譚仔雲南米線 @ 牛頭角 ( 13-JAN-2016 )

( 13-JAN-2016  WED )

今朝都凍凍哋   但又唔係好凍嗰隻   咁又唔錯喎   呵呵 ~

早餐食熱狗餐   諗住聽下歌   點知 8 卦又嚟咗一齊食 ~

菇場忙下呀   之後停下又再忙 ~

今日有 Lunch Box   食完就出去行下   之後去惠康   因為今日有 93 折呀   所以買利口樂糖比家姐同自己   再買多排朱古力比工人就番菇場喇 ~

原價 $15.9/罐   折咗係 $14.8/罐   原來平一蚊都唔夠   哈哈   不過好過無啦

仍然忙爆   好在放工前都做得哂 ~

家姐話想去 Panash 杏仁條同藍莓酥   咁我話放工買比佢   但我完全唔記得今晚要去拎中藥   好在手機有落 Reminder 咋   唔係就慘 ~

買完杏仁條即坐巴士去拎藥   之後打的去醫院   去到啱啱 6 點 ~

見到媽咪有啲攰   咁我都預咗佢攰   成日唔鬼郁   唔攰先奇   同埋又見到盒燒排骨   我忍住唔話佢住 ~

之後同我講話唔駛覆診   我話咩唔駛覆診係內科定腎科先得㗎 ?!   其實又覺得佢係會記住我講嘅嘢    因為我成日要佢記得問姑娘啲覆診時間   佢係有問   但唔清唔楚   我話唔該妳人哋講咩   妳都要思考下人哋講咩   唔係人講完   妳又講番比我聽先得嘛 ~

好感恩又見到姑娘   佢話今日媽咪照咗肺片   仍然有啲花   始終抗生素唔會咁快殺死哂啲菌   咁今日諗住除貓鬚   但一除就有啲喘   所以可能會調去靈實   咁我話無問題   最緊要安全就得㗎喇   哈 ~

我同媽咪講話遲啲調去靈實   佢話唔制   我話妳咪咁麻煩   一陣出院兩日又入番院   妳係搞到我哋咋   到時咪駛旨意嚟睇妳呀   真係火都嚟 ~

之後同佢講好心咪成燒排骨啦   咁鬼鹹   佢話食一嚿   咁咪嘥囉   好在家姐嚟啫   唔係邊個食呀 ?!   工人唔食豬   係咪又要拎番盒燒排骨番屋企   聽日又再拎番比妳食呀 ?!

佢之後都全程合埋眼唔理我   我都費 Q 事理佢   唔係家姐今晚嚟   我 7 點即走   反正我坐喺度都無用 ~

心情唔好   無聽婆婆電話   佢都連打 3 次嚟   咁我聽啦   又係嗰 5 句說話   又要 Repeat 兩次   媽咪好啲未 ?! 未   唔駛擔心   媽咪未出院㗎可 ?! 未   家姐有無嚟 ?! 有   家姐唔舒服呀可 ?!   係   媽咪無嘢呀可 ?! 無   唔駛擔心   媽咪未出得院㗎可 ?!  未 ~

問完又問   講完又講   之後佢又會打比家姐問同一樣嘢   只不過將問佢嘅嘢   變咗係問我有無探媽咪咁囉 ~

咁家姐食利口樂糖   媽咪又話食   咁無問題   其實我都預咗比佢食   但我特登話唔好食咁多   佢仍都特登話食 2 粒   咁我都 OK 嘅   知佢衰嘛   估唔到真係咁衰格 ~

8 點唔夠我話走   家姐個樣呆一呆   因為我好少主動話未夠鐘就走   媽咪臨走叫工人聽日整洋蔥炒蛋   又要再買淨魚蛋   家姐都話妳係咪以為自己住酒店   好心妳咪食咁多出邊嘢啦   喺醫院住到塊臉都圓埋   又唔郁  起碼肥 5 磅   家姐話要買嘢食   妳自己比錢工人先得㗎   媽咪好得閒咁叫家姐比   我咪慶囉   話好心妳個人啦   出嚟做嘢好辛苦   家姐唔舒服都番工啦   妳個人真係好唔掂 ~

咁里奧大人已經喺屋企等我   我想食麻辣豬耳   所以要去譚仔呀 ~

同里奧大人講番頭先啲嘢   越講越激氣   我話比雷劈都要鬧媽咪呀   佢話唔好激氣   反正佢做嘅嘢唔會理人   只顧自己   嬲嚟做咩   我話 Up to now 仲未做到唔上心   但次次見到佢   我嘅包容度會由 100% 變咗 - 240 %   我會即時死哂啲細胞   尋晚知道媽咪肺花咗   我瞓得勁差   家姐問我點解成日瞓得差   我都唔想講咁多 ~

之後我同里奧大人講話好感恩   呢兩晚約咗朋友食飯   唔駛探媽咪   平時如果媽咪入院   我唔會約朋友食飯㗎   但今次整定要我冷靜下   希望媽咪以為我嬲   所以唔探佢   因為我只係就咁講話之後兩晚唔探佢呢   真係唔想同佢講多句嘢 ~

食完行陣商場就番屋企喇   食埋個橙就沖涼   之後睇多陣電視   11 點唔夠就瞓 lu ~