元氣壽司 @ 官塘 ( 9-JUL-2016 )

海鹽赤海蝦 / 三文魚腩壽司 / 吞拿魚壽司 / 三文魚壽司  

夏の極上卷 / 炸蝦卷 

芥辣八爪魚軍艦

( 9-JUL-2016  SAT )

今朝發緊夢去坐飛機   仲記得自己講話係去環遊世界添呀   勁開心   之後鬧鐘響   我仲諗緊今日駛唔駛番工添 ~

8 點先出門口   其實都幾趕   但真係想瞓多 15 分鐘囉   同埋自己一個人梳洗真係快好多   唔駛等嚟等去 ~

早餐食芝蛋治   食到一半就飽到上心口   下次唔餓都真係唔好食芝蛋治喇   嗚嗚 ~

菇場唔忙  繼續揀相 ~

會計部又有同事嘈交   Last Day 男同事話女上司成日用手機睇小說玩 Whatsapp   女上司就話番佢成日玩手機又 Hea 唔做嘢   好心佢哋啦   咁講法即係大家開工唔係做嘢   就咪理直氣壯話人哋點點點啦   自討沒趣   我唔會話人玩手機上網㗎   因為我自己都係咁   要是人哋話番我轉頭   我唔知點駁番妳囉 ~

放工即走   奇境係無人走   肯定想睇戲啦   之後就是非當人情 ~

番到屋企抖到 2 點就出發去官塘   食埋下午茶就 Join 埋家姐搞啲嘢  ~

搞到 5 點幾   之後行陣   行到 6 點幾就搵食   咁去元氣啦   其實我唔餓   只係想搵個地方坐下   傾下計 ~

食完就周圍行   見到部冷風機幾好咁   睇埋點用   覺得唔錯   之後家姐話買喇   因為幾大部   所以我同里奧大人講話同家姐打的   一齊去佢屋企   我哋又可以試下涼唔涼   等家姐用多 2 個星期   好就買   咁唔駛成日開冷氣   之前買咗部直身風扇   試果時唔錯   點知之後好鬼嘈   好似轟炸機咁   咁想開風扇瞓都唔得啦 ~

麥包聽日要去診所聯針呀   背脊有個窿   家姐睇嘅時候以為係有膿   咁醫生再抹   話係粒唔知咩爆咗   之後再抹嘅係脂肪   抹完其實根本係無咗一忽肉咁   手指甲 Size 咁大   其實都應該好痛㗎喇   陰公 ~

我同里奧大人喺家姐間房試機   突然聽到家姐話 B 仔你點呀 ?!   嚇到我即跑出去   見到 B 仔放軟哂灘咗喺地下   工人就係咁同佢搓隻腳仔   之後家姐話頭先麥包同佢打交   兩隻狗真係由細打到大   最離奇係食飽就一定咬對方打交   佢地已經分開食㗎喇   食完就一定衝向對方係咁吠   之後家姐同工人就會拉開佢哋   叫佢哋唔好嘈   所以成間屋嘈到暈   哈哈 ~

好喇   咁叫家姐入房拎嘢比我   之後聽到好大聲跌嘢聲   嚇到我腦海空白   我以為家姐暈咗呀   之後定一定醒即睇發生咩事   原來成個櫃門跌落嚟   仲整花隻門   之後家姐話真係黑仔   部車今朝又刮花咗   依家房門又刮花 ~       

9 點左右走喇   家姐車我哋番屋企   當時已經係咁行雷   又唔落得出雨囉   但其實 8 點幾我已經聽到雷聲   不過里奧大人話我聽錯喎 ~

約咗水姑去滿記   食到 10 點左右就喇   開始落大雨喇   要即番屋企 ~

沖埋涼睇陣電視   我 12 點左右瞓   里奧大人就睇 "偽裝者"   唔知佢會幾點瞓 lu ~