譚仔雲南米線 @ 紅磡 ( 11-JUL-2026 )

雖然我都大食   但今次我只係食咗芽菜同豆卜   我真係好飽食唔落其他呀

( 11-JUL-2026  SAT )

尋晚瞓得都 OK 呀   瞓到 8 點 20 分先起身呢 ~

早餐食 Flakes 加豆漿   番到菇場先沖咖啡飲喇 ~

本來諗住買粉果套餐   咁唔駛自己沖咖啡   但佢得 1 隻粉果+4粒燒賣   不過我只係想食粉果囉   所以唔買 lu ~

菇場唔忙   所以第一時間沖杯咖啡先   家姐問係咪咖啡機 ?!   我話公司係有但我唔用啦   我唔想洗嘢呀 ~

我上緊網睇嘢   家姐打嚟話見到我識嘅人   我以為係陳老二   之後我話係 CC 啦   家姐話係佢叫 CC 添   佢哋真係好有緣呀   因為家姐見惠康有折先去買榴槤   本身行去藥房先㗎 ~

之後就收到 CC Whatsapp 話見到家姐   佢哋以前成日喺巴士站見到   但家姐 WFH 之後就少見好多喇 ~

一陣會同家姐食晏   佢話阿莊會過嚟陪我哋   我話無問題啦   我都好耐好耐無見過佢呀 ~

家姐問佢記唔記我阿妹咩樣 ?!   佢話記得    因為好似媽咪個樣   家姐話咁妳係咪都記得我媽咪咩樣先 ?!   哈哈 ~

放工即走   出去花園街行下先   經過八珍甜醋就睇下啲涼果   但都幾貴所以都係唔買住喇 ~

咁即去 Boutique 睇裙啦   點知執咗   所以去奇趣餅家買埋紅豆燒餅就走 lu ~

又經過八珍甜醋   最後都係買咗包薑比里奧大人   同埋其實依家涼果都係貴   咁就買包試咗先   里奧大人覺得好食先再買   哈哈 ~

梅薑粒 200 克 ($88)

買完再去龍豐行下   因為我一定要行有冷氣嘅地方   之後家姐打嚟話到咗附近   咁約埋佢一齊行去食店喇 ~

估唔到家姐都買咗甜品   又會咁啱嘅   呢刻真係覺得心靈相通呀   哈哈 ~

見到布甸包就好開心   因為我想食好耐呀   之後家姐話做咩唔同佢講   我話唔會講囉   唔係妳又一定特登去買嘛

芋蓉麻糬布甸 ($25/2 個) / 開心果麻糬布甸 ($25/2 個) / 朱古力麻糬布甸 ($25/2 個)

黑芝麻麻糬布甸 ($25/2 個) / 法式布甸包 ($16/個)

阿莊拎件無餡嘅年糕   我話拎件有餡啦

杜拜開心果脆皮牛油年糕 & 鹹蛋黃牛油年糕 ($50/4 件)

芝士吐司好似 $29   家姐同我每人 1 條

家姐話其實布甸包係買埋比阿莊嘅阿哥同阿媽   點知阿哥好糖尿前期   阿媽呢排又食得清   之後家姐話呢個包係藍莓橙皮合桃嚟㗎   阿莊話阿媽都鍾意食健康嘢   家姐即刻比哂佢   唔係佢會覺得無嘢比阿莊阿媽係唔好意思咁呢

家姐好搞笑   佢話買咁多嘢   不過姐夫又唔鍾意食呢啲   無買比姐夫好似好衰咁   所以買個紙包蛋糕比姐夫   之後我話好邪呀   頭先我睇咗八珍啲薑好貴就唔買比里奧大人   但覺得佢鍾意食薑又唔買好似好衰咁   所以就番轉頭再買呀 ~

家姐話買咗 $282   我話上次船頭先講依家買麵包都唔平   最慘係有啲仲係空氣包   所以佢依家又自己焗麵包 lu ~

分好哂啲嘢就叫嘢食喇   主要都係我同家姐食   因為阿莊已經食咗飯   旨在傾下偈呢 ~

阿莊話我真係好似媽咪   其實個個見過媽咪再見我   都話我好似媽咪㗎 ~

日本柚子茉莉花抹茶 - 好飲呀   之後家姐話我鍾意飲橙C咖啡咁   哈哈

青嵐草莓綠茶拿鐵 - 呢杯又係好飲   啱哂家姐嘅口味

烤雞咖哩蛋包飯 ($85) - 我話塊雞扒好好味呀   因為我從來覺得雞扒係無味可言   之後家姐話佢就係覺得好味先叫呀   但佢叫嘅時候無講   所以佢碌大對眼話妳都覺得好味呀   哈哈

原條蒲燒鰻魚蛋包飯 ($128) - 家姐見到原條呢兩個字覺得好吸食   又問我食唔食鰻魚 ?!   我話食呀   不過我哋食咗 2/3 條鰻魚咋   蛋包飯同柚子蜜雞翼要打包呢

綠茶 / 黑糖蕨餅 - 都幾煙韌   但我唔係咁鍾意黃豆粉

抹茶卷北海道十勝紅豆 ($58) - 抹茶卷好味呀   之後家姐食粒小丸子   再話妳最鍾意食呢兩粒嘢   咁我真係好鍾意食小丸子㗎   但里奧大人 CC 同阿濤就好嫌棄   話唔明點解咁鍾意食   我話因為夠煙韌囉

抹茶芝士蛋糕 ($65) - 呢個又係好味呀   因為我鍾意食芝士蛋糕

食下傾下又已經 3 點 45 分   家姐要去做嘢   所以都要走喇 ~

比錢嘅時候   收銀機喺我隔離   家姐話用手機支付寶   但就將部手機比我   咁我就拎銀包嘟八達通   職員笑住話點好呀 ?!   我話梗係八達通啦   因為我將家姐部手機擺喺我銀包下面 ~

家姐話做咩妳要請食飯 ?!   我即刻話咁妳又做咩要請食飯 ?!   佢個樣呆咗呀   哈哈哈哈 ~

感恩 2 分鐘後有巴士   番屋企放低哂嘢   再去買酥皮蛋撻比里奧大人啲同事   佢唔知我會嚟呀   所以佢都好愕然   哈哈 ~

買咗 10 個酥皮蛋撻

抖陣就去惠康買嘢   買完就番屋企放低啲嘢   再去里奧大人公司   佢話一陣 7 點半要開會   我同阿妹都以為聽錯   原來係臨時開嘅   咁無辦法啦   解決問題要緊   同埋最緊要咁啱約齊人呢 ~

鮮家煮意雞中翼 ($48) / 荷蘭豬梅頭扒 ($39.90) / 袋裝南非臍橙8個 ($20.50) / 菜 ($5)

今晚 6 點半去食米線   里奧大人食完就番公司   我就番屋企喇 ~

家姐特登拎比我㗎   我話聽日都去妳屋企   妳拎比我做咩呀 ?!   佢話好輕之嘛   我話輕都係咁話啦   我聽日拎咪得囉   依家妳拎完比我   我又拎番屋企   妳輕輕鬆鬆出嚟就得啦

開埋機洗衫就沖涼    抖陣就熨 2 機衫   里奧大人頭先叫我留比佢熨   我仲以為話我熨得皺   原來佢話叫我休息下好過   不過我梗係唔會啦   佢呢排咁忙   寧願佢多啲休息好過 ~

里奧大人 10 點番到屋企   沖埋涼聽陣歌   佢 11 點都瞓覺   但我就可能 3 點先飲杯綠茶   所以唔眼瞓   差唔多 11 點 50 分先瞓呀 ~