韭菜餃拚水餃+炸魚皮 (外賣) + 自家制麵包 ( 15-DEC-2020 )

今日收到里奧大人同事比我嘅聖誕禮物   勁開心呀   因為唔係個個都有㗎

( 15-DEC-2020  TUE )

今朝起身真係覺得凍咗   但唔會話凍到滕滕震咁囉   哈哈 ~

我 8 點 10 分番到菇場   原來西瓜啱啱番到咋   好在今朝買麥記早餐   如果買茶記早餐   肯定快過佢番菇場㗎   哈哈 ~

菇場勁忙   好快就 11 點 45 分喇 ~

行咗陣再去買酸辣米線   阿姐同我講話仲要番工 ?!   我話梗係要番工啦   不過放早   哈哈 ~

之前少辣但唔覺辣只覺勁酸   所以今日要中辣   真係辣到我要食一啖停一啖呀   食完胃痛   真係自己攞嚟衰   嗚嗚 ~

里奧大人 1 點 27 分打來問我喺邊 ?!   我話開工啦   佢話以為食 12 點半到 1 點半   尋日家姐 11 點 30 分打嚟話行咗去邊呀 ?!   我話開緊工啦   行乜鬼呀   佢話唔係食 11 點半咩 ?!   佢哋兩個咩料呀   開工打嚟仲問我做緊咩   唔通真係以為我番工真係無嘢做 ?!

仍然忙呀   好在 3 點幾都搞掂啦 ~

放工去街市買餸   買下買下   又買咗 1 斤甜豆 + 1 份福花 + 1 條魚 + 2 條白蘿蔔 + 3 條脆肉瓜 + 6 隻蕃薯 + 7 個蕃茄 + 10 個人參果   拎到手都斷咁滯 ~

番到屋企即沖涼洗頭   今晚應該唔會出汗   哈哈 ~

里奧大人 7 點半番到屋企   沖埋涼都要快啲食晚餐喇   因為 8 點半要開會呢 ~

是日懶餐 - 韭菜餃拚水餃+炸魚皮 (外賣) + 自家制麵包

韭菜餃拚水餃+炸魚皮 (外賣) - 今次真係懶得及時   本身諗住整煎釀   但次次買完餸比較攰   所以今晚買水餃   咁里奧大人又記錯開會時間   以為係聽日   如果整煎釀就真係好趕㗎喇   今次買嘅白蘿蔔好清甜   蘸甜辣醬食真係好鬼正 ~

自家制麵包 - 今日食太多辣嘢   已經諗住今晚要食豆腐花   感恩里奧大人同事整咗朱古力包   咁可以當甜品㗎喇 ~

洗埋碗就可以休息   抖陣就食生果 ~

里奧大人準時 8 點半開會   開到 9 點 45 分   算快㗎喇 ~

今晚有啲攰   11 點 15 分都瞓 ~