阿進師麻辣鴨血 + 煙肉拼韓國香腸 ( 18-MAR-2021 )

紅薯粉超級煙韌   下次會大量入貨

就係睇到粒豬腸   以為係鴨血+豬腸   激死我   我覺得佢誤導我呀   哈哈哈哈

( 18-MAR-2021  THU )

感恩又一覺瞓天光呀   真係超勁開心 ~

今日里奧大人 WFH   可以陪我食早餐   依家好難得一齊食早餐㗎   始終依家怕人多   唔會好似以前咁陪佢喺公司附近食早餐   之後再番工咁呢 ~

天氣勁勁勁潮濕又大霧   但又大風喎 ~

今朝出門口   又無帶電話   我同里奧大人講好在佢喺屋企咋   但其實佢唔喺度   我開門咪得囉   真係嚇到黐咗線   哈哈 ~

菇場忙呀   仲要係煩嘢   搞完都已經 11 點幾   等多陣又 Lunch Time 了 ~

出去行 20 分鐘先   買雞骨草比里奧大人   再買菠蘿叉燒包做 Lunch   買埋麻辣鴨血就番菇場喇 ~

家姐同里奧大人睇唔到我寫咩   我話係日本城鴨血   咁其實我 Remind 自己之嘛   我都唔知點解自己寫成咁   哈哈

家姐 12 點幾打嚟仲以為乜事   嚇到我按錯制   佢要等一陣先聽到   哈哈   我唔記得佢 WFH 梗係用自己手機啦 ~

無啦啦問我去邊度偷懶 ?!   比佢咁講   我真係望下個鐘幾點   之後我話 Lunch Time 喎   佢話整鬼我喎 ~

原來佢想叫我幫工人買咖啡   我話牌子係咪 Happy ?!   佢話係 Good Day 呀   哈哈哈哈   我話總知係好開心嘅名囉 ~

每次見到 Cappuccino 就諗起家姐喺好耐好耐之前   有次唔記得做咩   總知係搵家姐食 Lunch   好記得當日家姐帶我食焗薯皮   仲特登 +$6 買杯 Cappuccino 比我   嗰陣家姐好慳㗎   +$6 係好勁㗎喇   哈哈   咁家姐話因為我鍾意飲   但其實我唔鍾意飲  (不過當時應該無講   係好後期先講番呢件事)

仍然唔忙   準時放工走 ~

番到屋企都預備晚餐   今晚又焗又蒸要啲時間 ~

我煮個辛辣麵比里奧大人食   但唔話佢知   點知佢睇到個辛辣麵   話唔好拎出嚟氹佢開心喎   真係唔明有幾開心   哈哈 ~

是日晚餐 - 阿進師麻辣鴨血 + 肉拚韓國香腸

阿進師麻辣鴨血 - 今日喺日本城買㗎   特價 $88/2 罐   家姐成日食其他台灣牌子嘅鴨血   所以我都忍唔住買   不過我覺得完全唔麻辣嘅   但鴨血口感都實淨   里奧大人好驚訝點解我會買呢啲食   因為佢唔鍾意我食內臟同埋呢啲乜血物血呢 ~

煙肉拚韓國香腸 - 真係煮到唔知煮咩   記得冰格仲有煙肉同香腸   拿拿聲整埋去喇   要焗完再煎   煙肉脆卜卜勁好味呀 ~

洗埋碗就大清潔廚房   再開機洗衫   搞掂哂就沖涼 ~

里奧大人話今晚要食芒果   好少聽佢講話食生果㗎 ~   

咁坐喺梳化睇電視   痴線佬無啦啦同我講話頭先睇到我剪開包辛辣麵   咪以為佢唔知   話我扮哂嘢唔係比佢食   好無聊喎   我話咁你無得食嗰下係咪好失望先 ?!   之後知道有得食係咪好開心先 ?!   佢話係   到我話番佢無鬼聊   哈哈 ~

9 點一齊睇 "女神降臨"   睇 2 集都已經 11 點   所以都瞓覺 lu ~