住家飯 @ 家姐屋企 ( 15-SEP-2016 )

蠔油冬菇燜雞 - 好味呀   尋晚無食燜嘢   今晚居然食到   真係好開心呢   感恩感恩    

蝦仁炒蛋 - 食咗少少   今晚唔係咁想食蛋   哈哈  

潤腸 - 本來我唔食飯   但食潤腸就無可能唔食飯啦   就咁食就太重口味喇

炒芥蘭 - 食咗好多   哈哈

紅菜頭齋湯   我覺得好味呀   之後佢哋仲煲埋鹹蛋冬瓜湯   我又再飲 1 碗   呵呵

( 15-SEP-2016  THU )

又瞓得唔好   唉   諗住呢排情緒都開始穩定   點知比人搞一搞   搞到我心情又再次跌落谷底   好在可以同家姐 阿 mi 同冰姑傾咋   起碼有人 Support   同埋講完出嚟   個心舒服好多   不過搞到佢哋好擔心我   我又覺得唔係咁好   真係唔想因為自己唔開心而搞到人哋都擔心   但唔講我又會死   所以都係想同佢哋講囉 ~

早餐食芝腿治   其實來來去去都係食呢啲真係好悶   但呢間嘅茶就最好飲   所以成日話想食另一間   但對腳又好自然行番呢一間   哈哈 ~

菇場忙呀   又唔夠瞓喎   真係做到有  d 暈暈地 ~

10 點幾里奧大話公司放 5 點   家姐就話放 3 點   我就仲未知囉 ~

Lunch Time 出去買方包比家姐   又去買啲零食比阿 mi   之後就買酸辣米線番菇場食   已經 1 點喇   唔可以 Hea 住食   呵呵 ~

2 點收到 Email 先話放 4 點   我仲諗住無得放早添 ~

CC 公司仲離譜   如果放 5 點   就會喺 4 點 15 分先通知   咁我話佢今日會放 5 點啦   佢話 4 點得唔得呀 ?!   我話我講 5 點   要是妳放 4 點   咁咪好似放多咗 1 個鐘咁囉   咁樣係咪會更開心呀 ?!   哈哈   之後佢話放 4 點   聽見都替佢開心   哈哈 ~

放工坐小巴去家姐屋企   但真係唔識去   所以叫工人出嚟接我   佢又係好好   見我拎住袋嘢   係都要幫手拎   講咗幾次   不過我話唔駛啦   啲嘢係我自己   我自己拎得呢 ~

條街好焗熱   所以去到家姐屋企都即開冷氣 lu   呵呵 ~

家姐 5 點幾先番到嚟   咁又傾下偈啦   傾到我喊   嚇鬼死佢呀   係咁搓我心口   叫我唔好激氣   之前因為媽咪有病亂食嘢   我都好嬲家姐   但當我有事   原來家姐真係好擔心   成日問我有無嘢 ?!   一聽到我把聲   又以為我喊   我話菇場講嘢好唔方便   所以係好細聲講電話   好多時細聲到佢以為我唔舒服添呀   哈哈 ~

7 點幾食飯   食完又傾下偈   家姐車我番屋企   所以 9 點都走人喇 ~

中秋節一定食水晶梨

B 仔瞓到有鼻鼾聲   勁過癮

里奧大人今晚去舖頭幫手   估唔到快番過我到屋企   仲諗住起碼 12 點添 ~

沖埋涼就食朱古力甜筒   因為我想好瞓啲 ~

睇多陣電視   差唔多 12 點先瞓呀 ~