照燒金菇雞扒 + 粟米蛋花湯 ( 3-FEB-2013 )

( 3-FEB-2013  SUN )

今朝 9 點半起咗身喇   所以去金姆指食早餐   因為我好想食蕃茄牛肉通粉呀 ~

食完就去惠康辦年貨   之後番到屋企沖涼   抖陣就番教會喇 ~

鐘點黎咗抹嘢   我可以唔駛做咁多   所以陪里奧大人去舖頭拎衫   行陣就番屋企 lu ~

今次聽道   終於令我明白點解要 "快快的聽 慢慢的說 慢慢的動怒"   即係要專注聽神嘅話語   如果講員講緊一個關於自己唔好啲嘢   用嚟分享   我哋唔可以嬲   咁樣就聽唔到上帝嘅說話   我哋反而要感恩   講員帶出神嘅話語出嚟   我好慚愧   自問唔係一個虔誠嘅基督徒   思考之後無實踐真道   因為虔誠唔係講出嚟   係要做出嚟   詳細察看   時常遵守   實行出來就必蒙福   希望我會做到 ~  

唔多 3 點就食嘢   又去金姆指   因為我勁想食麻辣米線 ~ 

今晚早啲食飯   咁可以多啲時間休息呢 ~

是日懶餐 - 照燒金菇雞扒 + 粟米蛋花湯

照燒金菇雞扒 - 金菇係上星期二買   好在無壞咋   本來想整黑椒汁   不過里奧大人話生痱滋   唔食辣喎   所以用照燒雞翼醬汁   加埋雞肉腸   顏色靚啲   唔駛白雪雪咁 ~

粟米蛋花湯 - 今日真係唔想煲湯   所以滾粟米湯算喇 ~

食完飯洗埋碗就沖涼   之後食糕同士多啤梨   一路睇 " 街坊廚神" 一路食   搞到勁想食鹹嘢 ~

睇完聖經就瞓覺   唔可以偷懶 ~