黑椒豚肉炒烏冬 + 麻醬青瓜 + 菜心苗 ( 12-MAY-2022 )

( 12-MAY-2022  THU )

感恩一覺瞓天光呀   雖然開冷氣   但天氣涼涼哋瞓覺   真係瞓得好啲咁㗎 ~

我同里奧大人講話又天陰陰落毛毛雨   佢問我係咪瞓得唔好 ?!   我話唔係呀   只係覺得有太陽   個人精神好多咁呢 ~

今朝仍然食奶醬多   尋日同 8 卦傾偈   佢又係日日食粉麵早餐   我話其實唔係想日日食奶醬多   但真係唔想諗食咩   反正又唔難食   所以會日日食囉   佢話佢都係咁 ~

菇場都忙   但可以慢慢做 ~

Lunch Time 落勁大雨   所以食 Fakes + 乳酪 ~

雖然忙   但都會比自己抖下   如果唔係做到個頭好實   反而影響進度仲衰 ~

阿花本身諗住掉   我叫佢比我   哈哈

放工即走   感恩趕到班車    咁就可以好快番到屋企呢 ~

番到屋企無耐   里奧大人都番到嚟   咁叫佢沖涼先喇   唔想佢開完會先沖   因為唔知開幾耐嘛 ~

上次同阿妹傾開紅醋   我話食雲吞會蘸醋食㗎   佢話佢都係咁   之後就送呢支醋比我喇   最正係里奧大人幫我拎番屋企   哈哈

  

今晚 7 點鬆啲可以開餐   呢個時間開餐最好 ~

是日晚餐 - 黑椒豚肉炒烏冬 + 麻醬青瓜 + 菜心苗

黑椒豚肉炒烏冬 - 我都鍾意炒烏冬架   因為夠方便   焗完啲肉再加烏冬炒幾炒就可以了 ~

麻醬青瓜 - 呢期又鍾意食青瓜   加上價錢好平   講緊係比街市仲要平一半價錢呀   包裝又乾淨   所以隔日去買都幾好   順便當運動下 ~

菜心苗 - 又食佢喇   諗起以前鍾意食但最憎拻芯   其實應該當時都係懶煮飯   疫情到依家   我真係煮咗好多餐飯   但又唔係話好辛苦咁   所以家姐同里奧大人覺得我好鍾意煮嘢   我話只係唔抗拒啫   哈哈 ~

洗埋碗就休息下先   里奧大人話想食麥芽糖餅乾   叫我得閒先整   我話即刻整比佢啦   咁等佢開會前有得食   好難得佢話鍾意食呢 ~

抖多陣就跳舞   之後沖涼 ~

里奧大人準時 8 點 15 分開會   開咗 2 個幾鐘呀 ~

今晚用 Tab 睇嘢   睇到 11 點幾   里奧大人話睇到咁夜瞓   我話又係你叫我用多啲嘅   之後佢話只係唔想我用手機睇嘢   無叫妳睇咁夜   哈哈哈哈 ~