芝士肉鬆卷餅 ( 8-MAR-2021 )

( 8-MAR-2021  MON )

今朝瞓到 9 點半都自然醒 lu   之後里奧大人買早餐   我都要梳洗喇 ~

食完早餐就抖下   之後沖涼   11 點半左右就去銅鑼灣   本來特登請假行山㗎   但天氣潮濕   所以無得行喇   因為我唔要做吸濕大笨象呀   咁唯有轉陣去行街啦   哈哈 ~

坐巴士嘅時候   里奧大人話買個蛋糕比我   佢話仲以為仍然 2 月 ~

今日去 DONKI 呀   即刻諗起上年喺曼谷行 DONKI   以為個場好大   但原來唔大呢 ~

我上次行 DONKI 真係完全無留意首洗腦歌   因為真係好專注睇所有嘢   係差唔多走嘅時候   覺得首歌都幾好聽 ~

今次不得了啦   實在好興奮   一聽到 DONKI 副歌   我就跳住舞咁向前行   笑到里奧大人黐咗線呀   佢話無諗過我夠膽跳呀   我直頭跳到出哂汗   但跳完之後   我話 CCTV 睇到咪肉酸死 ?!   哈哈 ~

我對零食真係非常有興趣家嘛   但里奧大人就真係零興趣   全程企喺我後面   我話不如你搵日去銅鑼灣見客啦   我喺銅鑼灣等你   因為我可以喺 DONKI 行 4 個鐘都得㗎   之後佢話我黐線   哈哈   但我講真㗎喎 ~

 一睇到食物就開心   哈哈

正呀

DONKI 公仔   肯定唔會買   哈哈

之前我都買咗好多零食   所以多數睇唔會買   但見到狗仔零食就會買比 Berry   同埋價錢算平呀   不過選擇唔多囉   不過都打比家姐先敢買   因為 Berry 姐唔係咩都食㗎 ~

我同家姐講話無咩零食好買咁   家姐話買日本麵囉   里奧大人鍾意食嘛   估唔到佢記得   因為星期六同佢講話里奧大人話日丁好味   哈哈 ~

我好鍾意柴犬

似 Berry 細個嘅樣

即刻諗起曼谷嘅 DONKI

牛舌皮只係 $100/2 件  我覺得好抵   因為上次 Berry 都食

呢期又鍾意蠟筆小新

其實我鍾意小白多啲㗎

拉麵都吸引

原來 UHA 味覺糖出咁多嘢㗎

蛋糕都吸引   但如果即場食更好   可惜我唔餓

想買呢啲便當做晚餐   但最後都放棄

周圍都見到 DONKI 公仔

就咁睇已經好吸引   哈哈

魷魚絲好貴

$29.8 好平呀   所以買 1 包嚟試下先

大咀鳥朱古力只係 $5 盒   真係超級勁抵   所以即買比家姐 & 陳老二 & 里奧大人同事

買得唔多嘢   因為唔想拎

有機會想再嚟   因為我今日真係未行夠囉

差唔多 3 點先食嘢   里奧大人話好餓呀   哈哈   我其實掛住睇嘢   係可以唔食嘢都得㗎 ~

同里奧大人食上海嘢啦   見佢陪我行 DONKI 咁好   哈哈 ~

上海粗炒 ($76) - 幾好味喎

菜肉大餛飩 (6粒) ($46) - 超唔抵食呀   哈哈

我話飲唔飲泰式奶茶好 ?!   里奧大人話飲啦   一陣食完晏去買嚟飲 ~

里奧大人話等我懷念一下家鄉嘅味道   佢真係次次都咁講   黐鬼線   哈哈 ~

諗住買奶茶雪糕啦   但疫情關係所以 Closed   可惜可惜 ~

佢哋話公司唔比客人少冰   但少甜可以   不過喺泰國飲嘢係少冰要加錢   咁都明啦   凍飲係 2/3 杯係冰呀   哈哈 ~

$30/杯   曼谷就 45B   咁啦   唔好成日話香港咩都貴   今次話係曼谷特別平啦   咁樣好啲   哈哈 

我 Send 完張相去 FB   差唔多比里奧大人飲哂   佢話佢只係飲咗幾啖   不過呢杯真係 5 啖可以飲哂

行 Sogo 同希慎   之後都搭車番屋企喇 ~

唔知有無人坐呢張櫈呢 ?!   哈哈

希慎有個空中花園   所以入去睇下   見佢咃一路叉電一路做運動   咁又唔錯喎

番到屋企就開機洗衫   之後就休息一下 ~

Curry Ramenyasan Cup ($10) / Nissan 札幌味噌拉麵 ($29.8)

Calbee 殼麥片  ($29.8) / Chocoball ($5/盒)

牛舌片 ($100/2 包)

隻手仔攝落枕頭底   瞓到成個人仔咁

但其實係屈住咗隻手仔   呢隻小肥婆真係好得意

今晚只係開焗爐   真係勁方便   但 7 點半都開餐   因為聽日要番工   唔想太夜食 ~

是日懶餐 - 芝士肉鬆卷餅

芝士肉鬆卷餅 - 清埋 4 塊墨西哥卷餅同 2 塊芝士   我就食之前買 Nachos 用剩嘅芝士醬   估唔到仲好味   今次加少少肉鬆就算喇   始終唔係太餓嘛 ~

洗埋碗就再沖身   抖陣就食埋個荷蘭撻 ~

 10 點自己上床瞓  

睇下電視   11 點幾都瞓覺 lu ~