韓式辣醬炒洋蔥豚肉 + 唐生菜 + 炸魚皮 (外賣) ( 11-AUG-2016 )

( 11-AUG-2016  THU )

今朝涼咗喎   因為沖涼嘅時候全程用熱水   之前係用暖水㗎咋   我都係鍾意冬天   可以慳番唔少冷氣錢   哈哈 ~   

早餐食芝腿治   之後 8 卦又嚟埋   咁傾下偈啦 ~

菇場唔忙呀   又做下自己嘢 ~

Lunch 食麥皮 + 雞尾包   太耐無食麥皮   真係勁唔想食   但其實已經過期   所以之後都要繼續食咯 ~

放工去街市買餸   咁買完行番屋企嘅時間   有個女人同我講話個袋未拉拉練   嚇到我呢   因為我上車一坐低就放銀包入背囊   知道拉好咗先再攬住背囊家嘛   原來係前面嘅細格無拉拉鍊   可能今朝我喺菇場拎完化裝袋   手快快放番去枱底   唔記得拉拉鍊呢   咁嚇一嚇之後   成個身當堂熱哂呀 ~

番到屋企浸好菜   預備好哂所有嘢   就滾番尋晚嘅節瓜粒湯   因為我有啲餓   所以飲湯先   之後再開機洗衫同熨衫 ~

里奧大人 7 點 15 分放工   我都要煮嘢喇   咁我煮福麵比里奧大人食   佢以為我做咩唔食   我話飲完碗湯   又多湯渣   所以都已經幾飽下   哈哈 ~

是日晚餐 - 韓式辣醬炒洋蔥豚肉 + 唐生菜 + 炸魚皮 (外賣)  

韓式辣醬炒洋蔥豚肉 - 終於清哂盒韓式辣醬喇   同埋清咗買咗好耐嘅 2 包金菇   勁開心呀   所以呢   今次啲汁係比較辣   同埋太多金菇   咁頭先淥咗幾粒丸   唯有做埋 Lunch Box 啦   聽日叮個米粉   完全係打邊爐食剩 Feel 呀   哈哈  ~

唐生菜 - $8/斤   食唔哂   但唔緊要   我聽日食埋   呵呵 ~

炸魚皮 (外賣) - 勁想食呀   但買開嗰檔無開   所以去另一檔買   脆就脆   不過就無味呢 ~

搞掂哂就沖涼   次次開完鑊煮嘢   就好想拿拿聲沖涼㗎 ~

我好唔明里奧大人   成日最鍾意開哂啲燈同門   一係就開廁所門   但係開咗抽氣扇家嘛   所以個廳裝 10 匹冷氣都無用   佢一番嚟就咩叉門同燈都開哂   部冷氣已經唔係勁   搵晚我會叫佢開埋窗   反正佢咁鍾意咩都開哂   唔爭在啦   咁叫佢關廁所門   佢就關埋抽氣扇   大佬   我啱啱沖完涼   成個廁所都係蒸氣   關抽氣扇做乜呀 ?!   所以我叫佢唔該你認真記住   你關抽氣扇就唔好關哂成對門   我真係覺得好很煩   已經唔係第一次 ~ 

一係就無手尾   我最憎佢呢樣   買完嘢番嚟   即係買個 Power Bank 咁   個 Power Bank 就好小心咁放喺自己背囊   但個盒居然可以就咁掉喺梳化   個盒仲要係開哂   當梳化係垃圾桶呀 ?!   我有時直接將佢掉嘅嘢   掉喺佢電腦上面   最奇係個盒仍然喺番度   要就收好啦   幾十歲人啦唔該   唔係用完嘢要我次次提你要收番呀嘛 ?!   麻 Q 煩 ~

之後我特登開住風扇熨埋幾件裇衫   反正佢咁鍾意咩叉都開哂   所以我有時都會串佢   其實你咁鍾意開哂啲嘢   但又唔見妳開完自己部電腦又唔關嘅 ?!   相機抹完個鏡頭   個蓋又唔見你留喺書枱嘅 ?!   之後佢就好自豪話自己整齊   我即話佢呢啲咪衰格自私囉   自己嘢就整齊   我都可以只顧自己啲嘢㗎咋   唔該 ~

食埋生果就睇 "歡樂頌"   今個星期應該可以睇哂   晚晚追其實都幾辛苦 ~

無啦啦好眼瞓   所以 11 點 15 分都瞓 lu ~