鹹蛋節瓜肉丸湯飯 ( 14-AUG-2017 )

( 14-AUG-2017  MON )

嘩   又真係熱到瞓唔到咁喎   唔通榴槤真係咁補 ?!?!

今朝瞓到 7 點 45 分呀   但起身仍然攰添 ~

早餐食奶醬多   其實唔想食甜嘢   但因為佢唔會好飽   所以食囉 ~



菇場勁忙呀   好在忙   咁無咁眼瞓   哈哈 ~

Lunch Time 同高妹一齊搭 Lift   其實好怕同佢搭 Lift   因為佢講嘢都大聲   仲要係講唔停   今日我又攰   佢問我嘢   我答完佢已經無再講嘢   但佢就不斷重覆又重覆講   堅煩囉   人哋無表情無反應   妳就唔該醒水啦   仲係度講講講   真係好想叫佢收聲呀 ~

行去食粥   但食埋今次唔想再食   可能今次唔好食啦   哈哈 ~



好鬼熱呀   已經慢慢行   下次都係唔好行咁遠食 Lunch 喇 ~

菇場忙下停下   唔知頭先係咪熱得滯   所以個人好攰呀 ~

放工即走   番到屋企拖地   之後開機洗衫同煮飯喇   7 點唔夠可以開飯   呵呵 ~

是日懶餐 - 鹹蛋節瓜肉丸湯飯  

鹹蛋節瓜肉丸湯飯 - 加咗 3 粒 Ikea 肉丸   本來唔想加架   但驚湯飯無味   呢個湯飯材料係 1 個節瓜 + 1 隻鹹蛋 + 1 隻皮蛋 + 3 匙更冷飯   基本上都九唔搭八   但唔理喇   想清哂啲嘢呀   其實仲有 1 碗冷飯   不過真係食唔到   所以又留番聽晚呢 ~

食完好飽呀   但唔想去徑步   咁就抹下櫃啦   抹完真係成身汗   要即沖涼喇 ~

其實我依家都覺得自己好勁   番到屋企唔駛開冷氣住   今晚食湯飯都唔覺熱添呀   咁當然要開風扇周圍吹下啦   唔係會焗死   哈哈 ~

沖埋涼就開冷氣喇   食埋 2 嚿榴槤   終於食哂喇   有解脫嘅感覺   同埋真係唔可以放太耐囉   一打開雪櫃成陣榴槤味   我就唔係咁鍾意囉 ~

11 點幾有啲眼瞓   希望瞓到啦   如果真係又熱到瞓唔到   咁真係未必再敢食榴槤喇 ~