燒汁金菇牛肉 + 肉燥飯 + 粟米青瓜粒 ( 10-APR-2023 )

  ( 10-APR-2023  MON )

今朝 8 點半醒咗   所以都起身整早餐喇 ~

早餐食芝士蛋豬柳漢堡三文治   呢隻美國豬柳又唔鹹喎   有機會再入貨   用嚟煮懶人炒麵都唔錯嘛   哈哈 ~

沖埋涼就睇 Youtube   但其實個人好似好攰咁   最後由 12 點半瞓到 1 點半呀  之後即刻出發去食嘢喇 ~

去咗 A-1 買青森蘋果批比婆婆   因為家姐上次買比婆婆   佢話鍾意食呀   所以家姐話買呢   咁樣仲好啦   好過買生果   我哋又唔識揀先慘嘛 ~

買完去金坊食下午餐   家姐 2 點幾落車   所以叫佢過嚟坐下先 ~

香葉肉碎配蛋飯 (細) ($52) - 好在侍應姐姐話有下午茶套餐咋   佢強調話份量細過午餐   我話咁就啱喇   因為我唔想又要打包拎走

冬蔭公豬頸肉扎肉金邊粉 ($52) - 同尋日午餐一樣   哈哈   不過我唔想食海南雞同豬手   唯有又食番佢啦

椰皇沙冰 (+$18) - 侍應姐姐係咁推介   咁就叫嚟飲啦

青森蘋果批 ($60) - 細細個都唔錯  

差唔多去到婆婆樓下   大食又話等埋佢先上婆婆屋企 ~

原來佢無食嘢   以為會約埋一齊食嘢   但佢又無講囉   佢話落樓下買個茶餐   之後婆婆話想食 Pizza   咁就一齊出去啦   家姐話細個嘅時候係婆婆帶我哋去食 Pizza   依家就我哋帶番婆婆食 Pizza   哈哈 ~

墨西哥芝士海鮮餡餅 (3件) 配薯格 ($49) - 大食要呢個餐   但就比咗 1 件比婆婆同家姐 Share   其實家姐都食唔落嘢   哈哈

至尊迷你必勝批 ($49) - 婆婆鍾意食厚批   咁一定叫啦

至尊迷你必勝批 ($49) - 因為唔想 5 個人食 2 個餐   所以叫個薄批   咁食唔哂可以打包嘛

蘑菇忌廉雞湯 - 婆婆好鍾意飲咁噃   難得飲哂   因為婆婆少飲水   咁飲湯都好過唔飲水啦

細個真係好開心嘅   每逢星期六都會去婆婆屋企   咁阿姨同舅父一家又一齊食   所以大人喺廳食   我哋細嘅就喺房食   最鬼開心   食完就玩   一係就一齊去 7 仔買雪條   講番出嚟真係好多回憶㗎 ~

咁我哋全部係女仔   得表弟一個男仔   有次唔記得食嘢定咩   我同表弟講話你認做女仔就比你   佢唔認呀   哈哈   我真係覺得自己好鬼衰呢 ~

工人就唔食喇   出去行陣再接番婆婆 ~

大食趕住番屋企   咁我哋就上婆婆屋企坐陣陪佢啦 ~

里奧大人同家姐傾開點樣洗部咖啡機   佢哋講嘅都唔同牌子   所以差啲搭錯線   哈哈 ~

4 點 45 分走人   經過停車場   家姐話上次同工人經過停車場   工人話 "呢架林寶唔係咁靚   我都係鍾意法拉利多啲"   家姐話聽到呆咗   哈哈哈哈   因為無諗過佢鍾意睇車嘛 ~

家姐要去整嘢   我同里奧大人就番屋企喇   本來諗住去 AEON 買糖水   但拎住兩袋嘢就唔去 lu ~

里奧大人沖埋涼就瞓陣覺   我就小清潔屋企啦 ~

天白花厚菇 1 斤 ($560)

零食都有   話呢包軟糖好食   所以就每人 1 包

呢盒應該唔知邊個送比家姐   不過佢唔食呢啲   所以又比埋我

話啲紙巾無香味㗎   里奧大人鍾意喎   真係比嘢我嘅時候   乜都講得出   哈哈

差唔多 7 點幾都要開餐   其實仲唔係咁餓   但又唔想太夜食囉 ~

是日晚餐 - 燒汁金菇牛肉 + 肉燥飯 + 粟米青瓜粒

燒汁金菇牛肉 - 再加咗半罐粟米   咁樣食都唔錯   不過食剩大半碟   聽晚又要食 lu ~

肉燥飯 - 星期六晚食剩   今晚一定要食埋去喇 ~

粟米青瓜粒 - 咁樣清清地唔錯   但其實係懶   哈哈哈哈 ~ 

煮埋個烏冬比里奧大人做飯盒   反正咁多牛肉   咁聽晚唔駛食咁多 ~

洗埋碗就沖涼   本身諗住今日休息   估唔到都係出咗街   所以呢 4 日假期好似無咩休息過咁   哈哈 ~

同里奧大人一齊睇 "模範計程車 2"   睇到 10 點 15 分   本來想瞓   但唔想瞓到半夜起身   所以睇多陣 Youtube ~

不過真係好眼瞓   所以 10 點 40 分都自己瞓覺先喇   哈哈 ~