吉豚屋吉列豬扒專門店 @ 九龍灣 ( 20-JAN-2016 )

張枱好細   所以食嘢要小心奕奕呢   唔係推跌啲嘢落地下就煩

( 20-JAN-2016  WED )

里奧大人今朝上大陸   鬧鐘響咗之後   我都瞓番 lu   天氣凍   加上又攰   真係好鬼好瞓   哈哈 ~

早餐食麵餐   因為晏晝食麥皮   但其實一個麵真係食唔哂   夾硬食哂   我一定脹胃   但好衰啦   今朝勁想食麵   如果食米粉就一定食得哂囉 ~

菇場唔太忙   可以做下自己嘢 ~

Lunch 食麥皮   用柯華田牛奶麥精一齊沖嚟食   又幾好味喎   無咁寡 ~

仍然 Hea 過   4 點又食個包   里奧大人食唔哂嘛   咁我食啦   估唔到個包有啲煙韌   同埋口感好實在   唔係咬陣風咁   唔知里奧大人喺邊度買呢   下次我去買嚟食先   哈哈 ~

放工去探媽咪   但 6 點 22 分先到   一到大堂收到婆婆電話   我心諗駛唔駛咁早呀   我一聽電話   佢話早啲打比我   我話我啱啱先到咋   真係好煩   打唔係問題   唔好係咁 Chur 住囉   已經每日打 2 次比工人   都知媽咪咩情況啦   真係一日要問一百次先得咁   個個答案都一樣㗎啦   真係好煩 ~

去到見到媽咪張枱無嘢   原來家姐煲咗湯比佢飲   所以佢咪改晏晝咪食淨魚蛋囉   發神經   工人好委屈同我講   但我想話一早叫妳唔好買   妳又買   我都費事理 ~

今晚見到姑娘   所以即問媽咪咩情況   話肺片無事   但安排星期五照腎   咁就好啦   唔駛之後又要再嚟照   感恩 ~   

家姐明明話今晚唔嚟   7 點無啦啦見佢到   佢拎咗包齋燒鵝出嚟   問我食唔食 ?!   我話唔食啦   之後佢問媽咪食唔食 ?!   慶鬼到我呢   之後佢唔比   但最後又比粒媽咪   我黑哂面唔彩佢哋呀   咁媽咪明知我唔比佢食   佢都照食   家姐之後仲比多粒佢添   我覺得媽咪呢下勁得我憎   所以我話下星期先探佢   同埋我當住家姐同媽咪面前講   如果真係要洗腎   叫姑娘唔好通知我   我唔會去聽   佢話叫工人聽   我話醫院話明唔會叫工人聽   因為工人唔係同妳打一世工 ~

我真係比佢哋激死   我當下想喊   同埋個心口好痛   我真係要即 Whatsapp 阿 mi   如果唔係我會顛   我覺得咩事呀?!   佢哋 3 個白痴可能覺得我對佢哋好衰   但唔食係咪會死呀 ?!   食唔係問題   唔係食啲咁嘅嘢啦   依家腎唔好呀   點解仲要比個腎差落去呢   3 條友正一白痴   我同里奧大人講呀   我咁話佢哋   把口係好衰㗎   但真係覺得佢哋比白痴更白痴 ~

咁 7 點 40 分都走喇   我話走就走   望都唔望媽咪   仍都無同媽咪祈禱同講拜拜 ~

之後家姐同工人行我後面   我聽到家姐同工人細細聲講嘢   平時多數我同家姐行   但今晚我好嬲   我一路行一路 Whatsapp   之後家姐話我後面個人跟住我行   但唔知行左定右好   我話我直行㗎喎   又唔係左搖右擺   佢唔行前關我咩事 ~

今晚我都無同工人講拜拜   睇見佢哋都憎 ~

咁里奧大人 8 點都番到九龍灣   所以叫佢諗食咩   佢話食熱嘢   咁去吉豚屋啦   懶得諗 ~

我食食下嘢話聽晚唔探媽咪   但佢居然問我發生咩嘢事   平時佢只會話好吖   抖下都好家嘛   咁我咪話番頭先齋燒鵝件事囉   里奧大人都話媽咪唔食係無 Lost   點解家姐係都要比佢食   話家姐推媽咪落懸崖   媽咪有事   佢都係滿手鮮血 ~

咁我都決定唔會探媽咪住   良心當狗肺   唔珍惜就罷就   我無理由次次探完   我都激到心口痛   夜晚瞓唔着家嘛   所以阿 mi 同里奧大人都話我唔應該探媽咪   佢哋為我身體着想   反而媽咪唔會理我感受   所以我都唔會探   同埋佢都係瞓之嘛   根本個個最攰   得佢最精神   我自己抖下好過 ~

今晚一定要去萬寧買埋念慈奄呀   因為屋企居然無哂   衰里奧大人啦   飲完又唔講   但好感恩萬寧做特價 $41.9/樽   買 2 樽再 88 折   咁今日 Enjoy 卡有 95折   折上折之後只係 $35/樽   咁就好抵喇   呵呵 ~

番到屋企即開機洗衫   之後沖涼   再睇 "無心法師"   差唔多 12 點先瞓呀 ~