乾炒福建飯 (外賣) + 西蘭花 ( 22-APR-2023 )

淥得太耐   變咗黃咁咁

  ( 22-APR-2023  SAT )

今朝一覺瞓到 6 點 50 分就醒咗   但懶床到 7 點 20 分都起身 lu   梳洗之後就出發喇 ~

買完早餐即去家姐屋企   一入門口   Berry 真係熱情到顛咗   撲到我連個袋都唔比我放低   係咁撲撲撲   真係好得意呢   唔知以為佢好掛住我咁   哈哈 ~

難得坐上梳化   所以影完佢先食早餐  

電眼   哈哈

好無奈咁

一有聲就望

好眼瞓嘅眼

真係覺得佢似男仔樣   但其實狗仔樣有無分男女嘅呢 ?!

好期待我嘅吉列魚柳早餐   但突然無咩胃口   所以同家姐 Share 食 ~

其實 Share 食都好   因為我想比家姐試下好唔好食呢

工人突然比包嘢我   我仲以為係家姐叫佢比我   但原來係 Berry 零食   叫我比 Berry 食喎

好煩呀 ?!   咪咁啦   一個月見一次   更係想影多啲相啦喂

係都唔望我

哈哈哈哈   但佢最鍾意咁望我㗎   

無眼睇

好優雅咁

呢個眼神   真係好似想問妳影夠未 ?!?!

Load 相先見到佢咁樣

成日覺得佢張被仔   好似啲阿婆坐梳化要有張被蓋住膝頭哥咁   哈哈

好在佢唔食人嘢   又可能麵包無味道   吸引唔到佢   哈哈

無啦啦又呢埋喺梳化底

家姐食完就同工人傾下偈   又同 Berry 影下相同拍片   眨下眼又 11 點幾   家姐啱啱番到屋企喇 ~

佢其實中緊眼瞓   咁樣睇佢好肥咁呀   依家工人叫佢做肥豬   哈哈

頭側側好得意   但我呢個角度又唔係太側咁   不過我一郁   佢肯定又會走

好眼瞓但無得瞓   哈哈哈哈

家姐買咗豬腰芒   佢話 $20/份好抵喎   咁我話我 $20 有3磅仲抵喎   之後佢拎個電子磅出嚟磅下   估唔到又磅到係 2.2 Lbs   因為諗住太輕係磅唔到嘛 ~

$20 有 12 個又抵喎   我公司附近有時 $15 得 6 個咋

之後家姐叫工人磅下   話工人次次一上磅都好緊張   同埋係都要家姐將 Lbs 化為 Kgs 比佢知   呢下最搞笑 ~

同家姐又傾偈啦   雖然成日都 Whatsapp   但傾偈係會好自然拉埋其他嘢講   咁就知道更多嘢咁   同埋講真係快過打嘛   哈哈 ~

差唔多 1 點就走人   家姐同工人送我搭車   順便同 Berry 去街街 ~

買埋下午茶就番屋企   里奧大人番晏   所以食完可以抖下先番工 ~

里奧大人無啦啦發顛   話佢做咩都唔支持佢   之後都費事理佢   神經病咁 ~

我抖多陣都出去還書   再去買埋菜就番屋企休息休息 ~

頭先無食到嘢   所以 6 點開始好餓呀   醒起仲有日本年糕未食哂   咁一口氣焗哂去食算喇 ~

佢哋係自動爆開   所以一路焗一路聽到卜卜聲都咪話唔驚   哈哈

里奧大人 7 點半番到屋企   我都預備煮飯 lu ~

是日懶餐 - 乾炒福建飯 (外賣) + 西蘭花

乾炒福建飯 (外賣) - 中午食剩   但今晚仍然都食剩一半   呢個飯盒好抵食喎 ~

西蘭花 - 淥得太耐   感覺擺咗好耐咁   呵呵 ~

今晚里奧大人主動洗碗   咁好喇   我可以即沖涼啦 ~

又睇下 Youtube   差唔多 11 點就有睡意   所以拿拿聲瞓覺喇 ~