水餃雲吞拚蝦滑 & 炸魚皮 (外賣) ( 2-MAR-2021 )

( 2-MAR-2021  TUE )

今朝覺得涼咗   好似下星期又凍呀 ~

早餐食好味嘅奶醬多   哈哈哈哈 ~   

好似好細隻咁

菇場忙呀   仲要係煩嘢 ~

Lunch Time 同 8 卦一齊去拎酸辣米線   佢之前打電話叫定   所以去到即刻可以拎走   但我其實唔太餓   之得自己行陣先再買啦   哈哈 ~

今日去另一間涼茶舖買雞骨草   飲完個人好似舒服好多咁喎 ~

仍然忙   肥仔豪啲嘢比較複雜   佢越講得清楚反而令我更亂   其實佢講兩句   我就可以好輕鬆搞掂囉 ~

咁我好專心做嘢   肥仔豪細細聲叫我   我嚇到彈一彈起身   之後佢個樣都唔好意思   佢仲話今日佢好麻煩   因為佢今日搵咗我好多次呀   哈哈 ~

真係忙到 5 點 20 分   但好充實   日日係咁都唔錯   之前比較得閒   個人反而攰啲咁㗎 ~

里奧大人 5 點半打比我   話改今晚開會   不過唔緊要   反正我都諗住買水餃 ~

我去買菜   阿哥背住我問阿姐要咩嘢菜 ?!   我話要西蘭花   之後佢見到我就係咁笑住話: 嘻嘻嘻嘻   妳係靚女唔係阿姐   嘻嘻嘻嘻   我覺得佢好恐怖囉   同埋你讚我靚唔靚都無所謂啦   都戴咗口罩   最緊要係啲菜靚就得㗎喇   不過佢解釋咗西蘭花點解兩種色之後   我即轉買菠菜   哈哈 ~

去埋買水餃同 2 包無激素雞翼同大半磅急凍牛板腱就即番屋企   放哂所有嘢就拖地   之後就預備晚餐  ~

里奧大人 7 點幾先番到屋企   沖埋涼食埋晚餐   食完抖陣都差唔多預備開會 lu ~

咁我煮嘢期間   里奧大人話講樣搞笑嘢我知   話原來係佢記錯開會時間   其實不嬲都係今晚開喎   佢仲話自己 mark 低係星期二開會   咁做咩同我講星期三呀 ~

是日懶餐 - 水餃雲吞拚蝦滑 & 炸魚皮 (外賣)

水餃雲吞拚蝦滑 - 里奧大人鍾意食蝦滑   所以又買 $20 (4 兩) 比佢食   今晚用昆明旺 C 墊底   我問菜檔旺 C 係咩   佢話類似娃娃菜   $10 有 1 斤   我用嚟做湯底都唔錯   不過我都會食埋啲菜㗎 ~

炸魚皮 - 唔想食薯片咁就食炸魚皮   浸淋無咁熱氣   哈哈 ~

洗埋碗就沖涼   之後開機洗衫 ~

真係好邪   尋晚同里奧大人講話唔想同邊個食飯   點知佢今朝 Whatsapp 約我食飯   我同里奧大人講話即係要鍾意番佢喇   點知里奧大人聽錯話要拒絕佢 ~

咁我話我不嬲係記仇㗎喎   里奧大人即話我有樣好   知道自己記仇   哈哈 ~

8 點半準時開會   9 點半開完   我覺得算快喇 ~

里奧大人 11 點唔夠都瞓   我就 11 點幾先瞓   因為好想打機   哈哈 ~