Green Monday 豆豉炒甜豆秀珍菇 + 菜心 + 芫茜馬蹄皮蛋湯 ( 25-FEB-2013 )

朱古力蛋糕 @ Italian Tomato - 超勁多 Cream 不過好滑   都唔錯  

( 25-FEB-2013  MON )

估唔到尋日晏晝 3 點幾飲完杯凍咖啡之後就超級精神   所以唔係喺眼瞓情況下瞓覺   係會瞓得唔好呢   今日仲係星期一添 ~

今日係 Green Monday   希望我可以維持落去啦 ~

早餐食奶油多   多士真係無咩好選擇 ~ 

番到菇場都有啲嘢做   想抖嘅時候又有嘢做咁囉    不過居然有眼瞓嘅感覺   因為我好耐都無試過咁呢 ~

Lunch 食炒米粉   平時多辣油又唔覺辣   今次多辣油   食到個胃有啲痛添   太耐無食辣喇 ~

又係做下抖下   但無啦啦 3 點幾有啲餓   好在有朱古力頂住 ~  

放工即走喇   去街市買餸   好耐無買餸喇   即代表好耐無煮飯   里奧大人真陰公呢 ~

諗住煮菜呀豆呀呢啲唔駛咁多時間   但浸呀出水呀都用咗唔少時間   搞掂哂再開機洗衫   好攰呀 ~  

是日懶餐 - 豆豉炒甜豆秀珍菇 + 菜心 + 芫茜馬蹄皮蛋湯

豆豉炒甜豆秀珍菇 - 我覺得豆同菇就咁用蒜頭炒好齋咁   所以加啲豆豉醬同辣豆板醬一齊炒   惹味好多   最緊要里奧大人肯食   因為我都想盡量唔好食咁多肉呢 ~

菜心 - 菜檔趕住收檔   所以 $9/斤減到 $7/份   超抵不過唔甜 ~

芫茜馬蹄皮蛋湯 - 里奧大人話尋晚打完邊爐   喉嚨有啲唔舒服   咁我即做嘢啦   呢個湯夠哂清熱氣㗎 ~

諗住自己食飯先   點知里奧大人 7 點半打嚟話放工   咁我就等埋佢一齊食啦   見佢拎住個 Italian Tomato 盒   即係買咗生日蛋糕比我   算佢啦 ~

搞掂哂就即沖涼喇   之後里奧大人去沖涼啦   拎個手提入廁所   仲鎖埋門   唔知搞咩 ~

到 10 點半喇   見佢無表示   咁我就話我刷牙喇   原來佢已經拎咗臘燭入廚房   捧住個生日蛋糕   再播埋生日歌   原來頭先佢拎電話入廁所係 Download 生日歌   真係估唔到佢有心思   百年難得一見   佢話驚聽日正日陪唔到我食生日飯   所以今晚同我提早慶祝呢   好感動呀 ~