翠河餐廳 @ 九龍灣 ( 14-AUG-2016 )

魚香茄子煲

鎮江焗豬扒 

金銀蛋油麥菜 

蕃茄豆腐炒蛋 

蕃茄紅油

( 14-AUG-2016  SUN )

今朝 9 點 45 分起身   咁我懶床   里奧大人問我番唔番到教會   我就即醒 lu   呵呵 ~

刷埋牙沖埋涼就出去食早餐喇   食完就番屋企抖陣 ~

崇拜完畢就去日本城買嘢   感恩除塵紙做特價 $26/4 包   因為想買好耐   但搵唔到呢 ~

買完就番屋企執嘢   之後同家姐去食下午茶   食完就叫里奧大人番屋企先   我同家姐去 Taste 買嘢比媽咪工人   家姐話佢之前無餸食呀   因為個婆婆番咗鄉下   佢又無話比太太知無餸   只係同家姐講話無餸   我咪話囉   直接同佢太太講嘛   同家姐講無用囉 ~

家姐咁錫佢   一早諗定買罐頭比佢   我話等埋我一齊揀啦   佢又唔豬唔海鮮唔魚   所以好難買罐頭比佢   咁佢話買粟米湯   我話買焗豆   咁就夠飽啦   家姐話粟米湯要買盒裝   等佢一剪個盒就得   焗豆就要買揭蓋嗰啲   唔駛佢用罐頭刀開   咁我哋再買盒紅米飯比佢食   家姐又話無匙更   一陣問人拎   估唔到佢咁細心喎   佢真係好錫媽咪工人呢 ~

媽咪工人又好鬼錫家姐   之前買個瓜比家姐食   今次買咗 2 大包指天椒同 2 Pack 三色椒比佢   咁家姐食唔哂   我話只要 1 Pack 三色椒就夠喇 ~

送埋家姐搭巴士   我就番屋企喇   原來都已經 4 點   拿拿聲執埋書櫃   又清咗一大袋環保袋   呢排執屋   真係掉咗唔少嘢   爽呀 ~

今晚要去舖頭   所以搵埋姑奶食飯   6 點出發   搞掂哂就去食飯 ~

食完去舖頭拎埋嘢就走喇   點知落雨   咁打的番屋企 lu ~

沖埋涼就休息   個人唔多舒服咁   好在之前買咗個木瓜   里奧大人覺得係救星   識佢嘅朋友都知佢最鍾意叫人食木瓜   不過我有次作感冒   真係食完就好番   但果時啲木瓜有木瓜味   依家乜味都無   唉 ~

終於睇哂 "歡樂頌" 喇   咁之後可以睇下書   唔駛成日掛住煲劇 lu ~

好攰   11 點都自己瞓先喇 ~