魚片炒銀針粉 + 芫茜皮蛋魚片湯 ( 21-JAN-2016 )

( 21-JAN-2016  THU )

今朝唔係覺得好凍   唔知係咪適應咗啲天氣呢 ~

早餐食芝腿治   食完睇陣報紙又要番工 lu ~

菇場唔忙   可以抖下   衰啦   尋晚十二點先瞓   今日真係有啲攰   哈哈 ~

Lunch Time 出去食粥再去入票   之後家姐打嚟話媽咪轉靈實   但媽咪話唔轉   要番屋企喎   因為無電視睇   都黐黐哋線   平時夜晚我探佢   佢都瞓啦   睇咩電視呀   越諗越激氣   之後頭又痛胃又痛   真係覺得佢好煩   我已經諗好咗   如果佢堅持出院   我唔會話佢   幫佢分完藥就走人   咪駛旨意同佢食飯 ~

好嘢   菇場唔忙   可以寫遊記 Blog   依家無記性   太耐好多嘢都唔記得   慘 ~

放工走喇   去街市買餸   好耐無去買餸咁喇   不過唔會話好掛住街市咁囉   又濕又 Dirty   但街市啲嘢就集中囉   同埋好多自家種嘅嘢   但實在太迫啦   所以我都無心機睇   買完即走架 ~

番到屋企預備好哂所有嘢就拖地   大大力拖   好似做完運動咁 ~

里奧大人 6 點 45 分放工   即刻烚兩條粟米先   唔係一陣無爐用呀   之後我繼續拖呀拖   拖多 20 分鐘就預備煮嘢喇 ~

是日懶餐 - 魚片炒銀針粉 + 芫茜皮蛋魚片湯  

魚片炒銀針粉 - 本來諗住炒麵   但諗到要煮熟又再炒好煩   所以煮銀針粉 ~

芫茜皮蛋魚片湯 - 我喉嚨仲有啲唔舒服   所以煲呢個下火湯飲下   估唔到今次好味   仲諗住咁清無味添   定落咗鹽   所以好飲呢 ?!

洗埋碗之後即抹書房同鞋櫃   再抹埋地櫃   里奧大人叫我做多 30 分鐘就唔好再做   因為佢知道   如果我周身骨痛   佢都唔會好過   哈哈 ~

沖埋涼就抖喇   唔好講笑   條腰真係堅攰   可以太耐無郁喇 ~

今晚 11 點幾都瞓喇   天氣凍   真係好快眼瞓呢 ~