水餃拚雲吞 (外賣) ( 14-AUG-2022 )

( 14-AUG-2022  SUN )

今朝 9 點自然醒   咁起身食早餐 lu ~

芝士火腿蟹柳包都幾好味   不過今次又焗燶咗  哈哈

食完抖下先   因為好似無咩力咁   諗緊做唔做家務好 ~

最後都係大清潔廚房   拖地再大清潔廁所 ~

沖完涼又抖下   抖陣就番教會 ~

崇拜完畢就去里奧大人公司   因為佢一陣剪髮   所以一齊買午餐去佢公司食喇 ~

又比錯咗   不過咁又好喎   因為我都想試下豬扒   哈哈

食完就一齊坐車去九龍灣   咁我都行陣 Donki 先 ~

諗住買壽司   但想買嘅要接近 $350 咁滯   我又覺得唔值喎   因為去元氣買都係咁上下價錢   仲可以單叫唔同款   所以最後無買   去街市買水餃同急凍肉 ~

本身一場嚟到就買 2 包棉花糖啦   但突然有啲搞肚痛咁   又有啲暈   最慘無啦啦標冷汗   所以我慢慢行   之後無咩嘢就即去街市買水餃同生果   之後再去凍肉店買凍肉   買完即走 ~

番到屋企真係成身濕哂   個口罩都成個濕哂   所以我真係好怕去街市   熱到人都顛 ~

沖完涼都即刻灘喺梳化   無耐里奧大人番到屋企了 ~

正想瞓下   點知家姐打嚟問要唔要花生糖 ?!   我話真係千其唔好買比我   呢年真係起碼食咗 8 包花生糖   真係食到驚喇   家姐仲話係唔係㗎 ?!?!   之後又問要唔要薑糖 ?!   我話咩都唔要呀   之前菇場有派薑糖   所以食到要拎比里奧大人幫手食呀 ~

今晚唔係咁餓   所以 7 點半先開餐 ~

是日懶餐 - 水餃拚雲吞 (外賣)

水餃拚雲吞 (外賣) - 好耐無食咁呀   但其實因為方便先買   哈哈哈哈   咁加埋 1 棵小旺菜   咁就已經好夠飽呢 ~

洗埋碗就開機洗衫   之後同里奧大人一路食生果   一路睇 "痞子殿下"   今晚睇咗 2 集都幾好笑 ~

香印提子 ($60) - 好甜都埋好脆口   我覺得口感似初初食嘅波子提囉   但依家叫香印   咁又可以貴啲呢 

哈蜜瓜 ($29.9) - 細細個成日食   所以食到驚   係近排先再鍾意食咋   因為天氣太熱   鍾意啲多水份嘅生果   

今晚 11 點左右都瞓覺   希望瞓得好啦   哈哈 ~