Curry Bee Japanese Curry Shop @ 銅鑼灣 ( 11-MAR-2017 )

咖哩飯套餐 ($85)
牛肉咖哩飯 - 最鍾意食珍珠米   估唔到咁多咖哩汁   正呀   食哂啲飯仲有好多咖哩汁剩咗呢

   

1/2 湯蕎麥麵配炸野菜 - 細細碗就啱喇   但我唔明點解唔將野菜餅分開上   浸到腍哂好難食囉   



燒八爪魚丸 ($25) - 抵食喎   同埋都好味呀   不過真係好飽   所以食剩一粒   好在今晚無一人一碗飯同麵咋   唔係仲更加嘥嘢    



( 11-MAR-2017  SAT )

今朝 10 點幾自然醒   梳洗之後都差唔多 11 點幾   要去食早餐喇 ~



本來諗住好天就一定行山   麻麻哋好天但唔落雨就入長洲行下小長城   不過今日天氣灰暗又落毛毛雨   兩度都唔駛去 lu ~

番到屋企沖埋涼就抖陣   但我勁想出街   所以話去銅鑼灣行下啦 ~

臨落車聽到樓下有兩個男人鬧交   應該肢體碰撞咁啦   我聽到阿 A 話阿 B   咁巴閉坐的士   又話有女人喺度就講聲大大   我好驚男人鬧交   因為多數鬧鬧下就打交咁   但到站嘅時候又無哂聲氣   可能落咗車 lu ~

好記得家姐嗰時同我講   話佢搭巴士   咁仲要企喺度   但有個女人成日用袋頂住家姐   日日都係咁   咁果時我同家姐都未結婚嘛   會同埋媽咪一齊食早餐   咁我見到學英文嘅同學   叫佢坐埋一齊食早餐啦   咁我介紹啦   食完就各自走   之後家姐同我講   呢個同學就係成日用袋頂佢嘅女人   原來世界真係咁細 ~

差唔多 1 點幾先出門口   咁行陣先去南記食嘢   咁我去排隊買嘢食   後面個印傭係咁向前挨去睇餐牌   我揹住背囊嘛   佢係咁頂咗 4 次   駛唔駛咁心急呀   仲有成 10 個人先到我哋   之後我頂唔順啤一啤佢   同埋我好憎啲人   喺超市推住架車排隊比錢   係咁將架車隊住妳   其實架車隊到人都知啦   又唔 Say Sorry   好討厭囉 ~            

唉   南記依家唔好食咗之餘   服務態度又差   頭先我叫阿姐收隻人哋飲完嘅杯   佢收完就啤一啤我咁   不過見佢都幾老   都唔話佢咩態度呀 ?!   咁里奧大人話佢頭先坐另一張枱   等咗 10 分鐘都無人嚟收嘢   所以轉枱   唔怪得我見啲人將個盤放喺地下啦   咁搞法都唔想再幫襯佢 lu ~

改咗名叫辣豬肉春卷米線   以前係叫豬腩肉嘛   同埋我覺得好大陣豬味呀   我最驚呢   呢餐食咗 $124   我覺得依家食粉麵都好貴下



食完又周圍行下   其實真係無咩好行   哈哈 ~

去 Aland 睇衫   見到件長薄褸 $199 覺得勁抵   諗住買件藍色   咁叫里奧大人幫下眼啦   仲話 $199 勁抵   所以要買   之後佢幫我再睇價錢   原來係 $899 呀   呢排成日眼濛濛無計啦   好在佢睇下咋   唔係比錢先知 $899 就慘 ~   

諗住坐車出九龍城食泰菜   但已經 5 點半   我驚出到去要等位   所以都係喺銅鑼灣食埋先番屋企呢 ~

行呀行   見到間食拉麵都唔錯   咁就入去啦 ~

食完抖陣就坐巴士番到屋企喇   番到去都差唔多 8 點   沖埋涼就開機洗衫   之後休息喇 ~

睇埋電視   11 點半即瞓喇   反而里奧大人話未眼瞓   咁我唔理喇   呢排天氣咁樣   真係好似瞓極唔夠咁   所以瞓到就即瞓㗎喇   哈哈 ~