茄汁蝦碌 + 蒜蓉辣椒炒油麥菜 + 蕃茄薯仔瘦肉湯 ( 12-JAN-2016 )

( 12-JAN-2016  TUE )

今朝無咁凍咁噃   但都要着厚衫呢 ~

早餐食腿治   食完睇陣報紙就番工喇   我鍾意睇免費報紙   因為細細份   同埋我睇新聞只睇標題同最尾   因為份份報紙講嘅嘢都唔同   知道發生咩事就算喇 ~      

菇場唔太忙   諗住做自己嘢   點知又嚟忙 ~

Lunch Time 即去睇中醫   醫師話我好唔夠氣同埋個人好濕   但血壓就好靚仔呢~

拿拿聲食埋就番菇場   諗住抖下都唔得添   忙到爆炸 ~ 

放工去拎中藥   買埋餸就即番屋企   預備好哂就拖地   里奧大人 7 點放工   咁我又要即煮飯喇 ~

是日晚餐 - 茄汁蝦碌 + 蒜蓉辣椒炒油麥菜 + 蕃茄薯仔瘦肉湯 

茄汁蝦碌 - 勁想食好耐   所以又自己整啦   買咗 $40/半斤海蝦   但霉嘅   定係我煮得過火呢   唉 ~  

蒜蓉辣椒炒油麥菜 - 真係唔想齋炒油麥菜咁悶   所以加埋蒜蓉辣椒豆豉   再加埋滾湯啲瘦肉一齊炒   咁唔駛嘥咗啲瘦肉   同埋我可以帶飯   呵呵 ~ 

蕃茄薯仔瘦肉湯 - 呢個湯又簡單又方便又有益   一定要滾比里奧大人飲呢   我之前唔舒服   里奧大人自己淥麵食   咁我望到個煲入面有層白色嘢   成日以為係燈光問題   但原來係里奧大人無用心洗個煲囉   所以真係好怕佢用廚房啲嘢呢 ~

食完飯就開機洗衫   我發覺屋企好似有九千樣嘢未做咁   所以成日心掛掛   但我得一對手   又信唔過里奧大人   所以今晚只係大清潔廁所先   再得閒就大清潔埋廚房   咁過年前應該乾乾淨淨   可以見得下人咁呢   哈哈 ~

好喇   搞掂哂就沖涼   條腰骨痛到呢   又頭暈暈咁   唔知係咪太耐無做家務呢 ~

之前媽咪喺佳寶買咗啲葉橙   好鬼甜呀   仲要係 $20/5 個   所以工人幫我買   實在好耐無食甜橙   但我唔拻得橙㗎   次次拻完都爆手指   所以呢個就係里奧大人報恩嘅時候喇   哈哈 ~

個人呆呆哋   不過都睇埋 "肥媽暖 DD" 先瞓覺   因為我好鍾意睇飲食節目呢 ~