蠔油薯仔炆雞翼 + 臘腸粒炒飯 + 蕃薯糖水加湯丸

做一個家庭主婦真係唔容易    做女時唔覺   但為人妻之後就覺得家庭主婦真係好難做呢

做女時   媽咪煮得唔好食   我會唔食   仲要衰衰咁彈 

依家為人妻   唔單止要諗食咩   仲要諗埋啱唔啱另一半食喎   好在里奧大人只係唔好辣   其他都食嘅   因為我識煮嘅有限   再彈三彈四就唔駛旨意有飯食架喇  

除咗海鮮  新鮮嘅魚  雞之外   其他都會學下嘅    因為唔學下   來來去去都係食果 d   里奧大人唔好意思開口話悶   我都食到悶啦     好在   我都叫做有心機整嘢食   如果唔係就慘 lu   

尋晚屋企有隔夜湯   所以諗一個餸就搞掂   突然好想整糖水   所以又整埋蕃薯糖水喇  

是日晚餐 -  蠔油薯仔炆雞翼 + 臘味粒炒飯 + 蕃薯糖水加湯丸
蠔油薯仔炆雞翼 - 唔知點解成日都痴底   d 雞翼整到甩皮甩骨咁     最煩係有排洗嘛  

臘味粒炒飯 - 前一晚食剩嘅臘腸臘鴨   加埋成個星期嘅冷飯    好環保呀  

蕃薯糖水加湯丸 - 今期黃心蕃薯唔甜   好在加埋湯丸   唔係無喱味道都幾難食  

沖埋涼睇陣電視就要瞓覺 lu    時間真係過得好快呢  

  

今朝勁早番到公司附近   所以食吉列魚柳 + 奶茶    一路食一路睇下報紙   勁嘆呀  食完心情都好 d 呀  

番到菇場有嘢做   但唔知點解無咩心機做   可能已經有 holiday mood 喇  

里奧大人去大陸    所以晏晝自己食   食好耐無食過嘅 7仔撈麵 + 碗仔翅 + 另一檔嘅燒賣     超飽呀