蜜糖焗豬肋骨 + 蛋炒飯 ( 23-JAN-2019 )

( 23-JAN-2019  WED )

尋晚瞓到半夜熱醒呀   條頸出汗呀   又話呢幾晚會好凍   我真係唔覺喎 ~

打比里奧大人問佢覺唔覺得凍啦   我話尋晚熱醒喎   但佢話尋晚凍醒要着番長袖衫瞓呀   但見我踢開哂啲被都覺得奇怪   之後我話可能食咗車厘子呀   因為呢兩晚瞓覺都唔覺凍呀   哈哈 ~

早餐食吞拿魚治烘底   好味道 ~

菇場做下停下   個人有啲攰呀   哈哈 ~

Lunch Time 出去買朱古力麻糬比里奧大人   之後再買牛什米番菇場   原來都 1 點喇   怪不得頭先要等咁耐啦 ~

仍然忙下停下   但無啦啦勁眼瞓囉   如果可以瞓陣就幾咁好呢   哈哈 ~

放工去買雞蛋   之後都番屋企 lu ~

預備好哂晚餐就拖地   咁都 6 點 40 分喇   即刻淥埋 2 棵紅油麥   再滾番熱之前嘅蕃茄湯 ~    

今晚里奧大人 7 點鬆啲就番到屋企   我都未搞掂   差唔多 7 點 15 分先有得食呢 ~

是日晚餐 - 蜜糖焗豬肋骨 + 蛋炒飯

蜜糖焗豬肋骨 - 本身用焗爐焗咗 15 分鐘   但完全唔似焗嘅感覺   所以又用番光波爐囉   同埋唔可以貪心掃太多汁   唔係好似滷水嘢咁   哈哈 ~

蛋炒飯 - 真係里奧大人鍾意食炒飯   我先炒㗎咋   依家多數整埋蛋絲   咁我炒緊飯嘅時候   里奧大人問我整緊咩 ?!   我話炒飯呀做咩 ?!   佢話好香喎   真係嚇死我   因為我以為啲蛋係臭呀 ~

食埋飯再抖陣   之後洗嘢   又鑊又煲又碗碟又光波爐   又要清潔埋爐頭   洗到咁上下都覺得條腰開始痛   原來已經洗咗半個鐘 ~

沖埋涼就休息喇   唔熨衫住喇   條腰頂唔順呀   哈哈 ~

今晚堅攰   所以 10 點 45 分都瞓覺喇 ~