黑椒汁豬扒 + 豆苗 ( 15-MAR-2017 )

( 15-MAR-2017  WED )

今朝里奧大人上大陸   之後我都瞓下醒下等鬧鐘響呢 ~

早餐食菠蘿油   又係叮熱   所以啲牛油溶哂   變咗成個包都濕立立咁   個皮又唔脆   下次唔食 lu ~



同親 8 卦食早餐   佢一上巴士就 Whatsapp 問我喺邊   如果去食新嘢   就要叫我 Send 餐牌比佢睇   再幫佢叫   如果去老地方   就直接話食咩   我話佢同里奧大人一樣咁心急   我食嘢唔係咁鍾意叫定囉   除非趕時間   我覺得啲嘢嚟咗擺喺度又未食得   啲人又嚟行去   成個餐舖哂麈咁 ~

菇場勁忙呀   好耐無試過喇   又感覺到番工 feel 呢   哈哈 ~

Lunch Time 未餓   所以去買埋菜同雪梨同大樹菠蘿   買完再去買嘢食番菇場呢 ~

抖多陣又開工喇   不過放工都未做完   聽日再做   呵呵 ~

放工即番屋企   浸下菜又整呢樣嗰樣   好快又 7 點幾   里奧大人都番緊嚟   我都要預備喇 ~

想整嘢嘅時候   姑奶打嚟話聽晚佢約咗人食 Buffet   所以煲唔到牛肉湯   仲話聽晚妳哋二人世界啦   我心諗   唔煲仲講到懶好咁   頂佢唔順 ~

咁我即打比里奧大人啦   佢就咁一聲: 哦   我想串佢㗎   又講到佢家姐對我咁好咁好   依家咪一樣無煲   如果佢話番姑奶應承咗又唔做   我就會覺得佢做人公平喇   依家佢屋企人衰咗就唔出聲   所以呢   我都成日話架   對人好唔該唔好成日得把口講   係要行動出來   同埋唔該講得出就做出來   唔係就唔好講囉   唔該   依家佢食番哂自己講嘅嘢   極之樣衰呢 ~ 

是日懶餐 - 黑椒汁豬扒 + 豆苗  

黑椒汁豬扒 - 之前信 Counter 嘅女人   話巴西豬扒唔駛剁都唔 "鞋" 嘛   咁上次無剁啦   煮出嚟 "鞋" 過我塊臉呀   所以今次都係剁喇   真係好食好多啦   第一次覺得自己煮豬扒有啲 Juicy 嘅感覺   好開心呀 ~

豆苗 - 半斤 $11   好在買半斤咋   今晚可能食麵關係   好似好快飽咁   如果煮 1 斤   真係要夾硬食 lu ~

搞掂哂就沖涼   食埋大樹菠蘿就休息喇 ~



睇多陣電視   11 點即瞓   今晚有啲攰   哈哈 ~