素食水餃 + 西洋菜豬肉水餃 (外賣) ( 19-JUL-2019 )

( 19-JUL-2019  FRI )

今朝 6 點 45 分起身   里奧大人都起身陪我去考試場呀   佢仲早我 5 分鐘起身   真係好感激佢㗎 ~

7 點 20 分出門口   去到考試場附近先食早餐 ~

食完即溫習   我同里奧大人講話明明識嘅題目   點解好似未見過咁嘅 ?!   佢叫我唔好再溫   要保持頭腦清醒   哈哈 ~

我去到考試場   里奧大人就要搵地方坐喇 ~

9 點半開始考   個幾鐘考完   感恩 Pass 呀 ~

考完即打比里奧大人   佢又過嚟陪番我去搭地鐵   哈哈 ~

我覺得佢真係慘   佢應該仲緊張過我啦   又幫我計哂時間幾點起身出發同食早餐時間   好似佢考試咁 ~

咁我都同佢講好多謝佢   之後佢即刻囂張哂   我即刻話其實佢唔帶我去   我可以舒舒服服坐的士去   又唔駛咁早起身   講完都覺得自己衰呀   哈哈 ~

11 點半左右到官塘   行咗陣官塘廣場   之後再去 APM   諗住去 Pizza Express   但居然無咗   咁去 Italian Tomato 啦   我想食西餐呀 ~

黑松露忌廉雜菌意粉 ($68) - 好味喎   因為我成日覺得黑松露係有陣臭腳味   但呢個無呢

莎樂美薄餅 ($88)

蜆肉忌廉湯 - 唔熱嘅

焦糖忌廉咖啡 (+18) - 我以前好抗拒有 Cream 嘅咖啡   但唔記得喺邊度飲完一次之後   覺得好飲   所以會飲囉   但就真係要好耐先飲一次   大佬   飲 1 杯真係肥幾磅㗎   哈哈

呢個公仔 Kewpie (丘比 BB) 好得意   但啲手指有好恐怖   哈哈

食到 12 點 45分左右都走喇   我要番工呢 ~

菇場無哂大粒   又可以自由地溫習喇 ~

放工去超市買灣仔碼頭水餃   今晚想煮喇   雖然都只係水餃   但實在唔想出街食 ~

是日懶餐 - 素食水餃 + 西洋菜豬肉水餃

素食水餃 - 餡料係香菇木耳青菜   都 OK 喎   起碼無一陣味   之前唔記得買邊個牌字嘅素水餃   食落一陣味   果次係因為里奧大人話要食素餃先買   點知又話唔鍾意食   咁我咪食囉   真係食到有陰影   哈哈 ~

西洋菜豬肉水餃 - 我無食呀   里奧大人話同素食嘅味道無咩分別 ~

洗埋碗都即刻沖涼喇   開埋機洗衫就溫習了 ~

今晚 10 點半瞓覺   溫到真係好眼瞓   哈哈 ~