麻辣豬手 + 鹽焗雞 (外賣) + 蒜蓉油麥菜 ( 18-SEP-2016 )

( 18-SEP-2016  SUN )

今朝 9 點半已經起咗身喇   咁刷牙落樓食早餐 lu ~

食完番屋企抖陣   執多陣嘢就沖涼   今朝里奧大人自己番教會   依家我唔會番教會一排住   要是佢問我點解唔番   我會話因為發覺身邊啲所識嘅基督徒係咁不知所謂   反而無神論者嘅人心地更好   更真心   更為人設想   但除非當日有事奉   我就一定番   因為我唔想影響自己團隊呢 ~

11 點幾打比家姐   叫佢揸車嚟拎車套走   順便比埋幾件褸比佢   同埋我一陣都同佢哋一齊同婆婆飲茶   所以去埋佢屋企一齊出發仲好呢   呵呵 ~

真係好邪   家姐打嚟問我要唔要齋雞粒   我話千其唔好買比我呀   尋日先買咗廿蚊   佢話好在問一問先咋   本身諗住比個驚喜比我   要是買咗   我都要嘅   拎番番菇場食囉唯有 ~

去到家姐屋企 Hea 陣   12 點 45 分出發喇   條街勁鬼熱呀   但之後又陰陰天   大佬唔好落雨呀   因為我哋無帶遮呢   哈哈 ~

約咗大舅父一家同婆婆 2 點喺煌府飲茶   加埋我哋 3 個   總共有 11 人   一坐低就傾下偈   又玩下表妹嘅 BB   我哋話依家升 Grade 做表姨媽   不過我話點都好聽過做表姨婆   哈哈   之後我表妹都升 Grade 做咗嬸嬸   佢話叫佢個名好啲   叫嬸嬸個名好似超級老咁   哈哈 ~

咁見面傾下偈又影下相   我聽到舅母話一定要影相呀   好耐無見喇   聽完都好感動 ~

大表妹先搞笑   講埋公司大秘密我知   我都替佢唔開心呀   佢又係好蝦之人   所以有時啲嘢   妳下下為他人着想   一到利害關頭   人哋唔會理妳吖   所以我叫佢最緊要係好好保護自己呢 ~ 

講明 4 點交枱   咁無問題   但佢哋 3 點 15 分開始試咪   之後無耐就播到啲歌好大聲   擺明想趕人走咁   我同表妹夫都話試咪唔係問題   唔應該咁大聲   話哂有客喺度   初初以為試咪   點知根本係播哂成首歌   咩意思呀 ?!   一係妳唔好安排我地坐最入嘅擺酒位置囉   衰格 ~

4 點唔夠都走啦   我同家姐 姐夫一齊睇鞋   再買埋餸就坐巴士番屋企 lu ~
   
番到屋企都差唔多 5 點   里奧大人話想早食飯早徑步   咁我都浸定菜煮定飯先喇 ~

因為阿 mi 之前仲比咗芋頭西米露比我哋   所以成日叫里奧大人食埋去   估唔到佢又記得   話頭先已經食咗   再加多包童星點心麵就當 Lunch 食埋 ~

是日懶餐 - 麻辣豬手 + 鹽焗雞 + 蒜蓉油麥菜

麻辣豬手 - 阿 mi 特登整比我㗎   話無加辣   我覺得味道係麻而不辣呀   但一樣好味道   我都算勁啦   一次過食哂   呵呵   同埋我真係驚擺得耐會壞   咁就真係嘥哂阿 mi 心機喇   佢仲特登唔整手指位嘅部份比我㗎   真係好感動   諗番起嗰日去佢屋企   阿喂串串共同我講 : "我老婆整豬手比妳   整咗成朝呀"   真係嚇鬼死我啦   夜晚已經要佢整嘢食   連朝早都整埋我嘅嘢   之後阿 mi 話只係整汁   豬手就前一晚整   真係勁唔好意思   煩到人咁 ~

鹽焗雞 (外賣) - 估唔到姐夫都話要   咁就好喇   一隻 share 仲好   點知姐夫又比埋錢   不過我自己屋企人同朋友都係咁   買嘢會好快拎錢出嚟   我同家姐 姐夫食嘢   佢哋真係唔會比我比錢   所以我成日會買番啲嘢比家姐   所以真係自己人嘅分別   唔會咩嘢都計計計   5 毫子都要計番咁呢 ~

蒜蓉油麥菜 - 喺紅磡買埋菜   $9/斤   話係昆明油麥菜   細細棵咁嘅   估唔到又幾好味喎   唔同牛頭角街市買嗰啲咁呢 ~ 

食埋青木瓜   真係無咁滯   我仲覺得咁酸好鬼正   真係好似鬼上身咁   以前一見酸嘢就唔會掂   依家可以咬埋檸檬茶啲檸檬   不過仲未接受到食話梅嘅鹹酸 ~

洗埋碗就熨 2 機衫   里奧大人就去徑步 ~

沖埋涼就抖陣   睇下電視又打下機   今日有啲攰   所以 11 點左右都瞓喇 ~