蜜汁金沙骨 + 雜菌肉絲干燒伊麵 + 蠔油唐生菜 + 自家制麵包 ( 20-DEC-2020 )

家姐又比包蝦米   搵晚整節瓜粉絲煲先   西班牙柿抵呀 $30/3 個   蕃石榴就 $18/5 個

( 20-DEC-2020  SUN )

今朝里奧大人 7 點幾出門口   我都瞓得麻麻哋   9 點唔夠都起身 ~

梳洗之後就焗麵包   食完早餐就即做家務   我覺得自己好奇怪   食完一定要即做家務   唔係咁想抖陣   寧願快快手搞掂之後抖下好過 ~

今次咖啡加朱古力煉奶   諗住整 Mocha   點知沖出來超級苦   要再加正常煉奶先得呀   但其實都係苦   因為我落咗好多咖啡粉   最後飲咗半杯都頂唔順   要一陣再飲 ~

做到 11 點鬆啲   沖埋涼就抖下 ~

12 點左右出門口   今日同里奧大人食 Lunch ~

諗住出去食   但餐廳好多人   所以即轉外賣番公司食呀 ~

我 2 點唔夠都走喇   里奧大人要去開會呢 ~

我買埋生果同凍肉先番屋企   咁又已經 3 點 ~

雲層好得意

沖埋涼就抖陣   真係開始有啲攰喇   哈哈 ~

熨完 2 機衫就煲雪梨羅漢果茶   今日未停過呀 ~

里奧大人 5 點幾開完會   我都即刻預備晚餐喇 ~

依家里奧大人好搞笑   佢話佢打比我嘅時候   要即刻聽電話   如果唔係佢會即刻搭的士番來   我話依家搞到我仲緊張呀   哈哈 ~

是日晚餐 - 蜜汁金沙骨 + 雜菌肉絲干燒伊麵 + 蠔油唐生菜 + 自家制麵包

蜜汁金沙骨 - 今次仍然焗得好味道   里奧大人話唔駛煮呢個餸啦   食伊麵都飽   我話醃咗幾晚喇   今晚點都要食   我話本身今晚好 Perfect   依家就係多咗個伊麵呀 ~      

雜菌肉絲干燒伊麵 - Lunch 食唔哂   之後唔叫啦   哈哈 ~

蠔油唐生菜 - 尋日買咗 2 棵唐生菜   

自家制麵包 - 今次里奧大人整得好味呀   我鍾意食芝士牛油果呢 ~

洗埋碗就即沖涼   越夜越凍呀 ~

今日滕咗成日都攰   所以 10 點半都瞓喇 ~