滷水鴨腎炒椰菜 + 燻蹄 (外賣) ( 12-JUL-2016 )

肥膏部分嘅紅色一點點好恐怖   我第一次見到咁樣㗎咋

( 12-JUL-2016  TUE )

尋晚發夢見到媽咪同工人同我一齊傾偈   不過其他人係見唔到媽咪嘅   之後我仲話好開心   原來可以見面傾偈   但後尾媽咪喊呀   我話唔好喊啦   依家都可以見面嘛 ~

之後唔知點解醒咗   就開始瞓得唔好 lu ~

早餐食芝腿治   唔知係咪呢排 Lunch 慣食麵包   依家覺得食多士好乾爭爭咁 ~

菇場唔忙   可以整相   其實 Re-size 係最花時間   同埋對眼都好鬼攰 ~  

Lunch Time 出去行陣   買埋麵包比里奧大人   就即買燒賣粉果腸粉番菇場食喇 ~

好嘢   仍然唔忙   可以做自己鍾意嘅嘢   哈哈 ~

放工去買燻蹄   番到屋企就浸菜   抖陣就抹書房抹櫃   其實如果我唔抹   里奧大人又唔會抹   基本上成間屋都係塵   有時見到書枱都有塵   因為我唔係成日抹嘛   但點解里奧大人可以接受到嘅 ?!   定係佢睇唔到呢 ?!   定係佢同屋企人住都係成屋塵   所以習慣咗呢 ?!

佢屋企人成日話我有潔癖   我好嚴肅同佢哋講   唔係我有潔癖   係妳哋太污糟   佢家姐屋企隻門後面   可以有一大舊塵   講緊係一個細橙嘅 Size 囉   恐怖 ~

里奧大人 7 點放工   咁我都預備煮飯喇   咁我同里奧大人講話今晚煮泰國米粉   之後佢打嚟話食埋之前買嘅出前一丁先啦   唔係又過期   因為次次差唔多到期   幾晚都會係咁食食食   食到佢好驚   哈哈   所以佢依家對啲 Expiry Date 好敏感呢   哈哈 ~               

是日懶餐 - 滷水鴨腎炒椰菜 + 燻蹄 ( 外賣 )

滷水鴨腎炒椰菜 - 買咗 $20 滷水鴨腎   加埋落椰菜度炒   咁無咁寡 ~

燻蹄 ( 外賣 ) - 好想食呀   所以又買半斤   加埋啲醋   真係好正 ~

搞掂哂就沖涼   睇下電視   10 點 45 分都自己瞓先喇   好攰呀 ~