雙丸冬蔭功麵 + 唐生菜 ( 26-AUG-2016 )

( 26-AUG-2016  FRI ) 

呵呵   尋晚瞓得唔錯   好開心呢 ~

今朝又好想食腿蛋治   但塊方包唔新鮮囉 ~

但其我次次都會拻咗好多麵包出來   好折墮咁

菇場唔太忙   咁就好喇   因為唔太想郁   哈哈 ~

Lunch Time 出去食粥   之後去百佳買參蜜   買 3 送 1   平均 $4.2/支   咁就好抵啦   上次仲以為 $4.4/支最平添   所以又買咗 8 支比里奧大人 ~

咁我有隻智慧齒生得好入   其實有啲蛀咗   但就唔會繼續蛀落去   所以我想買小朋友牙刷   咁可以刷入啲嘛   諗住喺萬寧買支買支 $15.9 嘅用住先   好在無買住咋   估唔到清貨只買 $23/Pack   仲有 2 支牙刷 + 2 支旅行裝牙膏    所以即買 3 Pack   真係好鍾意買到平嘢嘅感覺   哈哈 ~

條街好焗熱呀   一路行一路流汗   真係勁想番屋企沖涼囉 ~

好嘢   菇場唔忙   可以抖下   唔知係咪出咗一身汗   個人有啲攰添呀 ~

放工即番屋企   今晚要焗朱古力曲奇比家姐   點知無買到自發粉   而係買錯咗盒泡打粉   咁即去 Taste 買啦   但一包好貴   要成 $29   仲要 11 月到期   我喺 759 買咗包低粉同高粉都只係 $27   反而買盒自發粉要 $29   我唔會買囉   咁再去惠康睇啦   得番特惠牌   咁 $8.9 都抵啦   中國造都照殺   反正今次係試下口感   覺得好食先再另一個牌字 ~

番到屋企差唔多 6 點 45 分   里奧大人啱啱放工   咁我整好哂啲麵粉份量就煮嘢喇 ~
     
是日懶餐 - 雙丸冬蔭功麵 + 唐生菜 

雙丸冬蔭功麵 - 泰國嘅即食麵份量係比較少嘅   所以今晚同里奧大人講話食泰麵   佢即話要煮 2 個先夠食   如果平時佢話食 2 碗菜先夠食就好喇   哈哈 ~ 

唐生菜 - 前晚食剩   今晚一定要食埋去啦 ~

搞掂哂就抖陣   今日阿喂又比咗手信比里奧大人   係阿 Mi 自家制嘅酸木瓜 酸薑同酸梅   仲加多包炸魚皮   發達喇   但炸魚皮真係食唔落   所以放入雪櫃   咁樣就唔會腍呢 ~

里奧大人好緊張打比我   話阿 Mi 叫阿喂比啲嘢比我   我話我唔知喎   之後佢 Send 咗張相比我   咁我就知係酸薑呢   估唔到仲醒咗包炸魚皮比我   真係好多謝阿 Mi 同阿喂呀 

放好哂入雪櫃就同里奧大人去馬莎買裇衫   今次抵呀   買 2 件送 1 件   買滿 $1,000 用 HKBS 信用卡仲有 85 折   佢買 $599 一件嘅款   原價就一定唔買㗎喇   依家折咗即係平均每件 $340   我覺得咁就合理喇   不過馬莎啲料又真係襟着好多   唔會洗幾洗就好霉咁 ~

9 點 10 分番到屋企   即焗曲奇喇   但無牛油紙   所以照焗 3 塊先   但我衰心急   一焗完即拎   點知散鬼哂   之後覺得真係要放涼先拎上來   咁即係要用多一賠時間   所以唔整住喇   但就再焗 1 塊試下啲味道同口感先囉 ~

最後都係留番聽日買咗牛油紙先再焗   好味就比家姐   咁叫里奧大人試食啦   估唔到佢話好味   仲問我有無多 1 塊添 ~

沖埋涼就食龍眼   之後又忍唔住執下廚櫃   見到小強屍   咁我用廚房紙執佢啦   Feel 到佢係脆身   因為平時一執起就搞掂   但今次係碎唒咁   即同阿 Mi 講   佢話係部機發揮嘅作用   之後里奧大人再上網睇   話用機初期   會迫到啲強出來   聽見到驚   哈哈 ~   

整下 Recipe 又睇下電視   成 12 點先瞓呀 ~