金坊泰國美食 + 豬仔糖水 @ 紅磡 ( 23-AUG-2017 )

青檸汁燒豬頸肉 - 燒到燶燶哋嘅豬頸肉真係好味   但有啲係好多肥膏咁囉   所以唔係幾咁食咁多   哈哈   以為咁大碟啦   原來中間係芥蘭   底層係生菜絲   



青木瓜絲沙律 - 唔辣嘅   



海南雞飯 - 好味呀   本來想連雞皮一齊食   但最後都係接受唔到咁食   哈哈     



蒜蓉麵包條 - 無咩特別   但家姐話食到一陣咖哩味    



香辣乾炒河粉 (牛肉) - 呢個好味   



雜錦拚盤 - 蝦餅唔好食   食麵粉咁   香葉包雞就仲恐怖   有陣 "壓" 味   咁食剩一嚿嘛   剪髮表妹話同大表 Share 食   佢哋一食就吐出來   話有陣味   我話係咪羶味 ?!   佢哋話唔係   家姐直頭話好似雞 Pat Pat 咁 (但其實佢又無食過雞 Pat Pat 㗎喎)   咁我話試下先   我頂   一食真係即吐出來   壓到咁鬼樣嘅   係咪壞咗㗎 ?!   但最最最離奇係大食唔覺得有味囉   定係咁啱佢嚿無味呀 ?!



馬拉盞炒椰菜苗 - 我勁鍾意食椰菜苗   



@ 豬仔糖水

慕黑冰山 ($39) - 朱古力綿綿冰底 + 士多啤梨花瓣 + 棉花糖 + 咖啡點子 - 賣相有啲嚇一嚇

佐治糰子 - 日式抹茶凍 + 紅豆 + 小丸子 + 豆腐花 + 綠茶雪糕 ($29) - 我見到白色就覺得好似豆漿   之後問家姐係咪熱   真係黐線   有雪糕嘅點會熱食呀   哈哈

PP 島 (鮮果 + 曲奇/朱古力雪糕 + 芒果條 + 大西米 ($35) - 雪糕底係有啲生果   無咁漏   



比利時朱古力心太軟 - 雪糕 + 藍莓/香蕉 + 士多啤梨 ($45) - 我無食   因為我已經好飽   



( 23-AUG-2017  WED )

今朝如常 7 點 40 分起身   第一時間開電視睇啦   原來已經 8 號風球了   仲會話掛兩三個鐘   所以今日應該都唔駛番工㗎喇 ~

穩陣啲再睇埋手機啦   發覺係 3 號風球 ?!   真係嚇死囉   始終個人都濛濛瀧瀧咁嘛   之後再定一定神   原來手機無開數據   所以仲係尋晚嘅資料囉 ~

之後家姐打埋比我話 8 號風球   咁我就可以安心咁瞓咯   呵呵 ~

不過聽到出面係好大風囉   應該都係橫風橫雨㗎喇 ~  

瞓到 10 點半都醒喇   一開電視係 10 號風球呀   呢隻 "天鴿" 都好勁呢   所以見無雨就即刷牙落樓食早餐喇 ~ 

   
上網睇番資料   原來 8 點 45分發 9 號風球   之後 9 點 10 分改發 10 號風球呀 ~

食完早餐就番屋企 Hea   咁又上 Youtube 睇旅遊節目啦   再睇新聞   話 2 點 10 分會改發 8 號風球   因為今晚約咗家姐婆婆同剪髮表妹食飯   所以成日要昅住天氣情況囉   哈哈 ~

好快又 3 點幾   本來唔餓㗎   但睇見節目介紹嘢食   睇到想食嘢   所以食條雪條止止癮   之後無啦啦好眼瞓   瞓咗半個鐘   精神哂   呵呵 ~ 

4 點 45 分話將會改發 3 號風球   咁 6 點前都應該改發 3 號㗎喇   即係今晚可以出去食飯呢   其實如果今晚食唔到   就要改到 9 月中㗎喇   因為表妹唔得閒呢 ~

婆婆真係好恐怖   家姐話由出門口開始   都唔知有無 20 分鐘   婆婆已經打咗 4 次比佢   不過佢只係聽咗 1 次   大佬   落雨聲又嘈   手機又放喺手袋   一手又拎遮   聽唔到妳都唔駛咁快再打嚟啦   救命 ~

我約咗家姐一齊坐車去婆婆度   咁表妹早到咗   所以叫佢睇有咩舖頭開   佢話板長 雞煲同泰菜都開咗   咁我話泰菜啦   啱婆婆多啲 ~

今晚本來約埋護士表妹一齊食㗎   不過佢住得遠   所以唔出啦   同埋今晚係無預大食嚟㗎   估唔到佢又嚟   原來係佢媽咪話阿婆同阿妹食飯   所以佢又跟埋出嚟   因為我同家姐同表妹喺群組度話約婆婆食飯家嘛   由始至終都無預大食   哈哈 ~

一坐低就叫嘢食   因為大家都好餓呀 ~

上次同表妹食飯   佢就係話唔想成日食泰菜   估唔到   今晚又係食泰菜   邪到呢 ~

食呀食   傾呀傾   真係好鬼開心   剪髮表妹仲講定話下次去荃灣食辣雞煲   咁都好   可以幫我修下前面啲頭髮   之後我話唔比錢㗎   佢即話妳問大表姐   佢修前面幾時收過妳錢呀 ?!   我話我都無試過就咁修前面啲頭髮囉   關我鬼事   哈哈 ~

表妹喺日本買比家姐   佢話試咗一滴都好辣   我記得之前表弟食過一滴   都話辣到死死下   咁我同家姐講話最多滴 3 滴好喇   點知佢又倒咗半湯匙   我都成日話食辣唔係咁食囉   試咗辣嘅程度先   咁我試咗 1 滴   堅辣囉   過咗 10 分鐘都仲 Feel 到係辣   家姐今次都話辣呀   要叫多杯芒果沙冰   之後我哋咪話佢囉   一早講咗已經好辣   所以今次表妹好有滿足感   終於聽到大表講好辣   哈哈  



表妹都買咗盒薯角比我   不過我同家姐 Share 每人 4 包   呢包之前係出薯條嘅   依家出咗薯角   所以佢買比我試下

表妹成日都唔想食完飯就即走   咁又係   難得見面   之後佢話請我哋去 Haagen Dazs 食雪糕喎   因為今晚大表姐請食飯   呵呵 ~

因為已經 8 點幾   驚婆婆要瞓   咁叫工人接佢啦   咁之後表妹話其實想叫埋婆婆一齊食雪糕   我話又唔早講   所以叫大食即刻叫番婆婆番嚟食雪糕呀 ~

咁諗住去隻船附近度食雪糕   但途經見到有間糖水舖   咁啱又有位   就即入去食喇   因為食糖水多啲款式揀呢 ~

咁家姐同婆婆講話揀啲熱嘢食啦   婆婆話雪糕都有熱嘅咩 ?!   哈哈哈哈   笑死我哋呀   因為婆婆一心以為係去食雪糕嘛 ~

食完都 9 點半喇   屋企 10 點無水   所以我要即搭車番屋企喇 ~

估唔到真係大食請食糖水   佢果然好聽阿妹話   哈哈哈哈   真係好難先屈到佢一餐㗎 ~

我 10 點 10 分番到屋企   真係咩都唔理   即沖涼洗頭呀   感恩仲有水呢 ~

抖陣就睇下電視   11 點幾都瞓喇   今日好似瞓完又食   食完又瞓咁   好彩今晚都眼瞓咋   呵呵 ~