獨沽一味 (青紅蘿蔔粟米栗子豬骨湯渣 ( 24-DEC-2008 )

尋朝九點要起身喇...因為阿 Jack 受浸呀

去到教會附近餐廳食早餐...食牛肉米線配煎旦 + 熱好立克...而里奧大人食炸菜肉絲腸仔配煎旦 + 多士 + 熱華田 ($41)...本來好想食牛肉腸...但食完個米線已經飽到呢...好立克都飲唔落呀...嘥哂...仲點食喎...

去到自己教會啲感覺真係唔同...好 Warm...唔似過客...但要等里奧大人下年底完成 MBA 課程先可以番自己教會祟拜...都幾耐下...

祟拜完之後要番屋企喇...因為里奧大人要趕功課...如果唔係 25 號...26 號...31 號都要番喺屋企做功課...要取消所有約會...我唔想...

落車去超市買咗 $24 豬骨...再買 Cream Cheese + 益力多...番到屋企放低嘢就去大家樂食下午茶...食油占厚多士配奶茶 + 燒鴨瀨配咖啡 + 叉燒瀨配檸樂...勁飽...所以奶茶要拎走...不過最後都唔記得飲...

之後里奧大人陪我去街市買重型物品...2 個紅蘿蔔 + 1 個青蘿蔔 +  3 條粟米 + 半磅栗子 ($30) + 1 份木瓜 ($12)...之後歸家...

是日晚餐 : 青紅蘿蔔粟米栗子豬骨湯渣

番到屋企即刻預備煲湯...青紅蘿蔔係咁劈..粟米栗子係咁拻...豬肉係咁飛水...之後煲兩個半鐘...搞掂...

之後忙煲藥...忙洗衫...忙抹窗...忙執廚櫃...忙執 CD 櫃...攰到吖...6 點半先可以睇下報紙咋...睇到 昂平 360 又無端端會停...好驚啊...幾時先會正正常常運作呀...因為我好想去坐下呀...其實我坐摩天輛...纜車都會好驚...我會雙手捉實條柱...唔敢郁...所以次次落車對手都會作抽筋...以前都可以玩下機動遊戲嘅...但個人越嚟越成熟就越嚟越唔敢玩...今年同里奧大人去 Ocean Park...除咗玩 3 歲小朋友都可以玩嘅旋轉遷秋同摩天輛外...(坐遷秋驚飛咗出黎....坐摩天輛驚跌咗落嚟...玩完已經嚇到半死)...所以...之後所有機動遊戲一律免問...仍唔準里奧大人玩...去 Ocean Park 純粹係影相...睇 Show...睇海豚海獅表演...睇水族館...所以里奧大人喺果日講咗九十幾次話係觀光團...下次唔會同我去喎...好巴閉咩...

開飯喇...應里奧大人強烈要求...今次就咁湯 + 渣就當晚飯...唔飽食生果喎...清清哋咁話喎...唔係講笑...真係飲湯食渣都飽到上心口...

之後就忙洗碗...忙熨衫...忙拖地...攰到連敷 Mask 都無力呀...

今朝食開早餐嘅餐廳無開...所以買咗炒米粉 + 燒賣 ($8) 番公司食...份早餐抵到笑...因為原來仲有條腸仔...之後再飲公司免費供應嘅 Nescafe...好滿足呢...

晏晝同媽咪...婆婆...工人去食元氣壽司...4 個人...$153 找數...又係抵...所以我請啦...

番到公司好無 Mood 啊...因為應該無得放早...家姐公司有 Party 同放 2 點半...里奧大人公司又有 Party...CC 公司又有 Party...不過我公司做冬就有 Party...但我覆診無去到...所以都叫做有 Party...

但公司有好消息...就係 2008 年全年有長短週...一大喜訊呀...