尖椒豬肚 + 椒鹽豬扒 + 咕嚕肉 + 鎮江骨 (外賣) ( 13-APR-2023 )

擺好啲   食都開心啲   但其實係搵自己嚟攪   明明食外賣兩餸飯係唔駛洗碟同碗家嘛   哈哈

尖椒豬肚 - 豬肚份量好多   所以食剩一大半   

椒鹽豬扒 - 都好入味   兩餸飯嚟講算係好食㗎喇

咕嚕肉 - 呢碟就食得哂   因為里奧大人帶飯

鎮江骨 - 好味道   所以好多時都會叫嚟食   哈哈

  ( 13-APR-2023  THU )

感恩一覺瞓天光呀   開冷氣瞓真係舒服好多呢 ~

早餐仍然食醬占方包   呢隻法國方包都唔錯   焗 5 分鐘都唔會好乾   不過唔係成日可以買到囉 ~

番到菇場第一時間抹枱   抹抹下見到隻 BB 強乾屍   嚇到我即刻成身汗   我估應該係個電話啦   尋日電話壞要換隔離位嗰部   但其實好耐無人用   我已經徹底消毒啦   點知都有強   最後拎個電話出去 "鄧"   有3隻乾屍呀   好在無強蛋咋   之後我再換番本身部電話   又用得番喎 ~

今朝西瓜出街   所以同阿花 Whatsapp   依家係咁叫佢買花生 show   因為我想佢抽到影相呀   最衰我請唔到假   唔係一齊過去睇 Show 都好 ~

去 Pantry 加熱水飲   咁我開個熱水煲蓋睇下啲水熱唔熱   因為唔見有倒汗水咁   阿輸話我隻係測溫手   點知真係唔知邊個同事咁叻   居然加咗水入水煲   但就無按煲水制呀   好在我真係開嚟睇下咋 ~

Lunch Time 出去下陣   咁等 Lift 同船頭傾開偈   有次無車所以遲咗半個鐘   佢話西瓜試過黑佢臉一星期   同埋我哋最憎西瓜以自己做準則囉   不過佢唔算直屬西瓜部門   佢就唔會話佢   但我哋都話有時想星期六調假   但都費鬼事   寧願自己請假好過   唔係一陣咁邪有嘢做就煩囉 ~

傾完就再去買鯪魚球米   其實唔太餓   但菇場太凍   我要食熱嘢呢 ~

好少見 Berry 咁瞓   我同家姐講話 Berry 望見妳都煩   之後家姐就話頭先心諗   成日 Send Berry 啲相比我   我會唔會覺得佢好煩 ?!   係咪咁啱呀   今朝又一齊見到乾屍強   依家又一齊諗緊煩唔煩   哈哈 ~

好少見 Berry 咁樣背住家姐瞓㗎

之後就咁樣瞓   如果佢咁樣對住我瞓   我肯定會係咁摸佢   哈哈   

不過其實好多時都係咁   同一時間諗嘅嘢都係一樣   只係邊個開口先咁囉 ~

菇場忙呀   好快放工真係開心   哈哈 ~

放工買埋晚餐就番屋企   里奧大人要番學   所以我煮唔切飯呢 ~

見里奧大人仲未番到屋企   咁我就擺好啲餸先   有儀式感係食得開心啲   哈哈哈哈 ~

里奧大人食完飯抖陣都要去番學喇   咁我 7 點幾就去做運動   仲做咗半個鐘   實在難得 ~

沖埋涼就睇 Youtube   里奧大人 10 點先番到屋企呀   叫佢快啲沖涼休息 ~

同佢傾多陣偈   我 11 點鬆啲都自己瞓先喇 ~