十二味 @ 啟德 ( 15-APR-2023 )

土豪版酸菜魚 X 2 ($358/份) - 兒生女叫咗一份辣同一份唔辣 - 里奧大人姐夫話唔駛叫兩個   寧願叫另一款魚仲好   不過兒生女話咁叫   就由佢發版啦

經典香辣鍋 ($38) - 加咗滷水肥腸 ($48) + 滷豬手 ($48) + 五花腩 ($48) + 豆皮 ($28)   我食咗豬腸同豬手   都好入味呀   第一次食豆皮   出面買都唔平同埋份量好多   炸碗豆脆卜卜好正

酸辣土豆絲 ($68) - 呢個夠酸辣   出街食呢個最好   因為自己整就好煩咁

清炒蒿筍絲 ($78) - 我好鍾意食蒿筍   但自己唔識煮 

黯然銷魂炒飯 x 2 ($78) - 我無食呀   其實午餐都仲未落格   所以唔想食飽肚嘢 

ㄠ妹兒冰粉 X 2 ($28/份) - 兒生女話: 舅母   呢啲先叫做凍   哈哈   因為真係食到最後嗰粒都係凍呢   呢個有桂花㗎   所以食落好好味呢

紅糖糍粑 X 3 ($48/份) - 我曾經諗住整   所以今晚食到真係勁開心呀   我話佢哋食唔哂就我包底   我勁鍾意食煙韌嘢㗎

欲望酸梅 ($28) - 估唔到咁大杯   但都幾好飲   唔係太甜

( 15-APR-2023  SAT )

尋晚瞓到 5 點幾去咗次廁所   之後瞓得勁唔好   又見到爸爸媽咪   又見到同家姐同里奧大人搭地鐵   有個女人好恐怖   抱住個女仔仲將個頭頂去天花板   同埋有個夢係我排隊整嘢   有個阿婆話攝埋嚟話佢排先   咁我大聲話咪比妳先囉   真係發個夢都咁激氣嘅   哈哈 ~

之後又見到 MJ 當完兵出嚟   我同 JinJin 去接佢   但我哋係講廣東話先勁呀   最後個夢係要番工起身   呢個夢先最恐怖   哈哈哈哈 ~

終於 7 點半要起身番工啦   呢兩個鐘好似無瞓過咁 ~

早餐食柯華田瑞士卷   仍然覺得好味道 ~

呢隻杯只係 $29.9   所以我叫里奧大人送比我   哈哈 

菇場唔忙   差唔多 11 點幾   阿虫話 Report 有嘢改咗   又要重新再 Run 一次   我聽見都真係覺得煩 ~

咁好喇   用佢新整嘅 Excel B 啦    咁佢個有 2 個 File Name   其中一個係加咗條 Line (Date)   但又做唔到準確嘅日子   之後點改都改唔到   又話用番本身無改 line (date) 個 file   所以佢話用番舊   咁我話無問題   用番舊啦 ~

之後佢話 "暈喇"   我感覺到佢係話我 Get 唔到佢講嘅嘢   佢話唔係舊呀   係無改 Line (Date) 個 File 呀   我忍唔住話佢囉   咁無改 Line (Date) 嗰個都係新 file 今日先比   妳話用舊咪係一路 Run 緊個舊 Excel 囉   妳唔好話用舊嘛 ~

真係差啲鬧交咁滯   成日又話 Amentment 改好多次   我話唔係我錯喎大佬   客改嘢要做 Amentment 又係我做錯呀 ?!   唔好下下話我錯 ~

咁樣試做個 Report 都搞咗個幾鐘   真心覺得成個 System 根本係廢   連阿花同阿齋都話用呢個 System 真係乜都要手動   數量都要自己加   一係就重覆嘢   真係無人覺得新 System 係好用囉 ~

放工即走   同阿齋一齊行去地鐘站   之後喺紅磡 Join 埋里奧大人去上環   因為今日去拜老爺奶奶 ~

我坐嘅路線係由紅磡去金鐘再去上環   咁我懶醒以為係往金鐘   一定唔會屯馬線   仲去咗往調景巔方向睇睇   但真係無去金鐘方向   即打比里奧大人   佢 Send 咗個圖比我   原來係要去屯馬線   哈哈哈哈 ~

見到里奧大人就再去金鐘轉車   但又搭錯扶手電梯   上上落落先去到上環站 ~

去到無限極廣地見到有米線陣   所以就同里奧大人食埋 Lunch 先 Join 佢哋喇   佢哋喺隔離大家樂食嘢咋 ~

滇味酸辣湯滷水雞翼金菇米線 ($44) - 味道都 OK

重慶酸辣湯牛肉片韭菜米線 ($46) - 呢個湯底好味啲   哈哈

即磨咖啡 & 華田

等埋兒生女兩公婆   差唔多 3 點半先到墳場   拜完就坐巴士再轉地鐵去啟德食飯 ~

本來話入大埔食   我話太遠唔入啦   里奧大人聽日又番全日   真係唔想來回 3 個鐘頭坐車囉 ~

佢哋幾年前已經話再年紀大都未必嚟   咁兒生女嗰輩更加唔會嚟   因為太遠   其實都預咗   但又真係唔明點解當時又揀呢度囉   明知遲早都唔會嚟 ~

同兒生女一齊去洗手間   好在同佢一齊行咋   佢捉一捉我手   唔係我又差啲入錯男廁呀   不過佢話我前面個女人真係入咗男廁 ~

頭先去墳場過馬路好危險   里奧大人係咁示意佢哋行   我話佢聽唔到你講嘢   佢哋會睇㗎喇   咁樣聽唔到又以為你叫佢哋過馬路仲危險   之後佢叫我收聲   真係好心提佢都比人話 ~

之後我全程唔同佢講嘢   不過嬲咗佢 3 個鐘就算啦   今晚難得同佢屋企人食飯   我都想開開心心呢 ~

食下傾下又到 8 點   係時候走人喇   九龍姑奶們一家送我哋去搭巴士   最後 2 分鐘係跑呀   我聽到後面有細路仔呱呱叫好開心咁   原來係兒生仔個仔   我話唔好笑呀   一齊跑呀   真係佢就笑得出啦   我跑到喘哂氣呀   哈哈   因為巴士已經埋站   好在里奧大人快過我咋   唔係應該走咗班車   真係唔該哂司機叔叔等埋我咋 ~

今日又焗熱   跑完真係成身汗   番到屋企仲滴緊汗 ~

拿拿聲開機洗衫就即沖涼   睇下 Youtube   今晚 11 點幾先瞓 ~