金滿庭京川滬菜館 @ 九龍灣 ( 23-JAN-2016 )

呢碟炸魚仔花生好好味呀   但就油咗啲   如果唔係就更加好味   哈哈  

小籠包 X 4 ($58/籠) - 都幾多肉汁   唔錯喎      

和尚戴帽 X 2 ($86/碟) - 我無食呀   但睇樣好似係韓國粉絲

叉子燒餅 X 2 ($88/碟)

松子魚 X 2 ($168/碟) - 佢哋話五柳魚好味   我真係一啲都唔覺好味   茄汁茨又甜   得啲雜豆之嘛   都無五柳絲

回鍋肉 X 2 ($78/碟) - 我完全覺得呢碟無咗嘅部份   分咗比隔離枱   因為我地樣樣都 X 2   其實上次啲份量係加雙添   但都唔覺得多咗   感覺係有呃人成份      

招牌燻魚 X 2 ($68/碟)

鍋塔豆腐 X 2 ($75/碟)

咕嚕肉 X 2 ($86/碟) - 一碟得 8 粒排骨   講緊係 $86/碟喎   係咪佢哋將一碟份量分咗 2 碟呀 ?!

龍蝦湯時菜 X 2 ($78/碟)

火腿炆津白 X 2 ($85/碟)

八寶辣醬 X 2 ($78/碟)

片皮鴨二食 X 2 ($360/隻 )

加 $55 就多碟鴨鬆

上海粗炒 X 2 ($78/碟)

楊洲炒飯 X 2 ($88/碟)

( 23-JAN-2016  SAT )

開始越嚟越凍咁喇   聽日好似得 5 度添咋   單位數好恐怖   哈哈 ~

早餐食飽啲   同埋依家天氣咁凍   真係好快肚餓   最慘呢排成日落雨   想徑步都唔得   依家真係行路都行得慢啲咁   因為太耐無郁喇 ~

菇場忙咗陣   之後勁鬼眼瞓   好小星期六會咁   唔通無飲咖啡 ?!

放工去街市買蕃茄薯仔排骨   諗住一陣滾湯比里奧大人飲   無老火湯都要有啖滾湯飲下   哈哈 ~

番到屋企都 1 點 45 分   我一入屋   里奧大人就話正想打比我   因為平時 1 點 15 分左右已經番到屋企嘛   我話去街市買嘢嘛   妳估屋企樓下就係街市咩 ~

因為媽咪工人去 Fat Fat 屋企拎嘢比我   我又要等埋佢先出門口   咁打比佢   佢話喺 Fat Fat 度番緊嚟   好在家姐話我知佢應該係去緊 Fat Fat 屋企   我再打番比工人   佢話仲未去到 Fat Fat 屋企   唉   究竟佢知唔知我問咩㗎 ~

諗住出門口   點知姑奶打嚟話晴晴部電話放咗落洗衣機度洗   里奧大人問佢洗咗幾耐   佢話一陣   咁里奧大人咪叫佢即刻去搵人整囉   打比佢都無用   唉   咁小事都唔識處理 ~

勁餓呀   又凍   所以一定要食熱嘢   去到譚仔居然要等 10 張飛   所以里奧大人去得寶睇下有無位   估唔到有位   即轉場呀 ~

一坐低   里奧大人比塊糖蔥餅比我食   驚得餓暈喎   但其實我真係超級勁肚餓呢   成 3 點先食 Lunch 呀   依家天氣凍   真係唔可以無嘢落肚   哈哈 ~

$12/塊   我覺得貴㗎   不過里奧大人話見個人係咁 Sell   又話少甜   所以里奧大人買塊囉   佢問我幾錢   我話係咪 $7 ?!   我話年宵好似 $11/2 塊添呀  哈哈   之後佢又再叫我估   麻鬼煩   我叫佢自己講啦   食緊嘢唔好煩住哂嘛

我嘅重慶酸辣粉 ($23) - 肉碎 / 花生 / 炸菜 / 蔥花 + 紅薯粉   但超級細碗   我只係見到湯   所以唔影 lu 

里奧大人嘅大大碗麻辣燙 ($38) - 魚蛋 / 豬皮 / 時菜 / 魚皮餃 / 牛腩 / 蘿蔔 / 豬紅 / 墨魚丸 + 米線   都幾好味   可能餓呀   哈哈 

口水雞翼 ($28) - 好惹味   好多蒜蓉   下次買盒番屋企食先   咁可以唔駛嘥哂啲辣汁

煎釀三寶 ($20/9件) - 我果碗碌辣粉細碗到呢   所以我話要再買三寶食呀   不過麻麻哋   炸到好乾呀   其實唔知係咪我要再炸呢   因為佢問我要唔要再炸   我話要呀   因為想熱辣辣囉  

食完又覺得好鬼飽   所以行陣先番屋企   哈哈 ~

番到屋企差唔多 4 點   之後工人話已經到九龍灣   咁我地又落去拎嘢喇 ~ 

終於可以抖下   開完機洗衫   之後一坐喺梳化已經好眼瞓好眼瞓   呢排唔知點解   一食飽就想瞓   所以我同里奧大人講完話眼瞓之後都瞓着咗呀   瞓到 5 點先醒 ~

問里奧大人飲唔飲湯   佢話飲   咁我就即去滾蕃茄薯仔湯喇 ~

豬肉婆教我用合桃骨滾湯   好耐好耐之前都買過類似呢啲骨   但真係唔記得係咩名   估唔到今次遇番佢   好開心呀

飲完湯抖到 7 點 45 分就出發去金滿庭喇   雖然 Book 咗 8 點半   但大埔友話聽朝好早起身   所以想快啲點定菜   其實最驚係咁   食餐飯好似好趕咁 ~

明明話晴晴多嘢做唔嚟   點知又見到佢   佢黑哂臉啦   拎部電話同叉電器輕輕力掉喺枱   同 Daddy 講依家咩都開唔到呀   其實都唔關佢 Daddy 事   同埋真係妳自己唔啱在先   點解唔將衫褲入面啲嘢拎出來 ?!   依家有事就話 Daddy 媽咪先 ~

不過佢媽咪又係有問題   點解唔即時去搵人整   始終 I-Phone 好煩   唔係好似其他手機咁可以拎嚿電出嚟家嘛   搵咗一間唔整就唔去搵另一間   擺喺度就算   大佬   比水浸住㗎   越遲整就煩啦   氧化哂就咩都整唔到啦   唉 ~

佢尋晚做嘢做到零晨 4 點先番到屋企   之後佢同媽咪講話要洗哂啲衫褲   咁洗咗 10 分鐘左右   晴晴就打嚟問部電話喺邊   所以姑奶即停機啦   佢話摸過哂條褲   細細支嘢都摸到   但唯獨部電話就摸唔到   整定 ~

食食下飯   晴晴走咗出去   2 姑奶同里奧大人講啦   因為我哋係背住晴晴家嘛   里奧大人即去搵佢啦   晴晴正想入 Lift   里奧大人即揚手叫佢番嚟呀   好在佢聽父父話咋   之後父父問佢咩事   佢即喊啦   公司嘢可以星期一比番公司   但學校 Club 嘅嘢要今晚比   所以好擔心   之後我都出埋去啦   攬下佢都好   2 姑奶老公又出埋嚟   一出嚟又攬實晴晴   幾咁 Warm 呀  哈哈   其實處理晴晴情緒都好緊要啦   佢仲細家嘛   雖然佢係唔啱㗎喇   但妳又要諗番自己平時身教係點先 ?!   佢係一張白紙嚟咋   妳係佢塊鏡   妳點做佢咪點做囉   成日話晴晴咁咁咁   晴晴真係好慘 ~

好啦   比佢喊完就無咁緊張   之後我要佢陪我食飯呀   話之後一別又要 4 年   舅母好難得見到妳架   點都要陪舅母呀 ~

一入到去   個個靜哂   因為個個都為佢擔心   所以即安慰晴晴   即刻諗邊度有得整電話   佢哋話大埔有間好好   咁我同里奧大人聽朝殺入大埔啦   叫晴晴放心   父父舅母實幫妳解決   但其實全部人都心裡有數   係整唔到   因為浸得太耐喇   同埋原來聽日晴晴要上大陸一星期   如果今日整   聽日都有機會拎   但聽日先拎去整喎   仲要得 2 個鐘   點得咁快喎   I-Phone 好煩嘛 ~

諗住聽朝同晴晴食埋早餐就去大埔   其實預咗手機 Total Lost   但最緊要係拎番哂啲資料出嚟啫   所以晴晴同我哋一齊入去最好   因為我哋都唔知有啲咩資料係要 Back Up   一陣有啲嘢係要 Password   我哋又入唔到佢先煩嘛   但佢媽咪話晴晴要執嘢   唔好入大埔   我同里奧大人都話是鬼但啦   到時人哋問我地嘢   搵唔到妳哋   我哋唔會理㗎 ~

終於差唔多 10 點半先走   番到屋企即沖涼休息   不過都 12 點先瞓 ~

姑奶幫我買嘅 Aloe 潤唇膏同 Cream