金菇豚肉卷 + 金銀蛋紅莧菜 + 芫茜皮蛋魚片湯 ( 19-MAY-2016 )

好怕影扁撻撻嘅食物   加上賣相又衰   所以影得更加衰   哈哈

之後倒哂出嚟影   賣相仍然係衰   但感覺好似一碟啲豐富啲咁

( 19-MAY-2016  THU )

又瞓得唔好   點搞呀   嗚嗚 ~

早餐食芝蛋治   食埋呢次真係要停一停   因為真係好鬼滯呀 ~  

菇場忙下停下   咁順便 Pack 下箱   搞掂哂之前嗰啲   個心真係舒服好多   唔駛成日記住   哈哈 ~

Lunch Time 出去行半個鐘   之後買燒賣粉果番菇場食   其實唔餓   但想食啲濕濕哋嘅嘢 ~

Admin 同事話西瓜話公司會送花牌比媽咪   之後我比資料 Admin 同事   再問佢: 妳唔會同其他同事講㗎可 ?!   之後佢問我係咪唔想 ?!   我話係   佢話原來西瓜想叫全公司一齊夾帛金比我   我話有心喇   花牌已經足夠   西瓜嘅心意係好   但我覺得呢啲係我私人嘢   唔應該未問過我就周圍講囉   好記得第一日番工   已經有其他部門知我住邊   大佬   資料係 Confidential 家嘛   點會有其他同事知㗎   之後我同阿頭講搬屋   阿爽問我搬去邊座   我其實覺得好反感   講咗出嚟唔夠 1 個鐘就係人都知   所以我喺菇場好少講嘢   我覺得係對自己最安全呢 ~

里奧大人 2 點幾上大陸見客   起碼 7 點幾先番到屋企   仲諗住會早啲添 ~

放工即走   今晚浸菜浸芫茜   所以要用多半個鐘頭預備   諗住快手煮完就沖涼   點知里奧大人話 7 點半番到嚟   望下個鐘原來都 7 點 15 分   咁唔沖涼住喇   等埋一齊食啦 ~

是日晚餐 - 金菇豚肉卷 + 金銀蛋紅莧菜 + 芫茜皮蛋魚片湯

金菇豚肉卷 - 醃咗一晚嘅豚肉原來係好難包嘅   唔知點解會散開哂咁囉   咁里奧大人成日話金菇難消化   但金菇都有益嘛   所以都想佢食   我唯有灼熟咗先   唔係佢會話啲金菇係唔熟   因為咬唔開喎 ~       

金銀蛋紅莧菜 - $10/斤   唔知貴定平   但因為唔係成日有得買   所以就買嚟食   冰姑成日叫我買嚟食㗎    話對我有益喎 ~    

芫茜皮蛋魚片湯 - 里奧大人個咀生瘡   所以一定要滾個下火湯佢飲呢 ~

我洗碗嘅時候   里奧大人就去買芒白黑喇   因為尋晚想食   但實在太飽   所以無食到   咁里奧大人頭先已經 Line 我話要買㗎喇   我問佢點解係都要買   佢話覺得我尋晚想食但食唔到   所以今晚一定要買番比我食呢 ~

我叫里奧大人唔好加一份芒果   $8 得兩嚿仔唔抵嘛   所以我尋晚買咗 4 個芒果番嚟   都係廿蚊咋   右邊嘅芒果係我買㗎   靚過滿記喎   哈哈    

食到好飽呀   下次都係買一份算喇   因為食完之後個胃有啲唔舒服咁   哈哈 ~

今晚又睇 Minions   其實之前已經睇咗 2 次   覺得幾好笑   所以今晚又睇   唔想屋企咁靜呀 ~

11 點幾瞓   希望瞓得好啦 ~