京都豬扒 + 絲腐乳爽肉炒通菜 (外賣) ( 11-JUL-2023 )

( 11-JUL-2023  TUE )

感恩一覺瞓天光呀   今朝里奧大人里奧大人買早餐番屋企食   所以佢見我鬧鐵響都即刻起身沖涼   叫我瞓多陣   等佢搞掂先好起身   哈哈 ~

早餐同里奧大人 Share 食餐蛋治   佢以為好似星期日咁   一個麵餐加 1 份三文治   我話唔駛呀   因為我早食午餐   食到咁豐富真係食唔到午餐㗎 ~

菇場唔忙啦   之後收到 Ivy Whatsapp   佢特登再去影醫生放假資料比我睇   真係好感動呀   因為我上次問佢   佢話醫生放假   怕我去到摸門釘呢 ~

其實上星期隻腳開始痛   再加上連放兩日病假   8 卦 船頭 阿花 阿爽 阿齋 阿虫 阿後都成日問我對腳點 ?!   里奧大人同事同教友又問   家姐仲勁   早午晚各一次   仲叫我搭的士番工放工   佢會比番錢我   呢下搞笑   因為佢問我隻腳點 ?!  我話 OK 啦   佢就即刻話即係仲痛啦   估唔到佢咁醒   哈哈 ~

雖然今次痛到想死   但無諗過咁多人關心我   可能平時個個都知我鍾意周圍行   依家痛到要休息   佢哋就知道事態嚴重了 ~

買炒麵粉果   但食完好想嘔   唔知係咪食滯咗   最後要食番粒陳皮梅先得   因為要食酸嘢呀 ~

之後個人又好凍   仲要着外套   每月一到個人真係好虛   希望隻腳快啲好番   可以做下運動 ~

唔忙就繼續同阿花 Whatsapp 去旅行嘅嘢   真係勁開心㗎   我哋由 11 點已經開始傾   之後就 1 點傾到 4 點幾   唔係我要叉手機電   真係可以傾到放工啊 ~

放工即走   番到屋企即沖涼   之後等里奧大人買晚餐番屋企食 ~

食完都休息喇   睇下電視同 Youtube ~

里奧大人話阿妹同勁哥叫我唔好搽一條筋   話搽活洛油會好啲   不過屋企無   咁聽日先買啦   其實好在里奧大人接受到阿婆香水咋   我之前每月一到勁想嘔   我叫里奧大人幫我買支細嘅白花油比我搽   依家藥房買已經要 $21 支喇   我初初諗住最多 $10 添 ~

無啦啦全身滾熱辣   好似發燒咁  所以 10 點食埋粒 Panadol 就瞓覺   里奧大人再幫我耳探   溫度係 37.8 同 38.4   基本上我算體溫高   希望瞓醒會好啲啦 ~