妹記大排檔 @ 旺角 ( 10-JUL-2016 )

斟酒呢家嘢   我唔在行   所以唔會斟 

飲勝

豉椒炒蜆 ($78) - 都幾好味   阿 mi 問我做咩食咁少 ?!   我心諗點解佢會知我食咁少 ?!   原來佢睇到我啲蜆殼   但其實我食咗好多青椒同洋蔥   咁主菜留比佢哋啦   哈哈   之後發覺里奧大人同阿 mi 將啲蜆殼排得好齊整   好搞笑

椒鹽鮮魷 ($58) - 份量細咗啲喎   不過好好味  椒鹽好香口   齋食好鹹   但我又鍾食齋食   哈哈 

秘制鋼鍋雞 - 正呀   麻麻辣辣   

阿 mi 無啦啦搞隻鍋   原來係要放番喺中間   我同里奧大人都無留意呀   果然好細心呀下      



齊齊影相真係好開心呢 

咸魚茸飛天通菜煲 ($68) - 里奧大人話叫呢個喎   扮哂鍾意食菜咁啦   呢個味道都唔錯   同埋份量都多   

酥炸美國桶蠔 ($148) - 阿 mi 叫阿喂同阿奧食多隻   佢永遠都只係叫人食多啲   但如果食唔哂   佢就會食埋去   好似我家姐咁   仲有佢同 CC 隻手指型係好似我家姐咁   所以見到佢隻手就好有親切感   哈哈

妹記小炒皇 ($78) - 魚仔唔脆呀   如果脆就好啦   好想食香口嘢  

青島啤酒 (大) ($22支) - 好似飲咗 6 支 

細細杯好搓手   同埋我可以慢慢 "dap"   哈哈 

( 10-JUL-2016  SUN )

尋晚喺床碌嚟碌去   差唔多 4 點先瞓到   之後里奧大人話佢 1 點幾瞓   瞓到 4 點醒咗   之後 5 點再瞓   邪啦   兩個都瞓唔好   唔通真係夜晚飲咗綠茶 ?!

我 8 點幾又起身去洗手間   咁開機洗衫啦   之後再瞓 ~

感恩係我可以 9 點 45 分起身   可以番教會 ~

沖埋涼就落樓食早餐   食完番屋企抖陣   勁焗熱   番到屋企要再沖多次涼 ~

我食唔哂個麵包   所以拎走   里奧大人話我恐怖喎   咁都食唔哂   我覺得佢用恐怖好搞笑   細食咪如你所願囉

奉獻完就走喇   1 點半約咗家姐去官塘搞嘢   搞掂就去食下午茶 ~

吉列豬扒拚什果沙律

鮮牛咖中央多士

XO 醬什錦炒銀針粉

咁我同家姐講話今晚同阿 mi 食飯   之後家姐話阿 mi 對我好好呀   成日搵我食飯   哈哈   可能上個月見完   今個月又見呀   我哋同糟糟唔會咁家嘛   哈哈 ~ 

食完都 3 點   里奧大人即去鴨記幫姐夫買嘢   因為條街超勁熱   所以我唔去喇   我其實真係頂里奧大人姐夫唔順   樣樣嘢都要買 3 件   USB 線又話要 3 條   縛埋一齊用嚟跳繩呀 ?!   之前電話又一次過買 2 部   佢去咗澳洲 2 年已經可以有 5 部電話   叫佢拎比里奧大人整   佢死都唔拎   咁擺喺度咪變廢鐵囉   又唔 Update 嘢   只係一用唔到就話買   買哂成間舖啲嘢比你好無 ?!   最大問題又唔上網搵下資料   一味叫人買買買   呢下就最討厭   咩 Model No. 又唔講   鬼知你要咩呀 ?!   間舖頭我開㗎 ?!   咩 Model No. 都有呀 ?!   所以次次一講就慶   里奧大人就叫我冷靜啲   咁係吖嘛   幫你買真係唔係問題   幫到實幫   唔係唔會問你買咩啦   但唔係咁樣囉   每年買同一樣嘢 3 件   咁係咪你本身問題   唔係物件有問題呢 ?!

我同家姐去麥記買埋兒童套餐比姐夫   之後就打的去佢屋企喇   本來想坐巴士   但要等 15 分鐘   我唔等喇   我要 4 點半走   咁如果坐巴士   成 3 點 45 分去到家姐屋企   坐唔夠一個鐘就走   咁我寧願打的喇 ~

同埋姐夫一齊傾下偈   之後婆婆打比家姐傾偈   姐夫就同我講話家姐最錫喺媽咪同我   真係無咗佢都無問題   哈哈   我知㗎   姐夫間唔中都同我話家姐錫到我哋燶㗎   一約親我哋就係咁催姐夫出門口   里奧大人都係咁講   所以我話我一定要對家姐好好好好   乜都要預佢就係咁解囉   我成日同里奧大人講   我買嘢嘅時候實諗起家姐   家姐買嘢嘅時候又會諗起我   最憎啲人把口就話對我點好點好   唔該唔好講   即做出來啦   等我好好咁 Feel 下妳對我嘅好囉 ~

家姐前工人知道麥包要聯針   所以 Whatsapp 問麥包依家點呀 ?!   佢把聲係勁擔心   問點解會咁咁咁   有無搽藥水咁咁咁   佢超級錫麥包㗎   家姐話麥包有事佢實問   唔問 B 仔點㗎   哈哈   好記得家姐同佢講笑   話叫佢帶埋麥包走   工人好開心話好呀   仲話印尼好多獸醫   麥包有事唔駛驚   哈哈 ~   

傾下傾下又 4 點半喇   家姐送我去巴士站   等多 2 分鐘就有 98C   感恩感恩 ~ 

今晚約咗阿 mi 呀喂去旺角食飯   里奧大人咁啱又到旺角買紅米 Note   所以我可以 Join 埋里奧大人一齊行去 H&M 等佢哋   去到 H&M 都未夠 5 點半   咁行陣先   因為條街勁焗熱   之後佢哋到咗   呀喂諗住直接去妹記   但阿 mi 居然話要喺 H&M 涼一陣   哈哈 ~

天氣咁勁熱   連家姐 里奧大人同阿 mi 唔怕熱嘅人都話熱   所以我比佢哋更加辛苦   我見到家姐同阿 mi   我都即摸下佢哋條頸   好在佢哋都立黐黐   哈哈   因為佢哋成日話我勁怕熱   我都驚係甲狀腺翻發嘛 ~

好喇   行去妹記   唔係阿 mi 帶路   我同里奧大人會行錯反方向 ~

Book 咗 6 點   但 6 點唔夠都到喇   哈哈   因為條街太熱   要搵地方嘆下冷氣呢 ~

呢間地方正呀   阿 mi 無介紹錯   最正係無限時   又唔會成日趕妳走咁款 ~

其實我一早已經想約佢哋食飯   同埋我係想去妹記   咁啱里奧大人上星期五話呢日會去深水埗買嘢   咁我話問阿 mi 星期日有咩節目   佢話無   所以就出嚟聚一聚喇   呵呵 ~

一坐低又收到荃灣特產   已經喺群組叫佢哋唔好買嘢比我哋家嘛   我要買嘅話   我會入荃灣搵佢哋嘛   唔想麻煩佢哋 ~

衰喂   拎包嘢出嚟比里奧大人   之後陰陰笑咁叫佢用嚟保護自己   原來係胡椒粉   衰奧話唔夠用   衰喂話噴少少就夠㗎喇   哈哈   如果阿 mi 買嘢比我   我知佢一定一定係買胡椒粉   因為我上次買唔到呀 ~

好在佢老婆叫我唔駛驚   之後即刻醒碌嘢比我   叫我有咩事用碌嘢打里奧大人   其實我哋 4 個都幾暴力   哈哈  

其實今晚好想食炸豬手同蠔餅同蠔仔粥   但我哋見到啲份量好巨   所以一致話唔好食   唔係食呢兩樣嘢都飽哂   同埋唔想阿 mi 食重覆嘢   所以叫啲新嘢 ~

大家唔太餓   所以兩個餸兩個餸咁叫   佢哋上菜好快   好在咁叫咋   唔係凍哂唔好食呢 ~   

好在阿 mi 提我 Book 位咋   8 點開始好多人   所以個場變咗好嘈   我地 4 個頭要 "翁" 前先聽到講咩   唔知以為講人是非   哈哈 ~

呢間食店冷氣真係好夠   因為我坐坐下都覺得凍 ~   

今晚又係傾得好鬼開心   乜都傾一餐   生活工作旅行電影足球鎖碎事   未講完一樣又到另一樣   所以我有時想番啲搞笑嘢   我都真係記唔番   因為傾得太多嘢喇 ~

講開短袖裇衫   里奧大人一定唔會着   之後佢話好似教書阿 Sir   我覺得佢形容得好搞笑   即係好似一個女仔長頭髮帶眼鏡斯斯文文   第一個比人印象係做 Miss 咁   我以前番教會   咁我講嘢都好斯文又細聲家嘛   因為唔熟嘛   佢地又問我係咪做 Miss   所以我微笑個樣真係呃到人   里奧大人成日叫我慳啲㗎   衰 ~    

其實我同阿喂性格係好似   怕熱啦   又心急無耐性   我仲衰   里奧大人教得我耐啲   我發脾氣㗎   所以阿 mi 都幾幸福   老公係咁   連朋友都係咁   唔駛特登了解佢嘅性格同為人   哈哈哈哈 ~

阿 mi 就同阿奧性格一樣   妳問佢哋嘢   佢地會幫妳分析   之後就順住方向去做   唔會一話就去馬   好有耐性   阿奧懶叻話佢同阿 mi 一樣咁有耐性   我話係呀   妳同阿 mi 教人都好有耐性   但你會鬧我囉   阿 mi 唔會鬧人   之後佢笑啦   咁即係承認啦 ~

里奧大人去洗手間   我同阿 mi 繼續傾   阿喂又走咗去埋單   呢餐收我哋 $300   佢一定又係減番啤酒錢   無理由次次都齊頭 (因為我當時唔知總數係咩   依家計番先知   多謝哂)   之後我同阿 mi 去洗手間先醒起   話明呢餐係我請佢嘅生日飯家嘛   激死我 ~

9 點半走人喇   我哋聽日要番工   阿 mi 一定唔會要我哋夜走 ~

佢哋搭地鐘   我地搭小巴   差唔多時間就一齊番到屋企   大家都好快呀   哈哈 ~

番到屋企即沖涼喇   里奧大人就上網搵嘢   都未搵完就話沖涼喇   因為今晚想早啲瞓 ~

我呢幾晚都瞓得唔好   所以我哋 11 點都即瞓喇   呵呵 ~