泡菜年糕炒豚肉 + 涼拌皮蛋 + 自家制麵包 + 芒果糯米飯 ( 3-DEC-2020 )

( 3-DEC-2020  THU )

今朝雖然凍咗好多   但行兩行都好似想出汗咁   哈哈 ~

好餓呀   又早咗落車   所以又買麥記早餐喇   因為無啦啦好想食炒蛋 ~

忙下停下   話咁快 Lunch Time ~

Lunch 食朝早食剩嘅薯餅 & 鬆餅   再加包鈣思寶   唔健康得嚟都算健康   哈哈 ~

家姐話麥記早餐好抵食   之後加多句放 4 點係唔同啲

阿爽同我講一田減價   我話一田一年會有 2 次減價   遲啲 11 月都會減   佢個樣好愕然   之後佢再話依家係 12 月喇喎   妳講咩呀 ?!   笑死我   我以為依家係 5 月份減價呀   哈哈哈哈 ~

忙咗一陣就等放工   今日開始放 4 點   所以好快放工咁呢 ~

去埋超市買即食米粉同餃子就番屋企   里奧大人下星期 WFH   依家天氣凍   都係食啲熱嘢好 ~

番到屋企都 5 點    抖下就預備晚餐 ~

時日晚餐 - 泡菜年糕炒豚肉 + 涼拌皮蛋 + 自家制麵包 + 芒果糯米飯

泡菜年糕炒豚肉 - 終於清哂半樽泡菜   已經加年糕同豚肉   但都好鹹   但啲韓國人餐餐食泡菜   我覺得好唔健康咁   不過可能佢地自家嘅就無咁鹹啦 ~

涼拌皮蛋 - 唔小心跌爛咗隻皮蛋   咁加埋花生就整個小涼拌啦 ~

自家制麵包 - 里奧大人同事又整麵包   今晚來得及時喇   因為可以夾泡菜豚肉   哈哈 ~

芒果糯米飯 - 個芒果就來爛喇   今晚要食   之前狂食豬腰芒   咁一路食都無事   暗暗大喜   點知有次 "加拿大" 好痕   R 多兩 R   原來係濕疹呀   仲要個範圍開始越來越大   係咁搽俄羅立英   最邪係想買寶膚苓但幾間都無哂貨   等咗三個星期先有   其實都接近好番   但都照買   仍都有搽   無耐都好番哂   今次濕疹搞咗差唔多 2 個月呀   呢個教訓真大   芒果真係好濕毒   但我都會照食   每樣生果都有佢嘅好壞處   但要適可而止呢 ~

洗埋碗就大清潔廚房   沖埋涼抖陣就嘆個芒果糯米飯喇 ~

睇多陣電視   里奧大人 10 點 15 分就瞓覺   我就遲佢半個鐘先瞓   今晚好凍咁   都係早啲瞓好呢 ~