番屋企   又收到冰姑寄嚟啲嘢   真係好驚再講自己鍾意啲咩囉 ~

DARLING   Love u

   
真係要飲杯黑茶消滯   之後沖涼   熨埋 2 機衫就睇 "無心法師" 大結局   好感人呀   嗚嗚嗚嗚 ~

衰里奧大人超級勁衰呀   成日做岳綺羅企喺度前後搖嘅動作   好鬼恐怖家嘛   之後我話再係咁   唔好怪我唔客氣對你呀下 ~

11 點幾瞓喇   要瞓喇 ~   

大阪王將 @ 九龍灣 ( 27-JAN-2016 )

元祖天津蛋 和風炸雞 五味海苔飯 王將咖哩汁 ($57)

雞皮脆卜卜最正   呵呵  

五味海苔飯   好味呀   但真係食唔哂啲蛋   我哋盡咗力   都只係係咗半邊蛋   實在太漏喇 

元祖餃子 6 隻 (+$18)   我真係好鍾意食餃子   呢間餃子都好味道呢  

咖哩吉列豬扒鍋 (北海道珍珠飯 / 豆腐味僧湯 / 漬物) ($62) - 我都幾鍾意食漬物   份量少少就最好       

里奧大人話最緊要熱辣辣呀   呢個幾星期   每次食嘢   佢都話要食熱嘢   最緊要熱辣辣

( 27-JAN-2016  WED )

尋晚半夜咳到我死死下   頂唔順要去飲啖水   我最驚係咳   因為會嘈住里奧大人瞓覺嘛 ~

里奧大人今朝上大陸   鬧鐘響完之後我都即瞓番   勁攰呀 ~

今朝落毛毛雨呀   所以仍然覺得凍呢 ~

食完早餐就嘆報紙   點知 8 卦又嚟咗   咁傾偈啦 ~   

菇場唔太忙   不過個人好攰   上網都無咩心機咁 ~

Lunch Time 出去 Panash 買包比家姐   順便買酸辣米線番菇場食 lu ~

實在太好   Hea 到放工   今晚去探媽咪   感恩 6 點 15 分去到醫院呢 ~

媽咪又係瞓   工人話媽媽今日嘔   唔係咁想食嘢   咁我話無味嘢梗係唔想食啦   同埋成日唔郁都唔餓啦   其實唔郁就無胃口食嘢   之後身體就一定弱   但話極都唔郁   我都唔話 lu   鍾意點就點   我唔想成日咁激氣   好無謂   我問心無愧架   叫妳做運動同戒口   唔係害妳   既然咁唔想聽   我都唔會再講 ~

婆婆打嚟問媽咪點   我話啱啱到醫院   媽咪無咩嘢   之後又問媽咪無嘢   天呀   問嚟問去都係問有無嘢   答咗一次就夠啦下話 ?!   問到我都煩   之後又問我係咪喺醫院   係咪痴㗎   我頂唔信話佢   我頭先咪話到咗醫院囉   之後又問媽咪點 ?!   我話媽咪瞓緊覺呀   佢叫我叫醒媽咪   我語氣好重話做咩要叫醒媽咪   咪又佢瞓囉   之後佢無出聲   我話得喇唔駛擔心   拜拜 ~

有時真係好想話媽咪   講真   放工頻樸真係好辛苦   妳又唔係話眼瞓到極點   點妳都同我講下嘢啦   因為見佢幾次轉身都望電視   同埋又會叫我番屋企   不過佢都知我唔舒服   所以我話 7 點 25 都走喇   家姐話嚟   我都唔等喇   我又約咗里奧大人食飯   唔想咁夜番屋企 ~

里奧大人 7 點半左右到公司附近   佢話放低啲嘢先再番屋企   咁我都走喇 ~   

等小巴等到 7 點 40 分   估唔到又見到家姐   佢送埋我上車都去探媽咪 lu ~

小巴轉小巴   好感恩 8 點 15 分番到九龍灣   我要上屋企開機洗衫先呀   咁唔駛番到嚟先開機   咁就要夜啲瞓   我唔想囉 ~

里奧大人又差唔多到九龍灣   咁我話想食煲仔飯   叫佢去大快活   但去到無哂排骨飯   所以我話去大阪王將   好感恩入面有位呢 ~

食完即番屋企 lu   沖埋涼之後休息喇   都係 11 點就幾瞓 ~ 

別府 @ 九龍灣 ( 26-JAN-2016 )

韓式部隊鍋 ($62) - 有半個辛辣麵   不過我話食唔哂   所以同里奧大人 Share

別府地獄鍋 (2 辣) ($64) - 都唔係好辣  

烏冬 ($18) - 最後里奧大人話唔夠飽   所以叫多個烏冬 

( 26-JAN-2016  TUE )

雖然今朝都有 11 度   但唔知係咪天陰陰   所以都係覺得凍呢 ~

無咩胃口呀   慘   唔好病喎 ~

一入菇場已經覺得好唔舒服   又咳又打噴嚏   所以即沖杯 Hot Lemon 打底 ~

勁忙呀   個腦仲閉塞埋添 ~

食埋 Lunch Box 就出去行下   真係出咗去   個人無咁唔舒服 ~

又係一番入菇場又係咁咳同打噴嚏   定係乾燥喉嚨痕呢   但我已經狂飲熱水㗎喇 ~

放工探媽咪   6 點半先去到醫院   媽咪又瞓啦   不過佢都知我嚟   因為佢叫我快啲番屋企 ~

真係好邪   次次我唔番屋企先呢   里奧大人就會好早放工   今晚佢 6 點 40 分已經放工喇   所以佢好鍾意我去街   咁即係佢可以好早放工呢 ~

感恩 7 點半見到姑娘   話媽咪呢兩日血壓高   14x 度   但心跳同其他都正常   同埋有做運動   咁都好   最緊要郁嘛 ~

見完姑娘都走喇   又要等 10 分鐘小巴   里奧大人又成日打嚟問喺邊喺邊   問到我都煩哂   已經咳到我死死下啦   所以我直頭話唔好打比我   我唔想講嘢呀   佢 "哦" 咗一聲   但知佢反應係呆咗   因為我好少會咁話佢呢 ~

落到官塘又要等 10 分鐘小巴   差唔多 8 點半先番到九龍灣 ~

里奧大人話一定一定要食熱嘢   明明話食拉麵   最後都要食熱鍋 ~

食完就番屋企喇   都已經 9 點半   要快快沖涼喇 ~

又睇 1 集 "無心法師"   一到 11 點即瞓   好鬼凍呀 ~

臘味 + 菜心苗 + 齋滷味 (外賣) ( 25-JAN-2016 )

( 25-JAN-2016  MON )

仍然咁寒呀   包到實哂都覺得好寒呀 ~

早餐食餐蛋治   飽到上心口   食出前一丁麵餐都無咁飽 ~

菇場忙呀   仲諗住收爐之前都唔會忙添 ~

Lunch Time 都未餓   行到 1 點先買嘢食   咁 1 點 15 分先開餐   但其實都唔餓   食幾啖就算喇   剩番就打包今晚食   之後唔買嘢食啦 ~

仍然忙忙忙   一望個鐘原來已經 5 點 20 分   時間過得勁快 ~

放工即走   去 Taste 買菜   無諗過全部菜咁貴   我一入大堂   管理員問我啲菜係咪貴咗 3 倍   我話唔知喎   我只知道樣樣菜都 $20/斤囉 ~  

番到屋企浸完菜就拖地   難得天氣咁乾爽嘛   所以用清水拖地   之後諗住抖下   點知里奧大人 7 點打嚟話放工   我都要預備定喇   因為要蒸埋兩條粟米   我將粟米放喺生果格   估唔到塊葉都結冰   駛唔駛咁凍呀   哈哈 ~     

家姐打嚟話媽咪應該要買部氧氣機   因為媽咪慣咗血含量低嘅生活   咁其實唔好   所以覺得係聞住氣好啲喎 ~

是日懶餐 - 臘味 + 菜心苗 + 齋滷味 (外賣)  

臘味 - 懶呀   同埋咁凍天氣食臘味咁先有 Feel   哈哈 ~   

菜心苗 - 呢度 $20   勁貴   但想食菜囉   同埋唐生菜 3 棵仔要 $20   我買菜心苗好過 ~  

齋滷味 (外賣) - 想食酸嘢   又買嚟食下喇 ~

里奧大人一番到嚟就同我講話晴晴電話應該整唔番   之後再同我講話   姑奶話如果要番啲資料   間舖頭叫佢哋去 Apple 整啦   但要 $8,000 ~ $25,000 囉   但未必可以拎得番出嚟㗎   咁里奧大人咪話叫佢比晴晴大陸手機號碼比佢   問佢係咪所有資料都咁重要 ?!   一係比 Password 再幫佢 Link 下睇唔睇到   不過姑奶話唔好問晴晴喎   錢解決到問題就比錢   但我咪話囉   人哋話未必可以拎得番出嚟喎   都唔知晴晴 Daddy 同間舖頭講咗啲咩   居然比人索價到 $8,000 都制   但其實如果晴晴啲資料唔係緊要得咁犀利   可以問人拎番嘅   都唔需要比人整啦   咁點解唔比里奧大人問下呢 ?!   核心問題唔係錢呀   咁都唔明   之後我哋話唔好鬼理佢哋喇   佢哋錢多無計 ~   

今晚真係要開熱水洗碗喇   平時開熱水好快就有   今日等成 30 秒啲水先熱呀   凍得幾緊要呢 ~

搞掂哂就沖涼   食埋生果就睇無心法師   但天氣實在太凍   11 點唔夠就要瞓喇 ~

傷心酸辣粉 @ 官塘 ( 24-JAN-2016 )

夫妻肺片 / 口水雞  

傷心酸辣粉 (小辣) - 食唔哂呀   但真係已經盡力㗎喇      

( 24-JAN-2016  SUN )

今朝 7 點半起身   得 4 度咋   凍鬼到呢 ~

食完早餐就番早堂   番埋半堂主日學就走喇   約咗晴晴 Daddy 11 點入大埔整電話 ~

真係邪   之前里奧大人在我哋群組入面話星期一定星期日得幾度   我話要殺入新界區感受一下零求滋味   點知今日就要入大埔同將軍澳   仲要等車嘅時候又大風又落雨呢   嗚嗚 ~

但入到大埔又唔係好凍喎   可能無風同無雨啦   但啲風吹埋嚟   塊臉係赤赤痛呢 ~

入到大埔都只係 11 點幾   咁間舖頭 12 點先開   所以去食啲嘢先啦 ~

咁傾傾下傾開行山   姐夫問係興趣定係減卡路里   之後話食 Pizza 呢啲 Heavy 嘢   咁跑步半個鐘只係減到半碗飯卡路里   所以佢成日話節食緊要個做運動   呢點我真係絕對唔認同   做運動健康又唔駛錢   仲有機能係要郁家嘛   咁食當然都唔好放縱   咁大個人自己識節制家嘛   就算想食都唔會日日食 Pizza 糯米飯咩   妳估我哋係妳老婆呀   餐餐食同一樣嘢咩   真係唔知佢哋個腦諗咩   同埋我最憎佢哋話無時間做運動   時間係自己安排   唔好咁多藉口啦 ~

我同里奧大人 Share 食糯米飯   

姐夫食蘿蔔牛腩飯 

間舖頭 12 點幾一開   我哋即問兩個鐘頭內拎唔拎到   佢話 I-phone 入面好多 IC   唔係話一開就睇到   要逐 Part 逐 Part 咁睇   所以最快都半日   咁我哋等唔到   所以去另一間   佢哋都係話要擺低兩日   咁我哋再去另一間   佢肯即開機睇咩事   因為之前兩間都無開部機睇   佢話部機仲濕   起碼要個幾鐘頭先開得到   所以我地即放低比佢整   個幾鐘頭之後再搵佢啦 ~

唉   又個幾鐘   咁唯有去麥當勞買杯咖啡飲啦 ~

香橙朱古力咖啡   Mocha 本身已經係甜   加埋條橙餅   真係甜到爆   飲一次就夠了

之後我話如果電話拎唔到   咁依家買定部電話比晴晴先   始終有部手機方便啲   但佢話唔駛   佢哋一陣自己去買   我都唔明點解佢哋成日要最 Last Minute 先做   尋日已經嘥咗成日啦   真係對住佢哋好勞氣 ~

去番舖頭問情況啦   佢話個開關制仲未開到   最快要今晚或者聽日先知   咁無計啦   要擺低比師傅睇 ~

咁晴晴 Daddy 自己走先   我同里奧大人就行陣囉   不過真係行咗陣就走   商場太焗喇   同埋又係連鎖店   都無嘢好睇囉 ~

坐巴士出官塘   今日真係超級勁凍   帶帽帶披肩着厚褸着毛毛靴都覺得超勁凍   真係無時無刻都想食熱嘢   所以去食車仔麵   食完個身暖好多 ~

韭菜餃 + 豬皮 + 韭菜檬粉 (辣湯底)   果然夠辣   正呀 

牛腩 + 咖哩魚蛋 + 蘿蔔油麵 (辣湯底)   我咪話里奧大人囉   又話唔食牛   但一叫就叫牛腩  

5 點去到醫院   媽咪瞓覺   咁我哋都凍到瞓着咗   家姐 6 點 10 分到   但 6 點 40 分就走   咁我咃都走啦   媽咪反正都係瞓覺   我覺得我哋喺度真係無意義   完全係浪費時間   大佬   又凍   真係好想快啲番屋企囉 ~

等小巴先慘   啲風兜頭兜臉咁吹埋嚟   雖然着毛毛靴   但對腳都好鬼凍   連我咁怕熱嘅人都話凍就好凍啦   哈哈 ~

行到街市熟食中心   諗住去金蜜泰食泰菜   點知無開舖   咁即轉場去食其他   經過傷心酸辣粉   咁就入去食啦   食辣嘢   個身會暖啲   哈哈 ~

食完就坐小巴番屋企   之後即開暖風機   抖陣再沖涼   咁鬼凍去沖涼   次次掙扎一輪先入去沖呢   哈哈 ~

我凍到要着厚長褲   但啲腳指都仲係凍   所以將啲腳指向住暖風機啦   但都仲係凍喎   所以同里奧大人話 10 點半要瞓喇 ~

10 點都作眼瞓   點知晴晴 Daddy 打嚟話搭夜船去澳門   咁我地問咩事啦    佢話想第一時間到珠海海關   一開關就拎部電話比晴晴   佢話晴晴拎咗媽咪部電話去影相   但解像度只係 200 萬唔夠   起碼要 800萬   所以要拎 Daddy 部電話   我哋咪話叫晴晴問同事借咪得囉   佢又話唔好意思   之後我同里奧大人咪話晏晝買部電話比晴晴咪無事囉   點解每一樣嘢都要簡單複雜化 ?!

咁即幫佢睇下珠海過關時間啦   佢話坐澳門零晨 4 點船   之後再去珠海坐一個鐘頭的士去酒店    里奧大人咪話囉   依家近新年   去大陸比較危險   但佢堅持咁做都無辦法   只能叫佢小心啲啦   聽日又最凍添   都唔明點解成日將啲好簡單嘅事   搞到咁複雜 ~

我地最後都係成 11 點先瞓呀   呢排天氣咁凍   我覺得 11 點算係遲瞓添呀   哈哈 ~