燻蹄 (外賣) + 紅油麥菜 ( 20-JAN-2019 )

( 20-JAN-2019  SUN )

今朝 9 點半起身   估唔到又精神喎   感恩感恩 ~

早咗出門口   所以好多時候食早餐   哈哈 ~

里奧大人番教會先   我就繼續同弟兄 A 兩公婆傾偈   傾到 11 點幾就番教會喇 ~

我諗住直衝去 PT 房   點知里奧大人叫停我   問我走去邊 ?!   哈哈    佢好少見我咁衝法呢 ~

今日同里奧大人一齊學另一個事奉工作   好緊張   好在里奧大人幫手聽   呵呵 ~

唉   今日牧師祈禱嘅時候又喊   搞到我又忍唔住喊   始終蔡弟兄嘅離開   真係令教會好多弟兄姊妹好傷感 ~

崇拜完畢就要即刻去開會   差唔多 2 點就散會 ~

同里奧大人去買燻蹄   之後就食下午茶喇 ~

食完去街市買餸   咁我叫里奧大人喺商場等我   之後里奧大人打嚟問做咩咁耐嘅 ?!   原來我行咗成半個鐘   因為我講話買菜   所以佢好奇怪點解買菜買咁耐   哈哈 ~

番到屋企都 4 點半喇   擺好哂啲嘢   再執下嘢都 6 點 ~

大家都唔係咁餓   所以 7 點半先食飯 ~

是日懶餐 - 燻蹄 (外賣) + 紅油麥菜

燻蹄 (外賣) ~ 依家 $112/斤   我買半斤 $60   但份量唔多囉   出去叫個小菜餐都係 $70   下次唔再買佢喇 ~ 

紅油麥菜 ~ 都無紅色嘅   不過好重油麥菜味道   反而咁樣我就麻麻哋 ~

9 點半家姐嚟屋企樓下交收   佢係都要車厘子同鵝潤腸比我   咁啱頭先喺街市有獨子蒜   所以我都買咗 1 斤比佢   交換禮物 ~

家姐之後 Whatsapp 我   叫我快啲食哂啲車厘子   我話點解 ?!   佢話補血呀   哈哈   其實我都唔記得自己要食多啲補血嘢 ~

放埋好啲嘢就即沖涼喇   里奧大人 11 點瞓   我就聽詩歌聽到 12 點先瞓呀 ~