煎蝦卷 + 蒜蓉蒸節瓜 + 干燒伊麵 ( 13-AUG-2017 )

( 13-AUG-2017  SUN )

今朝諗住 8 點起身就番早堂   點知里奧大人話尋晚瞓得唔好   話瞓到 10 點番午堂算 lu ~

咁其實我都瞓得唔好呀   唔知係咪食咗榴槤   個人好熱咁囉 ~

起身即沖埋涼   搞掂哂就食早餐   之後番教會喇 ~

崇拜完都差唔多 1 點   我哋都走先   咁里奧大人去圖書館搵資料   我就行陣商場先番屋企 ~

番到屋企開 Youtube 睇沖遊泰國   真係越睇越開心   哈哈   睇介紹嘢食時   睇到有啲餓添呀   所以食埋 2 塊豬肉乾   終於清哂 ~

又唔想出去徑步   咁熨衫當做運動啦   熨咗 2 機衫   開始有啲攰呀 ~

叫里奧大人 5 點半都要番屋企喇   因為要飲埋湯   咁佢番到嚟   我就啱啱滾番熱啲湯 ~

飲完就幫佢染髮   佢就爽啦   可以沖埋涼   乾乾淨淨食晚餐 ~

今晚要清埋盒榴槤   所以 7 點都要開餐喇 ~

是日懶餐 - 煎蝦卷 + 蒜蓉蒸節瓜 + 干燒伊麵  

煎蝦卷 - 煎 5 條算喇   其實我都唔想食   但無理由開鑊就咁煎 3 條嘢家嘛   真係好嘥 Gas 囉   哈 ~

蒜蓉蒸節瓜 - 飲完碗湯都好飽   都係蒸 1 條算喇   仲有 3 條   等我之後再煮啦 ~

干燒伊麵 - 之前已經買咗罐頭草菇   但諗諗下都唔開住   因為一罐大嘅實食唔哂   寧願留番下次再整   其實呢個應該叫韭黃炒伊麵   哈哈 ~

好喇   到我搞掂哂沖埋涼   抖到 8 點半就食榴槤喇   仲食剩 2 嚿   留番聽晚食啦唯有   一係唔食   一食又要食三晚 ~ 

里奧大人睇書   我就聽歌   之後再睇下支 "迷你麥克風" 點玩   原來好易用㗎咋   就咁 Download 個 Apps 就得   第時可以喺屋企唱 K 喇   哈哈 ~   

今晚 11 點半都瞓   希望瞓到啦   唔好又熱到瞓得唔好喎 ~