豉油雞 (外賣) + 旺菜 ( 19-MAR-2021 )

( 19-MAR-2021  FRI )

感恩又一覺瞓天光呀   係熟睡嗰隻   晚晚係咁就好喇 ~

里奧大人 WFH 又陪我食早餐   食完抖陣就番工 lu ~

菇場唔忙呀   依家仲係比較靜 ~

家姐無啦啦打嚟話佢同事尋晚同佢食完飯   出咗門口就話暈同埋搞肚痛   點知真係暈低咗呀   好在坐喺地下咋   但合埋哂眼對眼   合到好實   佢即同另一個同事講話係腸胃敏感   佢阿妹都係咁   之後話打 999   感恩佢同事暈咗幾秒就醒番   但就標哂冷汗   好在佢仲識得叫家姐喺佢個袋拎支白花油比佢搽 ~

家姐話佢啲同事一陣以為佢好勁   一眼就睇到佢係腸胃敏感   哈哈   佢仲諗埋如果同事入醫院要打比邊個邊個   諗得好長遠㗎 ~

所以家姐話終於知道我搞肚痛係會暈   佢話有次同姐夫講   好擔心阿妹一肚痛就暈   姐夫都嚇到吓咗一聲   其實里奧大人都好奇怪點解我係咁   因為我有時同佢出街食得太油同太辣   我係好易搞肚痛同暈   但上次我跌過一次   佢就真係驚喇   唔係以為我平時吹水扮嘢   哈哈 ~   

依家都同里奧大人講話如果我暈   第一時間拍下我   第二係即幫我搽薄荷膏   基本上我應該會醒啩 ~

傾多兩傾   話咁快 11 點 45 分 Lunch Time ~

出去行陣   之後買燒賣+炒麵番菇場食喇 ~

仍然唔忙   又同 8 卦傾偈   真係唔經唔覺做咗十幾年同事   講番以前成日一齊食早餐   佢話我有間餐廳好鍾意去食   我話完全無印象鍾意啲咩 ?!   佢話係鍾意杯奶茶夠濃   嗰下感動㗎   因為連我自己都唔記得嘛   哈哈 ~

1 點幾瞓晏覺   真係爽

諗得好林下喎

放工即走   買埋半隻豉油雞就番屋企喇 ~

里奧大人話今餐好快搞掂  我話唔係呀   要浸菜同煮麵   要等一陣 ~

今晚我就食埋尋晚剩嘅麻辣鴨血   但原來都好辣下   哈哈 ~

是日懶餐 - 豉油雞 (外賣 ) + 旺菜

豉油雞 (外賣 ) - 喺大家樂買半隻 ($65)   三餸兩飯都只係 $100 咋   不過今晚好想食豉油雞先買呢 ~

旺菜 - 呢碟係 1.5 棵   份量都幾多喎 ~ 

洗埋碗就沖涼   今日好鬼熱呀 ~

差唔多 8 點半就睇 "女神降臨"   真係好鍾意睇韓劇   男女主角大配角啲衫都好靚   所以有時睇佢件衫就睇唔切字幕   如果我識聽韓文就好啦   哈哈 ~

無啦啦瞓喺廁所門口   勁搞笑   我話佢應該熱呀   家姐話直頭係   哈哈

10 點半又瞓上床   佢嘅性格真係非常難觸摸   哈哈  

咁影都唔望你   肯定好眼瞓

睇到 11 點左右都瞓   雖然想睇但肯定唔會睇   唔想又追劇追到個人好攰咁呀 ~