節瓜支竹燜腩排 ( 12-MAY-2016 )

( 12-MAY-2016  THU )

又星期四喇   依家最唔鍾意星期三同星期四   我好想自己快啲復原   時間係可以沖淡一切   但呢個時間唔知要幾耐呢 ?!

今朝先諗起加拿大嬸嬸   佢寄咗張支票比我地   我想問堂妹   嬸嬸有無 Whatsapp   因為我只得佢哋屋企電話   點知今朝嬸嬸就 Whatsapp 我   實在太好喇   始終有時差   我番工佢瞓覺   如果有 Whatsapp 就好好多   起碼唔會嘈醒人嘛 ~

早餐食芝蛋治   其實食咩都無味   旨在飽肚   依家食朱古力都唔覺得甜   好似無哂味蕾咁 ~

菇場唔太忙   所有大粒又唔喺度   可以 Hea 下 ~

Lunch Time 食麥皮   唔想成日坐呀   食完出去行個圈   難得幾好天嘛 ~

放工去 Taste 買餸   順便幫里奧大人買包做早餐   買完都番屋企 lu ~

真係好搞嘢   今晚表表問候我   好多時係咁   會同一時間咁問   好多人都問我心情點   我都實不相暪話仍然難過   雖然我唔想人哋擔心   但我心情真係唔係 OK 囉   依家我仲係覺得自己好賤格   成日鬧媽咪   明知媽咪身體唔好   應該鼓勵支持家嘛   點解我只係鬧鬧鬧咁衰格   我依家情緒已經跌落到最低點   要不是有里奧大人同家姐   我真係覺得生存係無意義呢   不過我都間唔中同里奧大人講   如果我有咩事   記得記得幫我照顧家姐呀 ~      

喊完抖陣又去煮嘢   之後再開機洗衫   今晚里奧大人夜放工   咁我都食先喇 ~   

里奧大人 8 點 45 分先番到屋企   煮埋個麵比佢食   我就熨衫 lu ~

是日懶餐 - 節瓜支竹燜腩排  

節瓜支竹燜腩排 - 清埋哂啲支竹同節瓜   咁買咗腩排   估唔到肉質好腍   咁下次同去 Taste 買喇   反正同街市差唔多錢   咁我唔駛行咁遠 lu ~   

搞掂哂就睇 "太陽的後裔"   慘到吖   喊到我呢   之後再等唔切   睇埋大結局   好在 Happy Ending 同埋有幾多笑位   個人又開心番咗啲咁呢   望完靚樣靚 Body   我叫里奧大人今晚要擰轉臉瞓呀下   哈哈 ~     

11 點幾瞓覺   希望瞓得好啦 ~