大阪王將 @ 九龍灣 ( 27-AUG-2016 )

香辣野菜豚肉醬油拉麵

和風炸雞五味海苔飯   今次試香辣蘑菇汁都 OK

元祖餃子 + 特飲 (+$30)   

( 27-AUG-2016  SAT )

今朝約家姐食早餐   所以 7 點 10 分起身喇 ~

家姐 7 點 50 分到咗   佢行路特別快   個個同佢行都會問佢係咪好趕時間 ?!   但其實佢話慣咗   咁我都明嘅   因為冰姑又係行得勁快   但冰姑係第一快   家姐只係第二快呢 ~

佢一坐低就問我   佢係咪行得好快 ?!   我話真係呀   因為我坐喺玻璃窗位嘛   突然有個黑影飛過   我都知係佢   因為之前好多人經過唔會咁囉 ~

順便比咗呢支香水比家姐   之前馬莎有 7 折就好抵   所以買支大嘅   咁佢話想要香水   咁我就比佢啦   好後悔買得 1 支   哈哈            

一路食一路傾   不過家姐要番工   我地 8 點 35 分都走喇   咁我送埋佢上車都走喇   感恩等咗 5 分鐘就有車   咁我又係等 5 分鐘後有車   感恩感恩 ~

9 點 01 分番到菇場   遲到一分鐘咋   呵呵 ~

菇場唔忙呀   上下網又傾下偈   好快就放工呢 ~

今日要喺菇場附近百佳買埋啤酒先番屋企   因為得佢係 $48/6支   好在我問一問里奧大人要唔要咋   估唔到佢話要   不過驚我重   話買 4 支就夠   我話係一 Pack 6 支㗎   之後我買夠 2 Pack 比佢   再買 2 包紅糖   真係好重囉 ~

真係入袋前做一下深呼吸   先有勇氣拎上膊頭㗎   之後有電話都唔會聽   要一氣呵成行去巴士站呢    

咁要番屋企先啦   無理由拎去食嘢嘅地方   因為咁即係兩個人要拎等於兩個人都辛苦   咁倒不如我一個人辛苦好過   反正都拎開 ~

喺屋企抖到 2 點先去食嘢   我想買牛油紙   所以去得寶食嘢 ~

依家啲嘢真係貴到呢   1 細卷牛油紙要 $10   我真係買唔落手   所以最後都係寧願焗完灘涼   用多一倍時間就一倍時間啦   起碼唔駛錢 ~

勁餓呀   食完之後又覺得勁飽   哈哈 ~

今次啲尖椒又係好辣   勁想同家姐嚟食   不過好驚佢嚟食又唔辣囉  

涼拌麻辣豬手   咁我就咁食呢盒豬手   食到大半已經好飽   但唔想又拎走   咁食埋去啦   下次都係唔好格硬食   食完好滯囉

水餃重慶酸辣粉 - 個湯底好酸呀   所以唔覺有辣味    

但因為好鬼辣呀   所以去食雪糕先   之後去 Taste 行下啦   咁啱睇到我正想上網買嘅 Smartech 牌字嘅吸塵機   不過好似貴過上網   所以都係番屋企睇埋價錢先買 ~

番到屋企即睇價   上網買就平 $100   但就唔知幾時先送到貨   咁我話寧願去 Taste 買   因為個職員都好好人   當幫下人囉 ~

番到屋企都抖下喇   尋晚瞓得勁唔好   今朝又早起身   所以都有啲攰 ~    

咁抖到 4 點左右真係突然間好眼瞓   一合埋眼已經瞓到   但我電話嘅東網又響一響   嚇到里奧大人即刻拎部電話入房   佢知我好難得話瞓晏覺   所以佢唔會比嘢嘈住我呢 ~   

一瞓瞓到 4 點半   爽哂呀   真係精神好多呢   呵呵 ~

6 點幾落去 Taste 買吸塵機   原來用中銀卡簽帳   滿 $500 就送一張 $50 超市 Coupon   咁又好喎   即係喺 Taste 買只係貴 $50   感恩感恩 ~

呢部 "多功能迷你強力旋風吸塵機" 特價 $748 都抵   原價要 $1,498 㗎   仲送埋架車仔   同埋粉紅色嘅隔熱墊同大湯匙                  

買完就要里奧大人拎番屋企   我就去大阪王將攞位 ~

今晚焗曲奇   食完要即番屋企喇 ~

焗呀焗   里奧大人就去徑步   咁我就沖涼先喇 ~

諗住學人整到 Mrs. Fields Cookies 嘅口感   但都唔得嘅   同埋我又用咗粗粒黃糖   點知唔溶呀   所以里奧大人同家姐問一粒粒嗰啲係咩嘢來   哈哈   但佢哋反而話有啲脆卜卜   口感幾得意

              
灘凍哂啲曲奇   都差唔多 11 點   咁睇多陣電視   12 點都眼瞓 lu   但里奧大人居然話唔眼瞓   咁唔理佢喇   我自己瞓先呢 ~