蒜頭豆豉蒸脆肉鯇 + 鳳城水餃 + 超甜粟米 ( 19-MAR-2023 )

( 19-MAR-2023  SUN )

今朝同里奧大人食早餐   其實今朝唔餓   但里奧大人知我鍾意去呢間茶餐廳食   所以好開心話今朝早咗可以去食喇   咁我都唔好咁掃興啦   哈哈 ~

食完就陪佢番工   都係同頂爺傾下偈咁   之後又同家姐傾偈   奇怪佢話喺房   因為我以為 9 點   原來已經 10 點   咁同頂爺傾咗成兩個鐘又唔覺喎 ~

頂爺又派糖   之後話皇太后鍾意食拖肥   我即問佢鍾意食咩嘢拖肥   佢話花街圓型同長條型嘅拖肥呀   實在太好   又有同路人   因為我同家姐都好鍾意食㗎 ~

番完學就要番崇拜   今朝水姑都嚟埋   所以就同埋佢一齊食 Lunch 喇 ~

咖哩吉列豬扒意粉 - 好大塊豬扒   薄薄哋都唔錯㗎

洋蔥汁煎雞扒飯 - 里奧大人話食福建炒飯   水姑話肥   咁食蒸肉餅啦   又話肥豬肉   咁叫雞扒啦   真心覺得佢麻鬼煩   人地鍾意食咩就咩囉   咩都話肥一係就話油   要肥就食咩都肥啦   煩   又唔係肥落妳度   我都未驚啦   都係嗰句   又唔係日日食

   

食完就走喇   里奧大人要開會   我要幫家姐買濕紙巾   買完即番屋企   因為每月一到好攰呀 ~

番到屋企即刻開機洗衫   之後沖涼洗頭休息喇 ~

又睇 Youtube   但睇到 4 點左右都頂唔順要入房瞓   瞓咗半個鐘真係精神好多呢 ~

里奧大人 6 點幾先番到屋企   咁我都煮晚餐了 ~

是日懶餐 - 蒜頭豆豉蒸脆肉鯇 + 鳳城水餃 + 超甜粟米

蒜頭豆豉蒸脆肉鯇 - 第一次咁蒸   但咁都好味㗎 ~

鳳城水餃 - 尋晚食剩   今晚再加埋 3 隻鮮冬菇一齊煮 ~

超甜粟米 - 又係尋晚食剩   好在記得咋   因為我本身諗住開罐粟米湯呢 ~  

洗埋碗就沖涼   食埋生果就睇電視 ~

里奧大人同事嘅手信   佢次次會留比我食   佢拎出嚟嘅時候話唔好意思塊餅碎咗   佢話頭先都好驚整碎㗎喇   之後佢話依家有 4 塊係咪仲開心呀 ?!   痴鬼線   真係好意思講   哈哈

我有時都好似佢咁嘅姿勢瞓㗎   哈哈

睇到 10 點半都瞓覺喇   估唔到咁早眼瞓   實在太好了 ~