鳳城水餃媽媽麵 + 腐乳通菜 ( 8-JUL-2016 )

( 8-JUL-2016  FRI )

好焗熱呀   所以其實番工都好   可以嘆冷氣   哈哈 ~

今朝食熱狗   酸酸咪咪開胃啲 ~

菇場忙下停下   之後又繼續揀相   一揀相啲時間就好快過㗎喇 ~

Lunch Time 行去萬寧買牙膏   之後再買酸辣米線番菇場食   咁等米線期間   我再去萬寧買多 6 支牙膏   因為買滿個人用品滿 $99 就送 1 支細蠔油   可以比家姐   哈哈 ~

行嚟行去勁鬼熱   再加埋食酸辣米線就熱到無朋友   勁想番屋企沖涼 ~

無啦啦又忙   好在都有時間整相   真係唔想日日都整相   所以想快啲搞掂哂去 ~

今日有散水餅   食完就超級勁飽   不過好好味   哈哈 ~    

太心急買嘢真係唔好   所以我就出咗事囉   睇真啲原來我鍾意隻味係 Forest Mint   但我買哂 Fresh Mint 呀   好在可以換貨咋   換哂最後果 8 支 Fresh Mint   我拎嘅時候   有個男人又拎呢隻味嚟睇   勁驚佢買呀   好在佢無買到   呵呵 ~

里奧大人飲開嘅 Hoegaarden  啤酒今日惠康只買 $88/2 Pack   買滿 $60 仲送 2 罐大 Hite 啤酒   里奧大人話抵呀   咁我識做啦   實買比佢   但其實佢話等埋佢先好買   因為好重   不過我唔等喇   驚比人買哂呀 ~

已經熱啦   啲風吹埋嚟又係慶嘅   真係幾辛苦下 ~

番到屋企已經 6 點半喇  里奧大人 7 點放工   我話今晚煮麵算喇   因為我唔餓   佢聽完勁開心   佢真係好鍾意食即食麵   暈 ~

是日懶餐 - 鳳城水餃媽媽麵 + 腐乳通菜  

鳳城水餃媽媽麵 - 煮 2 個媽媽麵比里奧大人啦   咁我分開兩碗嘛   佢一夾就話兩個麵得咁少咋 ?!   我話分開兩個碗裝啫   哈哈  

腐乳通菜 - 本來想通菜炒豆豉鯪魚   但炒起上嚟一大碟   豆豉鯪魚又油   咁我又真係食唔落   依家罐頭貴   真係唔想嘥囉   所以又腐乳通菜喇   我次次食腐乳   個咀唇都好痕咁㗎   里奧大人好驚咁話我咀唇敏感紅哂添呀   嚇死我咩   好在後尾無事 ~

搞掂哂就沖涼   之後開機洗衫 ~

好想食薯片呀   雖然已經 10 點   但都想食   所以叫里奧大人快啲沖涼   咁等埋佢一齊 Relax 下 ~

今晚 11 點幾都有睡意   所以即瞓喇 ~