豉油雞 (外賣) + 南瓜蕃茄薯仔粟米枝竹湯 ( 10-MAY-2016 )

( 10-MAY-2016  TUE )

我覺得尋晚係瞓下醒下咁   但又唔敢郁   唔敢起身睇幾點   之後工人電話響   其實當時我哋都唔敢起身住   驚仲未過 5 點嘛   同埋我話我教咗 7 點起身   所以即係未夠鐘起身   之後家姐醒咗   望下個電話原來已經 7 點 10 分   家姐話點解我嘅手機唔響嘅   咁我睇啦   原來教咗夜晚 7 點   真係好在家姐起咗身咋 ~

媽咪無郁過啲嘢食喎   但家姐話感覺媽咪係咁摸佢隻腳   摸咗好耐   之後就喺佢隔離行去我嗰邊   家姐話感覺到有幾下壓住   話媽咪可能望我或者工人   但我尋晚都感覺到 2 次張被有小小嘢壓住   但我無為意   以為家姐郁咋   咁家姐話今朝腳痺   話媽咪好大力按佢   但媽咪無摸我喎   應該好憎我定 lu ~

個天黑哂呀   但好奇怪尋晚我見到有光 ~

起身刷牙去食早餐   家姐又話好耐無一齊食早餐   但其實以前一齊食早餐係有埋媽咪家嘛   所以其實佢咁講   我好想喊   但唔可以喊 ~

個人好攰   都唔知自己做緊乜   咁我去坐低先   行行下聽到 Cashier 話未找錢   原來係我未找錢   真係完全唔記得找錢呢回事呀 ~

我覺得家姐其實知我唔開心   因為平時我好多嘢講   呢排都靜靜哋   之後佢話好想拻我塊臉   可能啖啖肉   因為佢成日都拻我塊臉   希望快啲減肥成功啦 ~ 

送埋家姐搭巴士   感恩去到即有車   之後我番媽咪屋企沖涼   搞掂哂就番工喇 ~

菇場唔忙   但超勁攰囉 ~

Lunch Time 出去行咗陣   之後買埋嘢食就番菇場 lu ~   

無啦啦又忙   最慘唔在狀態   所以做咗個幾鐘先搞掂   我唔想做錯呀 ~

放工即走   買埋豉油雞就番屋企喇 ~   

依家自己喺屋企   坐坐下就會好自然諗起媽咪同 Fat Fat   之後又會喊   但又唔想出街   都唔知想點咁   呢排又手震   唔係抑鬱呀嘛   唉   快啲搞掂哂媽咪同 Fat Fat 啲嘢   我都應該要去轉旅行散散心㗎喇 ~

正想問里奧大人幾點放工   但都係唔阻住佢喇   之後佢 7 點 15 分打嚟話喺九龍塘   嚇到我呢   因為啲湯仲未滾好嘛 ~

是日懶餐 - 豉油雞 ( 外賣 ) + 南瓜蕃茄薯仔粟米枝竹湯  

豉油雞 ( 外賣 ) - 買咗半隻   只係 $45   里奧大人話見到啲雞有血   話新鮮雞   我話妳就想喇    $45 有新鮮雞   如果真係新鮮雞   呢個價錢只係買到 1/4 隻咋 ~

南瓜蕃茄薯仔粟米枝竹湯 - 本來諗住星期日煲   但無時間   所以今晚先煲   原來要煲 45 分鐘   之後加埋枝竹再煲 45 分鐘   我仲以為滾湯添   不過我都係煲咗 1 個鐘左右咋   不過都好好味喎   下次會再煲過   最正係素湯   同埋啲湯渣當一餐都夠飽添喇 ~ 

搞掂哂就沖涼   之後就一齊睇電視   佢又話好想拻我塊臉呀   我話家姐今朝又係要拻   好在妳哋見到我塊臉   唔係話想兜巴星我咋   哈哈 ~   

今晚 10 點半瞓喇   好攰呢 ~