KFC + 出前一丁 ( 17-JAN-2016 )

( 17-JAN-2016  SUN )

今朝 7 點半起身呀   食完早餐就番屋企沖涼   之後番崇拜同主日學呢 ~

約咗 2 姑奶同 3 姑奶兩公婆 12 點飲茶   但我哋 11 點 45 分已經到   我都未坐低就叫我 Click 點心   話入單   我仲以為特價點心啦   原來係想 12 點前埋單   又唔講清楚   真係好怕咁樣   心心急急囉   同埋可以一早 Whatsapp 張點心紙比我哋睇嘛   咁簡單都唔識 ~

一坐低見到呢碟尖椒就覺得恐怖   姑奶佢哋又唔食隻尖椒   話又肥又油喎 (勁想問咁叫釀青椒嚟做咩呢 ?!)   我見到佢同老公隻碟都起碼有 5 - 6 隻青椒   之後 2 姐夫話本來有兩碟㗎   已經食咗一碟   咁咪即係有 20 隻 ?!   真係好恐怖   成日食死一樣嘢   真係好無意思囉   又驚肥   只係食鯪魚肉   咁妳不如自己買一百蚊鯪魚肉番屋企煎嚟食好過啦

居然叫叉燒   真係睇見都飽 

又叫小菜   呢碟根本只係食咗兩粒牛柳   又要成碟拎走   之後姐夫話放喺雪櫃之後   60% 係掉   咁唔叫好過啦   同埋都係嗰句   飲中午茶唔係食小菜   係食點心囉   

但呢碟欖菜骨又幾好味喎   炸過嘅豬扒   有啲欖菜又有啲蜜糖咁甜甜哋   下次試下整先

飲到差唔多 1 點幾就走喇   之後同 3 姑奶兩公婆一齊行去 mega BOX   佢哋買衫   咁我哋都睇下啦   里奧大人終於喺 KSWISS 買到件厚身外套   $199 咋   我發覺呢年嘅外套同褸係超級勁抵囉   但褸真係無可能買咁多家嘛   如果唔係我實買呀 ~

佢哋走咗之後   我同里奧大人再周圍行下   我覺得越行越眼瞓囉   因為商場好焗   諗住坐 Shuttle Bus 走人   但等咗 10 分鐘都仲未有車   又勁焗喎   所以都係行番屋企算喇 ~

家姐打嚟話比啲曲奇餅我   咁約佢食下午茶啦   我哋 4 點半到咗大快活   估唔到佢 10 分鐘後就嚟埋   咁都好   唔駛等咁耐 ~

食完上我屋企分曲奇   叫佢唔好分㗎啦   我食 2 塊之嘛   之後又係都分埋咖啡脆糖比我   但其實我依家真係好少食零食   同埋我一陣擺得太好   又唔記得食就嘥哂囉   不過佢點都要比我   因為佢覺得好好味呢   哈哈 ~

一齊搭巴士去探媽咪   媽咪又食魚蛋麵   今次到家姐話佢喇   話次次見親都係食魚蛋麵   唔好咁過份吖嘛   又唔郁 (平時呢啲係我鬧家嘛   估唔到今次家姐忍唔住話媽咪   抵比人鬧)   之後我咪話囉   依家係唔駛洗腎住   唔係代表唔駛洗腎   妳咁食法又唔郁   根本排唔到毒   咪以為無事   佢又話自己無肥到   我話仲衰啦   塊臉係腫咁   衰過肥呀   又唔郁   懶到出汁   同埋唔好成日話攰   攰係因為妳自己唔郁囉   大佬   我哋頻頻樸樸仲攰啦 ~
   
咁家姐 6 點 45 分要走喇   媽咪話祈禱   咁里奧大人叫家姐祈禱   感恩家姐都願意開口祈禱呢   祈完禱之後   工人喊呀   佢好開心家姐肯開口祈禱呀   希望家姐同媽咪都早日信主啦 ~

我同里奧大人都 7 點 45 分要走喇   要番屋企煮嘢食   唔想咁遲食 ~

番到屋企即開機洗衫   之後開爐焗嘢喇   估唔到咁都要半個鐘   再煮埋個麵   8 點 45 分先開餐   原來都要咁晏食   哈哈 ~

食完洗埋碗就即沖涼   今晚要睇 "無心法師" 大結局呀   其實我加加埋埋睇咗 1 集都無   但間唔中睇下   又幾好睇咁   所以今晚決定要睇大結局喇   好鬼感人囉 ~

要比自己冷靜下   所以 11 點半先瞓呢 ~